Ukutshintsha Ibala Lolusu—Ukususela Kwelimhlophe Ukusa Kwelintsundu
UMBONA ngantoni umntu osempilweni? Ngaba ngumntu onesiqu esihle nontsundu ngebala? Abemi abaninzi baseYurophu nabaseNtshona Merika bacinga njalo. Kodwa oku bekungasoloko kunjalo. Ngaphambili, amabhinqa aseYurophu ayenxiba iminqwazi emikhulu aze aphathe neambrela ukuze azikhusele elangeni. Xa umhlophe gqitha ngebala wawugqalwa njengesihandiba. Ukuba untsundu ngebala wawugqalwa njengomqeshwa.
Kanti phambili phayaa, kwakusetyenziswa izinto ezisele zigqalwa njengetyhefu mvanje ukwenza ulusu lube mhlophe. Ngokomzekelo, ngonyaka wama-400 B.C.E., amaGrike ayelwenza mhlophe ulusu lwawo ngomgubo welothe (lead carbonate). UPoppaea Sabina, umfazi woMlawuli waseRoma uNero, wayesebenzisa lo mgubo uyityhefu ukwenza ubuso bakhe bube mhlophe. Kwinkulungwane ye-16, amabhinqa athile angamaTaliyane ayesebenzisa iasidi ukuze abenze mhlophe ubuso bawo. Kodwa xa umenzi weempahla waseFransi uCoco Chanel ebutsheni beminyaka yee-1920 wakwenza kwayinto ethandwayo ukutshiswa lilanga de umntu abe ntsundu, yaye oku kwajongwa njengefashoni ngabantu abaninzi. Abantu bachitha ixesha elininzi behlel’ elangeni.
Phofu ke, asingabo bonke abantu abathanda ukuba phandle abafuna ukuba ntsundu. Abathandi kuzibhaka ngelanga. Bathanda nje ukuva ubushushu obumnandi bokubethwa lilanga, baze babethwe yimpepho emnandi yangaphandle kunokutshiswa lilanga luze ulusu lube ntsundu. Kutheni befanele balukhusele ulusu lwabo lungatshiswa lilanga?
[Umfanekiso okwiphepha 3]
Abantu abaselwandle ebutsheni benkulungwane yama-20
[Inkcazelo]
Brown Brothers