Uxinezeleko Indlela Olusichaphazela Ngayo
Kwenzeka ntoni xa uleqa ibhasi okanye uloliwe? Ngokuqinisekileyo uyayazi ukuba kwenzeka ntoni kuwe xa intliziyo yakho ibetha ngamandla ize impompe igazi elininzi. Enoba sikushiyile eso sithuthi ubusileqa, yona intliziyo yakho iphinda ibethe ngendlela eqhelekileyo uze uphefumle ngendlela oqhele ukuphefumla ngayo.
NOKO ke, kunokubakho umahluko xa unengxaki engapheliyo ekubangela ukuba uxinezeleke. Ukuxhalaba, ukuqina kwezihlunu, ukunyuka koxinezeleko lwegazi nenkqubo yokucola ukutya kusenokuthatha ithuba ngaphambi kokubuyela kwimo eqhelekileyo. Baya besanda abantu abathi akuze kuphele ukuxhalaba. Ngokomzekelo, baninzi abantu abakwimisebenzi abangayithandiyo yaye abayiboni iza kuphucuka imeko yayo. Uxinezeleko luwuchaphazela njani umzimba nempilo yakho?
Oko Kwenziwa Luxinezeleko Emzimbeni Wakho
UGqr. Arien van der Merwe uyichaza kakuhle into eyenzeka emzimbeni wakho xa uxinezelekile. Usebenza ngokukhawuleza uze “uvelise iincindi zemithambo-luvo nezamadlala eziye zityhutyhe umzimba wonke zibangele ukuba amalungu omzimba alungele nantoni na enokwenzeka.”
Ngoku ulungele ukwenza nantoni na, enoba inzima kangakanani. Zonke izivamvo zakho—kuquka esokubona, esokuva nesokuchukumisa—ziyasebenza. Ubuchopho bakho buye busebenze ngokukhawuleza, amadlala eadrenal akhupha incindi eshukumisa izihlunu, intliziyo, imiphunga namanye amalungu omzimba anokukunceda kwingxaki ekuxinezelayo.
Ngoko ke kwimeko yongxamiseko, into eyenziwa ngumzimba wakho inokubusindisa ubomi bakho, ngokomzekelo unokukuxelela ukuba usuke xa kusiza imoto. Kodwa ke, kubakho umahluko xa uxinezeleko lungabuyi mva.
Xa Uxinezeleko Lukuhlasela
Kuthekani ukuba usoloko uxhalabile? Izihlunu zakho zihlala ziqinile, intliziyo yakho iqhubek’ ibetha ngamandla, impompa igazi elininzi, kanti amafutha, iswekile, amachiza amadlala namanye amachiza aba maninzi egazini. Xa igazi lakho lihlala linaloo machiza—afuneka nje kuphela xa uza kusebenza nzima—linokuwonakalisa amalungu akho omzimba abalulekileyo. Ibe yintoni ke enokwenzeka?
Usenokuqala ukukhathazwa ngumqolo, intloko ebuhlungu, ukuqina kwezihlunu zentamo nezinye izihlunu. Oogqirha bathi ezo zinto zibangelwa kukuhlala uxinezelekile. Ukuhlala uxinezelekile kunokubangela ukuba ungakwazi ukusebenza kakuhle, kuphelise umdla wokwenza nantoni na kuze kubangele ukuba usoloko uxabana nabantu. Kunokubangela ukuba ube neengxaki zesisu. Kusenokubakho nezinye iingxaki ezithe chatha ezibangelwa luxinezeleko. Uxinezeleko olungapheliyo lunokuvuselela okanye lubangele istroke, isifo sentliziyo, ukuyeka kwezintso, ingxaki yemithambo yegazi nesifo seswekile.
Lo kaVan der Merwe ubhala athi: “Xa uxinezeleke ixesha elide, amadlala avelisa icortisol, nto leyo eyandisa amanqatha kumazantsi esisu nasemqolo.” Iingxaki zolusu ezifana ne-eczema, ipsoriasis zibangelwa okanye zivuselelwa luxinezeleko. Uxinezeleko olugqith’ emgceni lunokubangela udandatheko, ukuba ndlongondlongo nokudinwa kakhulu. Ingxaki yokulibala nokungakwazi ukunikel’ ingqalelo inokubangelwa luxinezeleko olungapheliyo. Inkqubo yokuzikhusela yomzimba womntu engasebenzi kakuhle ngenxa yoxinezeleko inokwenza umntu akhawuleze angenwe yingqele okanye abe nesifo somhlaza.
Uxinezeleko luchaphazela zonke iinkalo zobomi bethu—ingqondo, umzimba, iimvakalelo nobuhlobo bethu noThixo—ngoko ke kufuneka sikwazi ukumelana nalo. Kodwa asifuni ukuba side singaxinezeleki kwaphela. Kutheni kunjalo nje?
Uxinezeleko sinokulufanisa nehashe elidlamkileyo. Ungakuvuyela ukulikhwela. Kodwa xa lingalawuleki linokusenzakalisa. Ngendlela efanayo, xa sikwazi ukululawula uxinezeleko singonwaba, sikwazi ukucinga kakuhle, sisebenze, sibe nomdla wokwenza ezinye izinto size sibe sempilweni.
Kodwa sinokumelana njani noxinezeleko ukuze sonwabe ebomini? Inqaku elilandelayo lixubusha iindlela zokulawula uxinezeleko nokumelana nalo.
[Ibhokisi ekwiphepha 5]
‘SENZIWE NGOKUMANGALISAYO’ NGUMDALI OLUMKILEYO NONOTHANDO
Ngokwahlukileyo kwinto edla ngokuthethwa ngabantu abaninzi, into eyenziwa ngumzimba wethu xa uxinezelekile ayifani nendlela abantu bakudala ababezijonga ngayo izilwanyana ezikhulu ezifana nengwe enamazinyo abukhali. Kunoko uMdali uzenze ngobuchule iinkqubo ezintsonkothileyo zomzimba. Ngokomzekelo, igazi liba namahlwili nto leyo elinceda likwazi ukuphelisa iintsholongwane, lipholise izilonda yaye oko kungqina ukuba uMdali ulumkile yaye unothando.
Ezo nkqubo zingqina ukuba ‘senziwe ngendlela eyoyikekayo nemangalisayo.’ (INdumiso 139:13-16) Amalungiselelo kaThixo okomoya nawokwenyama asenzele wona kuba esithanda kwakunye nendlela emangalisayo abadale ngaye abantu ukuze baphile kakuhle, ayasiqinisekisa ukuba akuyi kubakho zintlungu, ukuzila okanye ukufa kwiParadesi esemhlabeni ezayo.—ISityhilelo 21:3-5.
[Umzobo/Umfanekiso okwiphepha 5]
(Ukuba ufuna inkcazelo ehlahlelwe kakuhle, yiya kwimpapasho)
IZINTO EZIBANGELWA LUXINEZELEKO OLUNGAPHELIYO
Intloko ebuhlungu
Ukutya amazinyo
Intamo ebuhlungu
Isifo sentliziyo
Iiulcers
Umqolo obuhlungu
Ukuqaqanjelwa zizihlunu