Isikolo Sabantwana Abancinane Esingenazo Izinto Zokudlala
NGUMBHALI KAVUKANI! EJAMANI
Ngenye intsasa abantwana abancinane bafika kungekho kwanto kwisikolo sabo ngaphandle nje kwefanitshala, onke amagumbi ayekhal’ ibhungane. Bakhangela oonodoli, izinto zokudlala, okanye izilwanyana zokudlala, kodwa abafumana nto. Zazingekho iincwadi okanye izinto zokudlala zokwakha. Kwakungekho maphepha kungekho nazikere. Zonke izinto zokudlala zazishenxisiwe yaye zingazi kubakho kangangeenyanga ezintathu. Kwakutheni?
Esi sikolo sesinye sezikolo ezininzi ezithandwayo eJamani, eOstriya naseSwitzerland ezinenxaxheba kumsebenzi ophawulekayo nozisa iinguqu wokwenziwa kwezikolo Zabantwana Abancinane Ezingenazo Izinto Zokudlala. Nakuba kusenokuvakala kungaqhelekanga oku, eli phulo nelinconywa gqitha ziingcali zempilo kwiEuropean Union, injongo yalo kukuthintela abantu bangabi nezinto abazithanda ngokugqithiseleyo. Kwiminyaka yakutshanje abaphandi baye baphawula ukuba abantu abadli ngokuthanda nantoni na ngokugqithiseleyo xa beye bakwazi ukuphila kakuhle nabanye abantu kwasebutsheni. Ingxelo yephephandaba ithi, oku kuquka “ubuchule bokunxibelelana nokukwazi ukuqalisa incoko lula nabanye, ukusingatha iiyantlukwano, ukwamkela imbopheleleko eza nemiphumo yezenzo zakho, ukuzibekela usukelo, ukukwazi ukuqonda iingxaki, ukufuna uncedo nokuza nesicombululo.” Ngokutsho kwabo bancomela le nkqubo, obu buchule bufanele buveliswe kwasebutsheni kangangoko kunokwenzeka, yaye izihlandlo zokungabikho kwezinto zokudlala zenzelwa le njongo, zibenza babe nobuchule bokwenza izinto ezahlukahlukeneyo yaye bazithembe.
Ukungabikho kwezinto zokudlala kangangeenyanga ezintathu kwakucetywe kakuhle yaye kwaxutyushwa nabazali nabantwana. Ekuqaleni, abanye abantwana abayazi into abamele bayenze xa kungekho zinto zokudlala. Ingxelo ithi: “Kwezi zikolo kukho iintsuku abantwana abangalawulekiyo kwiiveki ezine zokuqala,” yaye abacebi bezi nkqubo badla ngokungazi ukuba bathini na. Kodwa abantwana baye bafunde ukumelana nemeko baze bafunde ukwenza ezinye izinto. Xa bengenazo izinto zokudlala, abantwana bancokola nabanye, bacebe ukwenza izinto baze badlale kunye, ngaloo ndlela bephucula ubuchule babo bokukwazi ukuhlala kunye nokuthetha kakuhle ulwimi. Abanye ababekade “bengancokoli” besuka bazidlalele ngezinto zabo ngoku bazakhela abahlobo. Nabo abazali baye baphawula utshintsho oluncomekayo. Bathi, abantwana baziphatha kakuhle ngoku xa bedlala yaye banobuchule obungakumbi bokucinga nokwenza izinto ezintsha.