Uya Kuphela Nini UGawulayo?

Besebancinane, abantwana bangxixhwa ngeentetho eziphathelele isini nezikhuthaza ukuziphatha okubi. Ukutofela iziyobisi okugqugqise lonke yenye indlela ephambili abasulelwa ngayo abantu yiHIV. Xa ucinga ngendlela abaziphatha ngayo abantu abaninzi ngokungathi izenzo zabo azibi namiphumo, unokuthandabuza ukuba uGawulayo uya kuze aphele.

IINGCALI zempilo zichan’ ucwethe xa zisithi into ebalulekileyo ukuze koyiswe uGawulayo kukuba abantu batshintshe indlela yokuziphatha. Ingxelo epapashwe liZiko Lokulwa Nokuthintela Izifo ithi, “Nasiphi na isizukulwana sabantu abaselula sifuna inkcazelo ebanzi neqhubekayo yezempilo nokuncedwa sibe nobuchule obuhlala ixesha elide ukuze siphephe imikhwa enokusikhokelela ekubeni sasulelwe yiHIV. Kwezi nkqubo kumelwe kuqukwe abazali nabantu abaza kufundisa.”

Kucacile ukuba, abazali kufuneka bafundise abantwana babo ngezi ngozi ngaphambi kokuba balahlekiswe ngoontanga babo nabanye abantu. Oku akusoloko kulula. Kodwa kunokubusindisa ubomi bomntwana wakho. Ukufundisa abantwana bakho ngesini neziyobisi akuthethi kuthi abakho nyulu. Enyanisweni kunokubakhusela bangaphulukani nobunyulu babo.

Uqeqesho Lwabazali Lubalulekile

Kubantu bakaThixo bamandulo, kwakulindeleke ukuba abazali bafundise abantwana babo ngeentlobano zesini nendlela yokukhusela impilo yabo. Okubangel’ umdla kukuba, imithetho yamaSirayeli amandulo yayiquka imigaqo ecacileyo yokuziphatha nezinto ekwakufuneka azenze ezaziwakhusela angasulelwa zizifo. (Levitikus 18:22, 23; 19:29; Duteronomi 23:12, 13) Le mithetho yayiza kufundiswa njani ebantwini? UYehova uThixo wathi kumaSirayeli: “La mazwi ndikuyalela wona namhlanje amele abe sentliziyweni yakho.” Kwakufuneka ibe ngabazali kuqala abaqonda iingenelo zokuthobela le mithetho nemiphumo yokungayithobeli. Emva koko bayalelwa kwathiwa: “Uze uwabethelele kunyana wakho yaye uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.”—Duteronomi 6:6, 7.

Esinye isichazi-magama sichaza ‘ukubethelela’ ngokuthi “kukufundisa nokuchukumisa intliziyo ngokuphindaphinda okanye ngokubongoza.” Kucacile ukuba, kufuneka uchithe ixesha. Ngokuqinisekileyo, abazali abachitha ixesha befundisa oonyana neentombi zabo ngeengozi zokusebenzisa kakubi iziyobisi nokuzifica ngesini banethuba elihle lokubona abantwana babo bephepha iindlela zokuziphatha ezinokukhokelela ekubeni basulelwe yiHIV nazezinye izifo.a

Intuthuzelo Kwabo BaneHIV NoGawulayo

Imigudu yokuthintela esi sifo isenokungazithuthuzeli kangako izigidi zabantu abasele beneHIV noGawulayo. Ukongezelela ekuguleni sesi sifo, abantu abanaso basoloko bebekwa ibala elibi yaye abafunwa. Kutheni kunjalo nje? Kungenxa yenkolelo exhaphakileyo nephosakeleyo yokuba ngokubamba nje umntu onesi sifo unokwasulelwa yiHIV. Iyaqondakala into yokuba abantu besoyika ukwasulelwa yiHIV noGawulayo, kuba sisifo esasulelayo nesibulalayo. Abanye baye bavumela ukoyika kwabo esi sifo kwabenza baboyika ngokungekho ngqiqweni abantu abanaso. Abantu abanaso baye babandezwa amayeza, bagxothwa ezicaweni bade bahlaselwa nangogonyamelo.

Abanye abantu bathi uGawulayo sisiqalekiso sikaThixo kubantu abangendawo. Yinyaniso ukuba, ukuthobela imilinganiselo yokuziphatha yeBhayibhile ephathelele iintlobano zesini, ukusetyenziswa kweziyobisi negazi bekuya kubasindisa abantu abaninzi ekwasulelweni sesi sifo. (IZenzo 15:28, 29; 2 Korinte 7:1) Noko ke, iZibhalo zibonisa ukuba ukugula asibobungqina bokohlwaywa nguThixo ngenxa yesono esithile esenziwe ngumntu. Ngokwahlukileyo, iBhayibhile ithi: “UThixo akanakulingwa ngezinto ezimbi yaye naye akalingi namnye.” (Yakobi 1:13; Yohane 9:1-3) Umntu oneHIV okanye uGawulayo ngenxa yokusilela ukuthobela imilinganiselo yeZibhalo kodwa abe eguqukile kwindlela yakhe yokuziphatha unokuqiniseka ukuba akashiywanga nguThixo.

Ukuba novelwano nothando kukaThixo ngabantu abanezifo ezinganyangekiyo kwabonakala xa uNyana wakhe, uYesu wayelapha emhlabeni. Xa wadibana nomntu oneqhenqa kuhambo lwakhe, uYesu “waba nosizi, waza wasolula isandla sakhe wamchukumisa.” UYesu wasebenzisa amandla akhe angummangaliso waphilisa lowo uneqhenqa. (Marko 1:40-42) UYesu akazange abajongele phantsi abantu abagulayo. Indlela awabonisa ngayo ukuba uyabathanda yimbonakaliso egqibeleleyo yendlela uYise wasezulwini abathanda ngayo.—Luka 10:22.

Ukupheliswa KukaGawulayo—Kungekudala!

Ukuphilisa ngendlela engummangaliso kukaYesu akusiqinisekisi nje kuphela ngendlela asithanda ngayo uThixo. IBhayibhile isixelela ukuba uYesu Kristu ngoku ulawula njengoKumkani wasezulwini. (ISityhilelo 11:15) Ubulungiseleli bakhe basemhlabeni babonisa ukuba unamandla yaye ukulungele ukuphilisa nasiphi na isifo esithwaxa uluntu. Yiloo nto kanye aza kuyenza.

Isiprofeto seBhayibhile sisiqinisekisa ukuba kungekudala ‘akuyi kubakho mmi uthi: “Ndiyagula.”’ (Isaya 33:24) Phezu kwako nje ukungakwazi kwabantu ukuthintela ukusasazeka kukaGawulayo okanye ukunika bonke abantu amachiza, sinokuqinisekisa ukuba uGawulayo uya kusitshulwa neengcambu. UKumkani uDavide wathi: “Mbonge uYehova, mphefumlo wam, ungakulibali ukwenza kwakhe konke, Yena oxolela sonke isiphoso sakho, ophilisa zonke izifo zakho.”—INdumiso 103:2, 3.

Kuya kwenzeka nini oku? Yintoni uThixo afuna bayenze abo banethemba lokuxhamla kwezi ntsikelelo? Siyakumema ukuba uqhagamshelane namaNgqina kaYehova ukuze ufunde okungakumbi ngesithembiso esimangalisayo seBhayibhile.

[Umbhalo osemazantsi]

[Amagama acatshulweyo akwiphepha 11]

Isiprofeto seBhayibhile sisiqinisekisa ukuba kungekudala “akakho ummi . . . oya kuthi: ‘Ndiyagula.’”

[Umfanekiso okwiphepha 10]

Ukufundisa abantwana bakho ngeentlobano zesini nangokusetyenziswa kakubi kweziyobisi kunokubakhusela

[Umfanekiso okwiphepha 10]

Amandla kaYesu okuphilisa abagulayo nokukulungela kwakhe ukwenjenjalo kwabonisa oko aya kukwenza kwixa elizayo