Imbono YeBhayibhile

Ngaba Ufanele Uyoyike IArmagedon?

YINTONI “iArmagedon”? Ngamafutshane nje, eli binzana libhekisela kwimeko apho abalawuli behlabathi behlanganisana nxamnye noThixo noBukumkani bakhe obulawulwa nguYesu Kristu. Kwincwadi yeBhayibhile yeSityhilelo, umpostile uYohane wabona umbono apho abalawuli behlanganisana nxamnye noThixo kwindawo yokomfuziselo ebizwa ngokuba yiArmagedon.

Igama elithi “Armagedon” livela kanye kuphela eZibhalweni, kodwa kutshanje lisetyenziswa ngokubanzi njengesafobe. Lisetyenziswa ukususela kwintlekele yenyukliya ukuya kutsho kwintsholongwane yekhompyutha. Iincwadi eziliqela ezihamba phambili ziye zathetha ngexesha lokuphela okanye ixesha laphambi kweArmagedon. Kuye kwathengiswa ngaphezu kwama-60 ezigidi zemibhalo zolunye ungcelele lweenoveli ezithetha ngalo mbandela kule minyaka ilishumi idluleyo.

Abanye abantu bayayoyika iArmagedon. Bavakalelwa kukuba abanqolobi, namazwe athanda imfazwe, okanye iintlekele ezingaphezu kwamandla abantu ziya kutshabalalisa ihlabathi, zishiye kungaphili nto emhlabeni. Abanye bakholelwa ukuba ngexesha elimisiweyo, ngomsindo, uThixo uya kutshabalalisa esi sijikelezi-langa sihlala kuso nazo zonke izinto ezikuso. Ziyoyikisa ngokwenene ezi zinto! Kodwa yiyiphi ingcamango echanileyo ephathelele “imfazwe yemini enkulu kaThixo uSomandla” iArmagedon?—ISityhilelo 16:14, 16.

Ngaba Umhlaba Uya Konakaliswa?

Akusayi kutshatyalaliswa wonke umntu eArmagedon. Sikwazi njani oko? IBhayibhile isiqinisekisa ngelokuba “uYehova uyakwazi ukubahlangula esilingweni abantu abanozinikelo lobuthixo, kodwa abantu abangengomalungisa ubagcinele imini yomgwebo ukuze banqunyulwe.” (2 Petros 2:9) Ngenxa yoko, sinokuqiniseka ukuba uThixo uya kuwalawula ngokugqibeleleyo amandla akhe angenakulinganiswa nanto. Kuphela ngabo bavukela ulongamo lukaThixo abaya kujamelana nomsindo wakhe eArmagedon. Akukho bantu baya kufa ngengozi.—INdumiso 2:2, 9; Genesis 18:23, 25.

IBhayibhile isixelela ukuba uThixo uya “konakalisa abo bawonakalisayo umhlaba.” (ISityhilelo 11:18) Lizicacele ke elokuba, uYehova uThixo akanazinjongo zakonakalisa isijikelezi-langa esiphila kuso. Kodwa, uya kususa ibutho labantu elingendawo elichasene nolawulo lwakhe. Oku kufana noko kwenzeka ngoNogumbe womhla kaNowa.—Genesis 6:11-14; 7:1; Mateyu 24:37-39.

‘Imini Ebangela Uloyiko’

Kuyavunywa ukuba, iziprofeto eziliqela zeBhayibhile neziphathelele intshabalalo ezayo ziyothusa. Ngokomzekelo, umprofeti uYoweli wathetha “ngemini kaYehova enkulu nebangela uloyiko.” (Yoweli 2:31) Izixhobo eziza kusetyenziswa nguThixo ziquka ikhephu, isichotho, inyikima, isifo esosulelayo, izantyalantyala zemvula ekhukulayo, imvula yomlilo nesalfure, isiphithiphithi esiya kubangela abantu babulalane, umbane nesibetho sokubola kwenyama.a (Yobhi 38:22, 23; Hezekile 38:14-23; Habhakuki 3:10, 11; Zekariya 14:12, 13) Yaye iBhayibhile ithetha ngokuphandle ngexesha apho abafileyo beya kuqungquluza phezu komhlaba, babe ngumgquba nokutya kweentaka nezinye izilwanyana. (Yeremiya 25:33, 34; Hezekile 39:17-20) Iintshaba zikaThixo ziya kunkwantya luloyiko ebudeni bale mfazwe.—ISityhilelo 6:16, 17.

Ngaba oku kuthetha ukuba abanquli abathobelayo boThixo oyinyaniso bafanele bankwantye ngenxa yeziganeko ezothusayo eziya kwenzeka eArmagedon? Akunjalo, kuba abakhonzi bakaThixo abasemhlabeni abayi kubandakanyeka kulo mlo. Ngaphezu koko, baya kukhuselwa nguYehova. Sekunjalo abanquli bokwenyaniso baya kusala bebamb’ ongezantsi yimbonakaliso eyoyikisayo yamandla kaThixo.—INdumiso 37:34; IMizekeliso 3:25, 26.

Noko ke, kuyacaca ukuba umpostile uYohane waphefumlelwa ukuze asinike esi siqinisekiso: “Unoyolo nabani na owagcinayo amazwi esiprofeto salo msongo,” kuquka isilumkiso esiphathelele iArmagedon. (ISityhilelo 1:3; 22:7) Ngaba ukho umntu onokuba noyolo xa ecinga ngeArmagedon? Kunokwenzeka njani oku?

UThixo Ukhupha Isilumkiso

Xa kusiza inkanyamba okanye isaqhwithi esinamandla, abasemagunyeni baye balumkise abantu ngenjongo yokusindisa ubomi babo. Kudla ngokubakho namapolisa phakathi kwaba, nathunyelwa nezilumkiso okanye angene kwizindlu ngezindlu ukuqinisekisa ukuba wonke umntu uyasiva esi silumkiso. Injongo yoku asikokoyikisa abantu kodwa kukubanceda ukuba bazisindise. Abantu abanengqiqo bayazamkela ezo zilumkiso yaye abazisoli ngokuthabatha amanyathelo.

Kunjalo ke nangesilumkiso sikaThixo esiphathelele ‘umoya osisaqhwithi’ ozayo weArmagedon. (IMizekeliso 10:25) UYehova usinikile iinkcukacha eziphathelele imfazwe yakhe kwiLizwi lakhe. Akananjongo yakusoyikisa kodwa kukusilumkisa kuselithuba ukuze abantu baguquke bamkhonze ngokuzimisela. (Zefaniya 2:2, 3; 2 Petros 3:9) Abo bathabatha elo nyathelo baya kusinda. Kodwa ke, akuyomfuneko ukuba sinkwantyiswe yimfazwe kaThixo ezayo. Kunoko, sinokukhangela phambili kwikamva sithembe ukuba ‘wonk’ ubani obiza egameni likaYehova uya kusindiswa.’—Yoweli 2:32.

[Umbhalo osemazantsi]

[Umfanekiso okwiphepha 12]

Xa kusiza isaqhwithi esinamandla, abasemagunyeni bakhupha izilumkiso ukuze basindise ubomi

[Umfanekiso okwiphepha 13]

Isigidimi sikaThixo esilumkisayo esiphathelele iArmagedon sisikhuthaza ukuba sisindise ubomi bethu