Ukuzibona Sele Ungasasebenzi!

“Xa ndaphulukana nomsebenzi wam, intliziyo yam yayiligazi. Kwakunga ndingathi, ‘Vuleka mhlaba ndingene. ‘”—UTony, waseJamani.

“Ndandingathi ndithwele umthwalo onzima. Njengomzali ongenaqabane, eyona nto yayindikhathaza yindlela endandiza kubondla ngayo abantwana bam ababini ndize ndihlawule amatyala am.”—UMary, waseIndiya.

“Yandikhathaza gqitha into yokuphulukana nomsebenzi, yaye eyona nto yayindixhalabisa kukungazi enoba ndakuwufumana na omnye.”—UJaime, waseMexico.

EHLABATHINI LONKE, izigidi ngezigidi zabantu zikwingxaki efana nekaTony, uMary, noJaime. Ngasekupheleni kwenkulungwane edluleyo, kwafunyaniswa ukuba i-10 ekhulwini labantu baseYurophu nakuMbindi Asia—bantu abo abamalunga nezigidi ezingama-23, bafuna umsebenzi. Kwamanye amazwe asakhasayo, abantu abangaphezu kwekota abaphangeli. EUnited States, “imisebenzi emalunga nezigidi ezisisi-2,6, iye yanyamalala kwezi nyanga zingama-28 zidluleyo,” yatsho njalo iThe New York Times ngoJulayi 2003.

Kumazwe amaninzi xa ubani efuna umsebenzi udibana nemiqobo emininzi. Ngokomzekelo, nyaka ngamnye inyambalala yabo baphumelele kwizikolo zamabanga aphakamileyo nakwanokholeji baphuma ngendlu ukuya kufuna umsebenzi. Ukongezelela, ukuba nesidanga okanye imfundo ethile ephakamileyo akusosiqinisekiso sokuba umntu uza kuwufumana umsebenzi awufunayo. Ngenxa yoko, sele kuyinto eqhelekileyo ukuba umntu atshintshatshintshe imisebenzi kaliqela ebudeni bokuphangela kwakhe. Abanye kuye kwafuneka benze umsebenzi ababengawufundelanga ngaphambili.

Ukuba uzibona sele ungasasebenzi, yintoni onokuyenza ukuze uphucule amathuba akho okufumana umsebenzi? Yaye xa sele uwufumene umsebenzi, unokuwulondoloza njani?