Unako Ukuhlangabezana Noxinezeleko!

“KULE minyaka yakutshanje kuya kusiba nzima ukusebenza, ukunyamekel’ intsapho nokuphumeza ezinye iimbopheleleko.” Itsho njalo incwadi esandul’ ukupapashwa ethetha ngobomi bentsapho. Ewe, siphila kumaxesha engcinezelo. Noko ke, akubothusi oku abafundi beBhayibhile ngenxa yokuba yaxela kwangaphambili ukuba la iya kuba ‘ngamaxesha amanqam ekunzima ukujamelana nawo.’—2 Timoti 3:1-5.

UJesús onabantwana abathathu uthi: “Uxinezeleko yinto eqhelekileyo. Ngoko ke, kufuneka uyazi indlela yokuhlangabezana nalo.” Kakade ke, kusenokuba lula ukuyithetha loo nto kodwa kube nzima ukuyenza. Sekunjalo, kukho amacebiso nemigaqo yeBhayibhile enokukunceda.

Ukuhlangabezana Noxinezeleko Lwasemsebenzini

Ngaba unxunguphele ngenxa yeemeko zendawo osebenza kuyo? Ukuhlala uthi cwaka kunokukwenza udandatheke ngakumbi. Njengoko iBhayibhile isitsho kwiMizekeliso 15:22, “amacebo ayatshitsha apho kungekho gqugula.”

Abantu abenza uphando ngoxinezeleko kwiindawo zempangelo bancomela ukuba “uthethe nomqeshi wakho: xa engazi ukuba kukho ingxaki, akanakukunceda.” Oku akuthethi kuthi kufuneka udubuleke ngomsindo. INtshumayeli 10:4 ithi: “Ukuzola kuthintela izono ezinzulu.” Thetha ngokuchubekileyo uphephe ukuxambulisana naye. Mhlawumbi ungatsho umncede umqeshi wakho abone ukuba xa abantu benganxunguphalanga emsebenzini banokwenza imveliso eninzi.

Eli cebiso linokuba luncedo nakwezinye iingxaki zasemsebenzini, njengeembambano neengxabano phakathi kwabasebenzi. Cinga ngeendlela ezifanelekileyo onokulungisa ngazo iingxaki ezinjalo mhlawumbi wenze nophando xa kuyimfuneko. Kukho amanqaku aliqela aye apapashwa kulo lindixesha anokukunceda.a Ukuba le ngxaki ibonakala ingalungiseki, kusenokuba bhetele ukuba ufune omnye umsebenzi.

Ukunciphisa Iingxaki Zemali

IBhayibhile inalo necebiso elinokukunceda uhlangabezane neengxaki zemali. UYesu Kristu wabongoza esithi: “Musani ukuxhalela imiphefumlo yenu mayela noko niya kukudla okanye oko niya kukusela, okanye imizimba yenu mayela noko niya kukunxiba.” (Mateyu 6:25) Kunokwenzeka njani oko? Ngokuzifundisa ukuba nentembelo yokuba uYehova uThixo uya kuzinyamekela iintswelo zakho ezisisiseko. (Mateyu 6:33) UThixo akathembisi into angenakuyenza. Izigidi zamaKristu namhlanje ziphila ngelo themba.

Kakade ke, ngokuphathelele imicimbi yemali kufuneka ube ‘nobulumko bobuqili.’ (IMizekeliso 2:7; INtshumayeli 7:12) IBhayibhile isikhumbuza oku: “Asingenanga nanto ehlabathini, ngoko ke asinakuphuma nanto. Ukuba sinesixhaso nesambatho, masaneliswe zezo zinto.” (1 Timoti 6:7, 8) Ukuzifundisa ukwaneliseka koko kuncinane sinako, kusengqiqweni yaye kuluncedo. Cinga ngoLeandro, ekwafuneka asebenzise iwheelchair emva kwengozi yenqwelo-mafutha. Yena kunye nenkosikazi yakhe bazama iindlela zokuphepha ukusafaza ngemali. ULeandro uthi: “Sizama ukunciphisa iindleko. Ngokomzekelo, xa kungekho mntu usebenzisa isibane, siyasicima ukuze siphungule iindleko zombane. Xa sisebenzisa inqwelo-mafutha siye sicwangcise kakuhle size siqabelise iingxaki ezahlukahlukeneyo ngaxeshanye ukuze sinciphise iindleko zepetroli.”

Abazali banokunceda abantwana babo ukuba babe nesimo sengqondo esifanelekileyo. UCarmen, intombi kaLeandro uthi: “Bendikuthanda ukusuka nje ndithenge into ebendingacebanga kuyithenga kodwa abazali bam baye bandinceda ndakwazi ukubona into eyimfuneko ngokwenene nento engabalulekanga. Ekuqaleni kwakunzima ukwenza uhlengahlengiso. Kodwa ndafunda ukwahlula phakathi kwento endibawela nje ukuba nayo nento endiyiswele ngokwenene.”

Unxibelelwano—Indlela Yokunciphisa Uxinezeleko

Ikhaya lifanele libe likhusi kodwa amaxesha amaninzi lidla ngokuba ngomnye wemithombo yoxinezeleko. Siyintoni isizathu soko? “Izibini . . . ezinento ethile engazonwabisiyo okanye ezo zinobundlongondlongo,” itsho njalo incwadi ethi Survival Strategies for Couples, “zithi eyona nto ibangela ukungabikho kwemvisiswano kukungabikho konxibelelwano.”

Imigaqo yeBhayibhile inokunceda izibini ziphucule ubuchule bazo bonxibelelwano. IBhayibhile ithi “kukho ixesha lokuthi cwaka nexesha lokuthetha” yaye “hayi indlela elilunge ngayo ilizwi elithethwa ngexesha elifanelekileyo!” (INtshumayeli 3:1, 7; IMizekeliso 15:23) Ukwazi oku kuya kukuthintela ekuthetheni imibandela enobuzaza xa iqabane lakho lidiniwe okanye kukho into elikhathazayo. Akungebi kuhle ukuba ulinde de kube lixesha elifanelekileyo—xa iqabane lakho likulungele ukuphulaphula?

Liyinyaniso elokuba xa izinto zingakhange zihambe kakuhle emsebenzini, kusenokungabi lula ukuzola nokuba nomonde. Kodwa yintoni enokwenzeka xa ukhuphela umsindo kwiqabane lakho lomtshato ngokulidlavula ngamazwi? IBhayibhile isikhumbuza ukuba “ilizwi elibangela intlungu linyusa umsindo.” (IMizekeliso 15:1) Ngokwahlukileyo koko, “linqatha lobusi amazwi athandekayo, amnandi emphefumlweni yaye ayimpiliso emathanjeni.” (IMizekeliso 16:24) Ngabantu abazimiseleyo ngokwenene abakwaziyo ukuthintela ukuba kungabikho ‘bukrakra bolunya nomsindo nengqumbo nokumemeza nokutshabhisa,’ xa bethetha ngezinto eziphathelele umtshato wabo. (Efese 4:31) Noko ke, ukwenjenjalo kuyingenelo. Izibini ezigcina imizila yonxibelelwano ivulekile, zinokuthuthuzelana yaye zikhuthazane. IMizekeliso 13:10 ithi: “Kwabo babhunga kunye kukho ubulumko.”b

Ingxaki Yonxibelelwano Phakathi Komzali Nomntwana

Ukunxibelelana nabantwana kulucelomngeni—ngokukodwa xa umntu engenaxesha. IBhayibhile ikhuthaza ukuba abazali bathethe nabantwana babo ngalo lonke ixesha ‘njengaxa behleli endlwini naxa behamba ngendlela.’ (Duteronomi 6:6-8) ULeandro uthi: “Ufanele ufune amathuba okuthetha nabantwana bakho. Xa ndikwinqwelo-mafutha nonyana wam, ndisebenzisa elo thuba ndincokole naye.”

Enyanisweni, asingabo bonke abazali abakufumanisa kulula ukunxibelelana nabantwana babo. UAlejandra onabantwana abathathu, uthi: “Ndandingakwazi ukubaphulaphula. Ukungabikho konxibelelwano oluhle kwakundicaphukisa yaye kwakundenza ndizive ndinetyala.” Umzali unokuphucula njani? Okokuqala “umele akhawuleze ukuva.” (Yakobi 1:19) UGqr. Bettie B. Youngs uthi: “Ukuphulaphula ngenyameko yeyona ndlela iluncedo ekunciphiseni uxinezeleko.” Umele unikele ingqalelo kwindlela ophulaphula ngayo. Mjonge emehlweni umntwana wakho. Kuphephe ukuzithabatha lula iingxaki zabantwana bakho. Khuthaza abantwana bakho ukuba bachaze indlela abavakalelwa ngayo. Buza imibuzo efanelekileyo. Ngalo lonke ixesha baxelele ukuba uyabathanda yaye unethemba lokuba baza kwenza okufanelekileyo. (2 Tesalonika 3:4) Thandaza kunye nabantwana bakho.

Ukugcina imizila yonxibelelwano ivulekile kufuna umgudu. Kodwa ukwenjenjalo kunokukunceda unciphise uxinezeleko entsatsheni yakho. Unxibelelwano lunokukunceda ukwazi ukubabona abantwana bakho xa bexinezelekile. Unokukwazi ukubanika ulwalathiso lobulumko xa uyiqonda indlela abavakalelwa ngayo neemeko abatyhubela kuzo. Okokugqibela, ukukhuthazwa kwabantwana ukuba bachaze indlela abavakalelwa ngayo kuya kubathintela ekwenzeni izenzo zobunjubaqa ngenxa yoxinezeleko.

Intsebenziswano—Indlela Ephumelelayo Yokwenza Imisebenzi Yekhaya

Xa umyeni nenkosikazi bephangela bobabini, ukunyamekela imisebenzi yekhaya kunokuba ngomnye unobangela woxinezeleko. Abanye oomama abasebenzayo bazinceda ngokwenza izinto zibe lula. Basenokubona ukuba abanakukwazi ukupheka izinto ezininzi. Khumbula icebiso likaYesu kwibhinqa elalizama ukwenza isidlo esikhulu: “Zizinto ezimbalwa, ezifunekayo, okanye inye kuphela.” (Luka 10:42) Ngoko yenza izinto zibe lula. Incwadi ethi The Single-Parent Family inikela eli cebiso: “Pheka isityu nokunye ukutya onokukupheka ngembiza enye ukuze ungabi namsebenzi mninzi wokucoca.” Ewe, ukwenza imisebenzi yekhaya ibe lula kunokulunciphisa uxinezeleko.

Sekunjalo, zisenokuba ninzi izinto ekufuneka uzenzile. Omnye umama ongumphangeli uthi: “Ngoxa ndandiselula ndandisenza yonk’ into. Njengoko iminyaka ihamba, kuya kusiba nzima. Iyavakala imiphumo yobomi obumaxhaphetshu ebendibuphila. Ngoko, intsebenziswano yawo onke amalungu entsapho ibonakalisa ukuba anovelwano yaye oko kuyandinceda ukuze ndingabi noxinezeleko olunzulu.” Ewe, ukuba onke amalungu entsapho ayancedisana, imisebenzi inokuphunyezwa ngaphandle kokuthwalisa umntu omnye uxanduva. Incwadi ethetha ngokuba ngumzali ithi: “Ukwabela abantwana imisebenzi yekhaya yenye yeendlela onokubanceda ngazo bahlakulele . . . ubuchule. Ukwenza imisebenzi yekhaya rhoqo kubangela ukuba umntu abe luncedo phakathi kwekhaya yaye abe nesimo sengqondo esifanelekileyo ngomsebenzi.” Ukuncedisana ngemisebenzi yekhaya kunokukunika nethuba lokuba kunye nabantwana bakho.

UJulieta oselula uthi: “Ndiyambona umama ukuba uyonwaba xa ndimphungulela umthwalo. Kuyandivuyisa oko yaye kundenza ndizive ndingumntu onokuthenjwa. Loo nto indenza ndilixabise ikhaya lam. Ukufunda ukwenza imisebenzi yekhaya kundibekele isiseko sekamva.” UMary Carmen ubalisa okufanayo: “Ukususela ebuntwaneni, abazali bethu basifundisa ukuzinyamekela. Oku kuye kwayingenelo kakhulu kuthi.”

Iindlela Ezifanelekileyo Zokuhlangabezana Noxinezeleko

Uxinezeleko yinto ekhoyo namhlanje; akunakuluphepha. Noko ke, ungafunda ukuhlangabezana nalo. (Bona ibhokisi ekwiphepha 10.) Ukulandela imigaqo yeBhayibhile kunokukunceda. Ngokomzekelo, ukuba kukho nto ethile ekukhathazayo, khumbula ukuba “kukho umhlobo onamathela ngokusondele ngakumbi kunomntakwenu.” (IMizekeliso 18:24) Thetha nomhlobo wakho oqolileyo okanye neqabane lakho lomtshato. URonald L. Pitzer osisazi ngezentlalo uthi: “Musa ukuyifihla indlela ovakalelwa ngayo. Zityand’ igila kumntu oqolileyo oza kuyiqonda kakuhle into oyithethayo nonenyameko.”

IBhayibhile ithetha ‘nangokuqhubana ngokunomvuzo nomphefumlo wakho.’ (IMizekeliso 11:17) Ewe, kuhle ukunyamekela iintswelo zakho. IBhayibhile ithi: “Kulunge ngakumbi ukuzalisa isandla ngokuphumla kunokuzalisa izandla zozibini ngomsebenzi onzima ngokusukelana nomoya.” (INtshumayeli 4:6) Ukuzinika ithuba lokunyamekela iintswelo zakho—nokuba yimizuzu nje embalwa kusasa, uphunge, ufunde, uthandaze okanye ucamngce useluxolweni—kunokuba luncedo kakhulu!

Enye into eluncedo kukulolonga umzimba ngendlela elungeleleneyo nokutya ukutya okusempilweni. Incwadi ethetha ngokuba ngumzali isikhumbuza oku: “Xa usebenzisa ixesha lakho elixabisekileyo namandla akho ekuzinyamekeleni, uyazihlaziya ngandlel’ ithile. . . . Ukuba uhlala uzibhokoxa ngalo lonk’ ixesha kufuneka uqiniseke ukuba uyazihlaziya kungenjalo uya kuzibhaqa sele ungenawo nasecepheni.”

Ngapha koko, iBhayibhile iyasinceda sihlakulele iimpawu eziyimfuneko ekuhlangabezaneni noxinezeleko, ‘njengomoya wobulali,’ umonde nobubele. (Galati 5:22, 23; 1 Timoti 6:11) Ngaphezulu, iBhayibhile isinika ithemba—isithembiso sehlabathi elitsha, apho zonke izinto ezibangela intlungu ebantwini ziya kube zingasekho! (ISityhilelo 21:1-4) Ngoko ke, kusengqiqweni ukuziqhelisa ukufunda iBhayibhile yonke imihla. Ukuba ufuna uncedo ekuqaliseni oku, amaNgqina kaYehova angakuvuyela ukukunceda, ngaphandle kwentlawulo.

Oku akuthethi kuthi umKristu akabi naluxinezeleko. Kodwa uYesu wathi unokukuphepha ‘ukusindwa ngamaxhala obomi.’ (Luka 21:34, 35) Kwakhona, ukuba uYehova uThixo umazi njengomhlobo, unokuba yindawo yakho yokusabela! (INdumiso 62:8) Unokukunceda ukwazi ukuhlangabezana neengxaki zobomi.

[Imibhalo esemazantsi]

[Amagama acatshulweyo akwiphepha 11]

“Ngoxa ndandiselula ndandisenza yonk’ into. Njengoko iminyaka ihamba, kuya kusiba nzima. Iyavakala imiphumo yobomi obumaxhaphetshu ebendibuphila”

[Ibhokisi/Imifanekiso ekwiphepha 10]

Indlela Yokunciphisa Uxinezeleko

◼ Phumla ngokwaneleyo suku ngalunye

◼ Yitya ngendlela elungeleleneyo. Kuphephe ukutya ngokugqithiseleyo

◼ Lolonga umzimba rhoqo, ngendlela elungeleleneyo, njengokuhamba ngokukhawuleza

◼ Ukuba kukho into ekukhathazayo, yixubushe nomhlobo wakho

◼ Chitha ixesha elininzi nentsapho yakho

◼ Yabelana namanye amalungu entsapho ngemisebenzi yekhaya

◼ Zazi izinto ongenakukwazi ukuzifikelela

◼ Zibekele usukelo olusengqiqweni; musa ukulindela ukwenza izinto ngendlela egqibeleleyo

◼ Yiba ngumntu olungeleleneyo uze uzenzele ucwangciso olusengqiqweni

◼ Hlakulela iimpawu zobuKristu njengobulali nomonde

◼ Zibekele ixesha elithile lokuba wedwa

[Umfanekiso okwiphepha 7]

Ukuxubusha ngeengxaki zakho nomqeshi wakho ngentlonelo, kunokulunciphisa uxinezeleko lwasemsebenzini

[Umfanekiso okwiphepha 8]

Abazali banokuxubusha nabantwana babo ngeendlela zokonga imali

[Umfanekiso okwiphepha 8]

Njengomntu oselula thetha ngezinto ezikukhathazayo nomntu onokukunceda

[Umfanekiso okwiphepha 8, 9]

Onke amalungu entsapho anokufak’ isandla kwimisebenzi yekhaya