Utyelelo Olungalibalekiyo KwiSigingqi Sentaba-mlilo YaseNgorongoro
Ngumbhali kaVukani! eTanzania
“U KUBA iingelosi zaziyifota iGadi yase-Eden, ezo foto zazo zazingayi kuba nomahluko kwezo zinokufotwa kwiSigingqi Sentaba-mlilo yaseNgorongoro namhlanje.” Wabhala watsho uReinhard Künkel kwincwadi yakhe ephathelele le ndawo ibangel’ umdla yaseTanzania. ISigingqi Sentaba-mlilo yaseNgorongoro yindawo ethi ndijonge, nenyakazela ngamawaka ezilwanyana zasendle. Sithelele njengoko sityebis’ amehlo kule ndawo!
Umbono Ongayiwayo
Emva kokuhamba iiyure ezine ngemoto kwiindlela ezinothuli, side sagaleleka kwincam yeSigingqi Sentaba-mlilo yaseNgorongoro. Simi kwibhalkoni yehotele esikuyo sibukela obo buhle bungayiwayo. Ngokwenene lo ngumbono ongenakuthelekiswa nanto. Xa zithetha ngale ndawo iingcali zemvelo zide zithi “yeyesibhozo kwizinto ezimangalisayo ehlabathini” ibe siyasibona isizathu sokuba zitsho.
Lalivela phi igama elithi Ngorongoro? Akukho mntu uqinisekileyo. Ngokutsho koMbutho Wokulondoloza Indalo eMpuma Afrika, abanye bathi uNgorongoro yayiligama lomenzi weentsimbi ezifakwa entanyeni yenkomo wohlanga lwamaMasai owayehlala kweso sigingqi. Bambi bathi eli gama lavela kwizibhovubhovu zeqela lamaDatogo ezoyiswa ngamaMasai emva kwemfazwe eyayikweso sigingqi kwiminyaka eli-150 eyadlulayo. Noko ke, imvelaphi yelo gama isuka ingabaluleki nganto xa sibona amaqwarhashe egramza ingca kufuphi nendawo yokupaka imoto. Njengoko sikhwela emotweni siya sisondela kuwo, kodwa akasinanzanga nganto. Senjenjeya sisihla ukusinga embindini wesi sigingqi sifuna ukubona izilwanyana zasendle ezingakumbi.
Le ndawo imi kwiimitha ezingama-2 236 ngaphezu komgangatho wolwandle yaye sesona sigingqi sikhulu sentaba-mlilo engazange ide igqabhuke ehlabathini. Ilingana neekhilomitha ezili-19,2 ubude, ize ithi rhwelele ngezikwekhilomitha ezingama-304. Sithi chu ukuhla sigudle udonga lwesi sigingqi oluziimitha ezingama-610 ukuphakama, iintloko zingaphandle kweefestile silungiselela ukufota. Ngoxa besikwincam yale ndawo, umoya wakusasa ubuphephezela unenkwancana. Kodwa esigingqini kufudumele ngendlela emangalisayo.
Njengoko umqhubi ethe chu nathi kwesi sigingqi, sidlula kwichibi letyuwa elincinane lithe mome ngamakholwase apinki. Ngoku sibona ungqameko olusekungeneni luthe nkqo ngaphaya kwalo kuvele isibhakabhaka esiluhlaza, yaye siphulaphula amaqwarhashe neenqu esenza isankxwe sengxolo engaqhelekanga, yaye noko kusichukumisa gqitha. Ngokwenene yiparadesi le!
Izilwanyana Zasendle Kwesi Sigingqi
Kwesi Sigingqi saseNgorongoro besilindele ukubona inyathi, iindlovu, amaqwarhashe, iinqu, iinyamakazi, imikhombe emnyama neenkawu yaye ngokolindelo lwethu siyazibona. Zikho nezinye izilwanyana ezidla inyama njengeecheetah, iihyena, neengonyama ezinesingci esimnyama. Kwichibi elincinane kukho iimvubu ezizipholise khona. Azikhathazwa nakancinane yinto yokuba sizifota.
Ngesiquphe umqhubi wethu uyema! Usibonisa umkhombe omnyama unqumla phambi kwethu. Lo mkhombe ukhangeleka wonwabile kwesi sigingqi, yaye lilungelo elingafane lifumaneke ukubona umkhombe kufutshane kangaka endle. Ezi zilwanyana zimangalisayo zisemngciphekweni wokuphela; kuqikelelwa ukuba zingaphantsi kwama-20 ezikhoyo kwesi sigingqi. Apha kukhe kwabanjwa oonqalintloko babazingeli bebulala imikhombe kuba befuna iimpondo zayo, ezithengiswa ngondlela-mnyama ukuze kwenziwe iziphatho zezinkempe kunye namayeza. Abalindi bahlala bezula belinde ezi zaphuselane.
Umntu othanda iintaka unokubona iintlobontlobo zeentaka ezintle, njengeenciniba, amaseme, amahem, amangabangaba, ookhwalimanzi, iingxangxosi, izinqola namakholwase. Apha kuhlala iintlobo zeentaka ezingaphezu kwekhulu, ongenakuzifumana kuMyezo Wezilwanyana waseSerengeti oselumelwaneni. Kukho izinqolamthi, amagiyogiyo, iibrubrus nonogqaza. Unokubona irosy-breasted longclaw phakathi kwingca ende, nkqu neCape rook enqabe okwezinyo lenkuku ikhe ibonwe apha.
Nakuba inkoliso yezilwanyana ezilapha ingenaxesha lethu, simele sihlale emotweni. Kodwa, wona amaMasai ahlala kwizindlu zodaka ezifulelwe ngengca ngaphandle kwesi sigingqi azulazula njee kwesi sigingqi neemihlambi yawo. Kubonakala ngathi izilwanyana zasendle sele ziwamkele.
Ubuhle nenzolo ekwesi Sigingqi saseNgorongoro ichukumisa ngokwenene yaye iyamangalisa. Utyelelo lwethu alulibaleki.
[Umfanekiso okwiphepha 15]
Umkhombe
[Umfanekiso okwiphepha 15]
Abelusi bohlanga lwamaMasai kwincam yesi sigingqi
[Umfanekiso okwiphepha 15]
Ibhinqa lohlanga lwamaMasai
[Umfanekiso okwiphepha 16]
Iicheetah
[Umfanekiso okwiphepha 16]
Ihem
[Umfanekiso okwiphepha 16]
Amakholwase
[Umfanekiso okwiphepha 16]
Imvubu
[Umfanekiso okwiphepha 16, 17]
ISigingqi saseNgorongoro
[Umfanekiso okwiphepha 17]
Amaqwarhashe
[Umfanekiso okwiphepha 17]
Inyathi
[Umfanekiso okwiphepha 17]
Iindlovu
[Umfanekiso okwiphepha 17]
Inkawu