Ngubani UYesu Kristu?
IMBALI enokuthenjwa isichazela ukuba, kwiminyaka engaphezu kwama-2 000 eyadlulayo eBhetelehem, idolophana yakwaYuda, kwazalwa umntu ogama linguYesu. UHerode Omkhulu wayengukumkani eYerusalem ngelo xesha, wabe yena uKesare Agasto eyirhuluneli eRoma. (Mateyu 2:1; Luka 2:1-7) Ababhali-mbali bamaRoma beenkulungwane ezimbini zokuqala babengathethi nokuthetha ngoYesu, ekubeni abalawuli abangamaRoma belo xesha babezama ukuphelisa ubuKristu.
Kwelinye icala, iThe Historians’ History of the World ithi: “Kwanaxa siyijonga ngeliso elingelilo elonqulo, imisebenzi [kaYesu] yaba nemiphumo ebalasele ngakumbi embalini kunazo naziphi na izenzo zakhe nawuphi na omnye umntu owakha waphila. Ixesha elitsha embalini eliphawulekayo ngenxa yokuzisa kwalo impucuko ehlabathini, libalwa ukususela ekuzalweni kwakhe [uYesu].”
Iphephancwadi iTime lathi zininzi iincwadi ezibhalwe ngoYesu kunaye nawuphi na omnye umntu embalini. Uninzi lwezi ncwadi lugxininisa ngakumbi kumntu anguye ngokwenene uYesu. Lo ngumba ekuphikiswene ngawo kakhulu ezimbalini kunawo nawuphi na omnye.
Imibuzo Yaphambili Phayaa Ephathelele Umntu Anguye
Xa uMariya waxelelwa ukuba uza kuba nomntwana yaye ufanele amthiye igama lokuba nguYesu, wabuza: “Kuza kubakho njani na oku, ekubeni ndingenazintlobano zokwazana nandoda?” Ingelosi kaThixo, uGabriyeli yaphendula yathi: “Amandla Oyena Uphakamileyo aya kukusibekela. Ngenxa yeso sizathu kwanoko kuzalwayo kuya kubizwa ngokuba kungcwele, uNyana kaThixo.”—Luka 1:30-35.
Kamva, uYesu wenza imimangaliso eyashiya abapostile bakhe bethe khamnqa. Xa kwakubonakala ngathi isaqhwithi somoya omkhulu siza kusizikisa isikhephe kuLwandle lwaseGalili, uYesu wawazolisa amanzi ngokuwakhalimela esithi “Yithi tu! Uzole!” Bemangalisiwe, abapostile bakhe babuza: “Ngubani ngokwenene lo?”—Marko 4:35-41; Mateyu 8:23-27.
Imibuzo ephathelele umntu anguye ngokwenene uYesu yayixhaphakile phakathi kwabantu ababephila ngexesha lakhe, ngoko uYesu wabuza abapostile bakhe ukuba abantu babesithi ungubani na. Baphendula ngelithi: “Bambi bathi nguYohane umBhaptizi, abanye bathi nguEliya, ukanti abanye bathi nguYeremiya okanye ngomnye wabaprofeti”—bantu abo ababesele befile. Emva koko, uYesu wabuza: “‘Ke nina nithi ndingubani na?’ USimon Petros waphendula wathi: ‘UnguKristu, uNyana woThixo ophilayo.’” Kwaneedemon—iingelosi ezingendawo—zathi ngoYesu: “UnguNyana kaThixo.”—Mateyu 16:13-16; Luka 4:41.
Indlela UYesu Awazichaza Ngayo
Nakuba uYesu wayengafane azibize ngokuba nguNyana kaThixo, kodwa wayekwazi oko. (Marko 14:61, 62; Yohane 3:18; 5:25, 26; 11:4) Noko ke, ubukhulu becala wayezibiza ngokuba ‘unguNyana womntu.’ Xa wayezichaza ngolu hlobo, wayebethelela isibakala sokuba ezalwa ngabantu—engumntu ngokwenene. Ngenxa yoko, wazityhila ‘engunyana womntu’ owabonwa nguDaniyeli embonweni emi phambi koThixo uSomandla—“uNyangelemihla.”—Mateyu 20:28; Daniyeli 7:13.
Kunokuba athi yena unguNyana kaThixo, uYesu wayekela abanye ukuba batsho. Yaye nabantu abangengabo abapostile benjenjalo, kuquka uYohane umBhaptizi noMarta owayengumhlobo kaYesu. (Yohane 1:29-34; 11:27) Aba bantu babekholelwa ukuba uYesu unguMesiya othenjisiweyo. Babesazi ukuba wakha waphila ezulwini njengomntu womoya onamandla, yaye ubomi bakhe badluliselwa nguThixo ngokungummangaliso kwisibeleko sentombi enyulu uMariya.—Isaya 7:14; Mateyu 1:20-23.
Uyafana Nomntu Wokuqala, UAdam
UYesu wayefana ngeendlela ezininzi nomntu wokuqala, uAdam. Ngokomzekelo, bobabini babefezekile yaye bengazalwa ngubawo ongumntu. (Genesis 2:7, 15) Ngenxa yoko, iBhayibhile ithi uYesu ‘nguAdam wokugqibela’—indoda efezekileyo enokuba “yintlawulelo.” Ubomi bukaYesu babufana nobo ‘bomntu wokuqala uAdam,’ owadalwa nguThixo efezekile.—1 Korinte 15:45; 1 Timoti 2:5, 6.
IBhayibhile ithi uAdam wokuqala ‘ngunyana kaThixo.’ (Luka 3:38) Noko ke, uAdam waphulukana nelungelo elixabisekileyo lokuba ngunyana kaThixo ngenxa yokungamthobeli ngabom. Kwelinye icala, uYesu wayesoloko ethembekile kuYise wasezulwini yaye waqhubeka enguNyana othandwayo nguThixo. (Mateyu 3:17; 17:5) IBhayibhile ithi bonke abo banokholo kuYesu, bemamkela njengoMsindisi wabo, banokufumana ubomi obungunaphakade.—Yohane 3:16, 36; IZenzo 5:31; Roma 5:12, 17-19.
Kodwa, abanye baphikisa ngelithi uYesu akangoNyana kaThixo kodwa unguThixo ngokwakhe. Bathi yena noYise bangooThixo uSomandla. Ngaba banyanisile? Ngaba ngandlel’ ithile uYesu uyinxalenye kaThixo? Ngaba uYesu okanye omnye wababhali beBhayibhile wakha wayithetha loo nto? Ngubani kanye kanye okuphela koThixo wokwenyaniso? Yena uYesu wathi ngubani uThixo wokwenyaniso? Makhe sibone.
[Ibhokisi/Umfanekiso okwiphepha 16]
Akukho Mntu Waziwa Njengaye
Bane abantu ababephila ngexesha likaYesu ababhala ngobomi bakhe—uMateyu, uMarko, uLuka noYohane—ababini kubo ingabahlobo bakhe abasenyongweni. Iincwadi ezithiywe ngamagama abo zibizwa ngokuba ziincwadi zeVangeli yaye iinxalenye zazo ziguqulelwe ngeelwimi ezingaphezu kwamawaka amabini. Ngokuqhelekileyo, ezi ncwadi zincinane zidityaniswe nezinye ezibumba iBhayibhile. Ezi ncwadi zeVangeli—enoba zizodwa okanye ziyinxalenye yeBhayibhile—zisasazwe ngaphezu kwayo nayiphi na enye incwadi embalini. Akumangalisi ukuba, uYesu aziwe ngaphezu kwakhe nawuphi na omnye umntu owakha waphila!
[Umfanekiso okwiphepha 15]
Abapostile babuza ukuba, “ngubani ngokwenene lo?”