Iintaba—Ziza Kukhuselwa Ngubani?
EBISHKEK eKyrgyzstan (kumbindi Asia) ngowama-2002 kwakukho intlanganiso iGlobal Mountain Summit eyathabatha iintsuku ezine. Le yayiyintlanganiso yokuqala enabameli abavela ehlabathini lonke neyayilungiselelwe ukusompa inyewe ephathelele iintaba. Abaququzeleli bayo babenethemba lokuba unyaka wama-2002 wawuya kuba “lithuba lokuqalisa kokuhlonelwa kweentaba.”
Abo babekule ntlanganiso bamkela i-“Bishkek Mountain Platform” uxwebhu lwemiyalelo yokunyamekela iintaba. Injongo yolu xwebhu ‘yayikukuphucula impilo yabantu abahlala ezintabeni, ukukhusela indalo nokubusebenzisa ngobulumko ubuncwane obufumaneka ezintabeni.’
Kuye kwenziwa inkqubela kulo mbandela. Ehlabathini lonke kuye kwamiselwa imiyezo karhulumente ukuze kukhuselwe imimandla emihle neendidi ngeendidi zezilwanyana zasendle nezityalo. Kwimimandla emininzi yehlabathi, amaqela akhusela indalo akwazile ukuthintela ukutshatyalaliswa kwendalo kwimimandla ethile. Elinye iphulo elingumphumo weMountain Summit yaseBishkek sisivumelwano sokucoca inkunkuma yenyukliya eyayilahlwe kwiintaba zaseKyrgyzstan. Le nkunkuma inetyhefu yayingcolisa amanzi abantu abanokuba ngama-20 ekhulwini kumbindi Asia.
Sekunjalo, kusekho iingxaki ezinkulu gqitha ngokukhuselwa kweentaba. Ngokomzekelo, ngowe-1995 amagosa aseKhanada amisa imithetho i-“Forest Practices Code” ukuze kukhuselwe amahlathi ashinyeneyo aseleyo eBritish Columbia. Sekunjalo, uphando olwenziwa emva koku lwabonisa ukuba iinkampani ezirhweba ngemithi zazingayithobeli le mithetho yaye zaziqhubeka zigawula imithi nakwezona ndawo zingamathambeka. Ngowe-1997, yarhoxiswa le mithetho ekubeni amashishini emithi athi iyacinezela.
Asilorhwebo lodwa oluyingxaki. Kumazwi okuqukumbela kwiBishkek Summit kwavunywa ukuba imfazwe, ubuhlwempu nendlala zifak’ isandla ekutshatyalalisweni kwendalo esezintabeni. Iintaba, nomhlaba uphela, uya kuqhubeka usengxakini de zonke iingxaki ezibangela ukutshatyalaliswa kwendalo ziconjululwe.
UThixo Uyikhathelele Indalo Yakhe
Phezu kwayo nje le ngxelo imbi, sinesizathu sokuba nethemba. UThixo uSomandla uyayibona into eyenzeka kwindalo yakhe. IBhayibhile ithi “zezakhe iincopho zeentaba.” (INdumiso 95:4) Kwakhona uzikhathalele izilwanyana ezihlala ezintabeni. Ngokutsho kweNdumiso 50:10, 11, uYehova uthi: “Zezam zonke izilwanyana zasendle ezisehlathini, amarhamncwa asezintabeni eziliwaka. Ndizazi kakuhle zonke izidalwa ezinamaphiko ezisezintabeni, nezilwanyana ezininzi ezisendle zikum.”
Ngaba uThixo unokukwazi ukusindisa indalo esengxakini? Ewe, unokukwazi! IBhayibhile ithi ‘umise ubukumkani obungenakuze bonakaliswe.’ (Daniyeli 2:44) UYesu Kristu, uMlawuli onyuliweyo kurhulumente wasezulwini unomdla okhethekileyo ngomhlaba nangabantu abahlala kuwo. (IMizekeliso 8:31) Ulawulo lwakhe luya kuzisa uxolo emhlabeni, luphelise konke ukuxhaphaza luze lulungise wonke umonakalo owenziwe emhlabeni.—ISityhilelo 11:18.
Ukuba ulangazelela ukuzibona zonke ezi ngxaki zipheliswa, ngokungathandabuzekiyo uya kuqhubeka uthandazela ukuba ‘ubukumkani bukaThixo bufike.’ (Mateyu 6:9, 10) Loo mithandazo iya kuphendulwa. Kungekudala uBukumkani bukaThixo buya kuphelisa konke okungekho sikweni buze bulungise wonke umonakalo kulo mhlaba. Xa oku kusenzeka, ngokufuziselayo iintaba ziya ‘kumemelela ngovuyo.’—INdumiso 98:8.