Uxinezeleko—Unobangela Nemiphumo Yalo
YINTONI uxinezeleko? Ngokutsho kwenye ingcali, uxinezeleko lunokuchazwa “njengayo nayiphi na ingxaki esemzimbeni okanye kwimichiza ebangela unxunguphalo.” Ngaba oku kuthetha ukuba uxinezeleko luyingozi ngokupheleleyo? Akunjalo. Njengoko uGqr. Melissa C. Stöppler esitsho, “uxinezeleko nonxunguphalo nje olungephi lunokuba yingenelo maxa wambi. Ukunxunguphala nje kancinane xa sisenza umsebenzi othile kudla ngokubangela ukuba siwenze kakuhle loo msebenzi yaye sizibhokoxe.”
Ngoko, uxinezeleko luba yingxaki xa kutheni? Lo kaStöppler uthi: “Kuxa lunganyamezeleki, okanye umntu engakwazi ukuhlangabezana nalo, xa kunjalo ke luba yingozi.” Khawuqwalasele ezinye zezinto ezidla ngokubangela uxinezeleko.
Uxinezeleko Olubangelwa Kukuzama Iindlela Zokuphila
UKumkani uSolomon wathi: “Akukho nto elunge ngakumbi emntwini kunokuba adle, asele aze enze umphefumlo wakhe ubone okulungileyo ngenxa yokusebenza kwakhe nzima.” (INtshumayeli 2:24) Noko ke, kubasebenzi abaninzi, iindawo zempangelo zifana nje nokufakwa kwiziko elitshisayo.
Ingxelo ye-European Agency for Safety and Health at Work yathi abasebenzi badla ngokuxinezeleka emsebenzini kuba, phakathi kwezinye izinto, akukho nxibelelwano luhle phakathi kwabaphathi nabasebenzi, abaphathi abafuni kuva uluvo lwabasebenzi xa besenza izigqibo ezichaphazela abasebenzi, abasebenzi bayaxabana okanye baziva bengaqinisekanga ngezikhundla zabo nangenxa yemivuzo ephantsi. Enoba siyintoni na isizathu, ukuzama ukuhlangabezana neengxaki zasemsebenzini kunokwenza abazali bangabi namandla okusingatha iimbopheleleko zentsapho. Yaye ezi mbopheleleko zisenokuba nkulu. Ngokomzekelo, komnye unyaka, eUnited States abantu abamalunga nama-50 ezigidi babenyamekela ilungu lentsapho eligulayo okanye elalupheleyo. Iingxaki zemali zisenokuba ngomnye unobangela woxinezeleko kwintsapho. URita, ongumama wabantwana ababini waba neengxaki zemali xa umyeni wakhe uLeandro, wafumana ingozi yenqwelo-mafutha eyambangela ukuba ahambe ngewheelchair. URita uthi: “Iingxaki zemali ziyanxunguphalisa. Ukungabi nayo imali yokuhlawula zonke iindleko zekhaya, kukubangela udakumbe.”
Uxinezeleko Kubazali Abangenamaqabane
Abazali abangenamaqabane badla ngokuxinezeleka kakhulu xa bezama ukuhlangabezana neentswelo zeentsapho zabo. Umzali ongenaqabane uvuka kwakusasa alungise isidlo sakusasa, anxibise abantwana aze abase esikolweni, aleqe emsebenzini ukuze afike kwangethuba, azame ukuphumeza iimbopheleleko zomsebenzi yaye oko kumshiya edinwe eyimfe kwaye edandathekile. Akuba umama ewugqibile umsebenzi wakhe wosuku, kuqalisa enye inkathazo, uyakhawuleza aye kuphuthuma abantwana esikolweni, alungise isidlo sangokuhlwa aze enze neminye imisebenzi yekhaya. UMaría, ongumzali ongenaqabane oneentombi ezine ezikwishumi elivisayo uthi uxinezeleke kangangokuba ngamany’ amaxesha ude azive ngathi uza kusuka agqabhuke.
Abantwana Baxinezelekile
URonald L. Pitzer ingcali ngezentlalo uthi: “Ulutsha oluninzi luba phantsi koxinezeleko ngeyona ndlela imangalisayo.” Lumele lujamelane neenguqulelo ezenzekayo emzimbeni nangokweemvakalelo ngexesha lokufikisa. Kuphinde kubekho neengxaki olujamelana nazo esikolweni. Ngokutsho kwencwadi ethi Childstress!, usuku umntwana aluchitha esikolweni “luzaliswe ziingxaki neengcinezelo ezibangela uxinezeleko—eziphathelele izifundo, ezemidlalo, ulwalamano noontanga nendlela aphathana ngayo nabafundisi-ntsapho.”
Kwezinye iindawo ugonyamelo lwasesikolweni lubangela ukuba unxunguphalo luthi chatha—kungasathethwa ke ngoloyiko ulutsha oluninzi olunalo lokuhlasela kwabanqolobi nezinye iintlekele. Enye intwazana ekwishumi elivisayo ithi: “Ukuba abazali basoloko bethetha ngendlela ihlabathi eloyikeka ngayo ngoku, baza kusoyikisa.”
Abazali bafanele babe ngumthombo wokhuthazo kubantwana babo. Kodwa okaPitzer uthi: “Amaxesha amaninzi, xa abantwana bezama ukuchaza indlela abavakalelwa ngayo, abazali badla ngokungakunanzi oko, bangabaniki thuba, bazithethelele ngokunganikeli ngqalelo okanye bangayikhathaleli loo nto ithethwa ngabantwana babo.” Kwezinye iimeko, abazali badla ngokuba bexakwe ziingxaki zabo zomtshato. UTito oselula onabazali abagqibela ngokuqhawula umtshato uthi: “Abazali bam babesoloko besilwa.” Njengoko incwadi ethi Childstress! isitsho, “asikokulwa nokuthukana kuphela okubangela unxunguphalo. Ukufukama ingqumbo ezicacisayo nokuba umntu sele ezama ukuyiquma ngamazwi enkwalambisa kunokubangela abantwana banxube.”
Imiphumo Yokuxinezeleka
Enoba uselula okanye ukhulile, enoba uxinezeleko onalo lubangelwa ziingxaki zasemsebenzini okanye zasesikolweni, uxinezeleko olungapheliyo lunokuyidodobalisa impilo yakho. Omnye umbhali ngezonyango uthi: “Ukuxinezeleka kufana nenqwelo-moya elungiselela ukusuka.” Ewe, xa uxinezelekile intliziyo yakho ibetha ngamandla kunyuke neblood pressure. Neswekile esegazini iyanyuka. Amadlala akhupha incidi yawo. Kwalo mbhali mnye uthi: “Xa uqhubeka uxinezelekile, onke amalungu omzimba wakho achaphazelekayo luxinezeleko (ingqondo, intliziyo, imiphunga, imithambo yegazi nezihlunu) asebenza ngamandla okanye acothe. Ekuhambeni kwexesha, oku kunokubangela umonakalo onganyangekiyo emzimbeni okanye engqondweni.” Zininzi ngendlela eyothusayo izigulo ezinokuthanani noxinezeleko: sisifo sentliziyo, istroke, ingxaki kwinkqubo yomzimba yokuzikhusela, umhlaza, imusculoskeletal disorders nesifo seswekile, xa sikhankanya nje ezimbalwa zazo.
Eyona nto ixhalabisayo yindlela engafanelekanga abantu abaninzi abahlangabezana ngayo noxinezeleko, ngokukodwa ulutsha. UGqr. Bettie B. Youngs uthi: “Kubuhlungu kakhulu ukufumanisa ukuba abakwishumi elivisayo baye babhenele kwizinto ezinjengokusebenzisa kakubi utywala neziyobisi, ukungayi rhoqo esikolweni, ubunjubaqa, ukuziphatha okubi ngokwesini, ubundlongondlongo nogonyamelo, ukubaleka ekhaya—nto ezo zibafaka kwiingxaki ezingaphezulu nakuloo ntlungu bebezama ukuyicima.”
Uxinezeleko yinxalenye yobomi bezi mini; alunakuphepheka ngokupheleleyo. Kodwa njengoko siza kubona kwinqaku elilandelayo, ininzi into esinokuyenza ukuze sikwazi ukulawula uxinezeleko!
[Amagama acatshulweyo akwiphepha 6]
‘Ndixinezeleke kangangokuba ingathi ndiza kusuka ndigqabhuke’
[Umfanekiso okwiphepha 5]
Abazali abangenamaqabane basoloko bexinezelekile
[Umfanekiso okwiphepha 6]
Isikolo sisenokubangela uxinezeleko oluninzi kulutsha