IArmagedon—Bathini Abanye Ngayo?

“Babahlanganisela endaweni ekuthiwa ngesiHebhere yiArmagedon.”—ISITYHILELO 16:16, IBhayibhile yesiXhosa.

UCINGA ngantoni xa usiva igama elithi “Armagedon”? Mhlawumbi ucinga ngentlekele enkulu. Nangona eli gama livela kanye kuphela eBhayibhileni, lisoloko lisematheni kumajelo eendaba nakwiinkokeli zonqulo.

Ngaba le ndlela ichazwa ngayo iArmagedon iyavisisana noko kufundiswa yiBhayibhile? Kubalulekile ukuyazi impendulo. Ngoba? Kuba inyaniso ngokuphathelele iArmagedon inokukunceda ungaphakuzeli, ukhangele phambili kwikamva, ize iphembelele nendlela omjonga ngayo uThixo.

Khawucinge ngale mibuzo mithathu, uze uthelekise izinto ezidla ngokuthethwa ngeArmagedon noko kufundiswa yiBhayibhile.

1. NGABA IARMAGEDON YINTLEKELE EBANGELWA NGABANTU?

Ngokuqhelekileyo, iintatheli nabaphandi bathi “iArmagedon” yintlekele ebangelwa ngabantu. Ngokomzekelo, Imfazwe yeHlabathi yoku I neye II kudla ngokubhekiselwa kuzo njengeArmagedon. Emva kwezo mfazwe, abantu baxhalatyiswa kukuba iUnited States neSoviet Union ziza kuhlaselana ngezixhobo zenyukliya. Amajelo eendaba ayesithi loo ntlekele iya kuba “yiArmagedon yenyukliya.” Namhlanje, abaphandi boyikisela ukuba ukungcoliswa komhlaba kuza kubangela iinguqu ezinkulu kwimozulu yaye balumkisa ngokuba kungekudala kuza kubakho “iArmagedon ebangelwa yimozulu.”

Oko kuboniswa yingcaciso yabo: Ikamva lomhlaba nelezinto eziphila kuwo lixhomekeke kubantu. Ukuba oorhulumente bayasilela ukwenza ngobulumko, umhlaba uya konakala ngonaphakade.

Oko kufundiswa yiBhayibhile: UThixo akayi kubavumela abantu bawonakalise umhlaba. IBhayibhile iyasiqinisekisa ukuba uYehovaa ‘akawudalelanga ilize umhlaba.’ Kunoko, wawubumba “ukuba umiwe.” (Isaya 45:18) Kunokuba avumele umhlaba ukuba utshatyalaliswe ngabantu, uThixo uya ‘kubonakalisa abo bawonakalisayo umhlaba.’—ISityhilelo 11:18.

2. NGABA IARMAGEDON YINTLEKELE YEMVELO?

Maxa wambi abacholacholi beendaba basebenzisa igama elithi “Armagedon” xa bethetha ngeentlekele ezinkulu zemvelo. Ngokomzekelo, kunyaka wama-2010, enye ingxelo yathetha “‘ngeArmagedon’ yaseHaiti.” Yathetha ngokubandezeleka, ngomonakalo, nangokufa kwabantu ngenxa yenyikima enkulu eyahlasela elo lizwe. Abacholacholi beendaba neemuvi abalisebenzisi eli binzana kwiintlekele esele zenzekile kodwa nakwezo boyikela ukuba ziseza kwenzeka. Nanku umzekelo, basebenzisa eli gama ukuchaza umonakalo abacinga ukuba uza kubangelwa ngamatye abhabha emajukujukwini aza kuntlitha umhlaba.

Oko kuboniswa yingcaciso yabo: IArmagedon yintlekele engalawulekiyo etshabalalisa nabantu abamsulwa. Akukho nto ingako unokuyenza ukuze uzikhusele kuyo.

Oko kufundiswa yiBhayibhile: IArmagedon asiyontlekele engalawulekiyo. Endaweni yoko, ngabantu abangendawo kuphela abaza kubulawa yiyo. IBhayibhile ithembisa ukuba kungekudala ‘akazukubakho ongendawo, uya kuyikhangela indawo yakhe, abe engekho.’—INdumiso 37:10.

3. NGABA UTHIXO UZA KUWUTSHABALALISA UMHLABA EARMAGEDON?

Abantu abaninzi abahamba inkonzo bakholelwa ukuba kuza kubakho umlo phakathi kokulunga nobubi okuya kuphumela ekutshatyalalisweni komhlaba wethu. Uhlolisiso olwenziwe eUnited States yiPrinceton Survey Research Associates lufumanise ukuba ama-40 ekhulwini abantu abadala ekwenziwe kubo olu hlolisiso bakholelwa ukuba ihlabathi liza kutshatyalaliswa “kwidabi laseArmagedon.”

Oko kuboniswa yimfundiso yabo: Ifundisa ukuba abantu babengadalelwanga ukuphila emhlabeni ngonaphakade, ngokunjalo nomhlaba wawungenzelwanga ukuba uhlale ukho. UThixo wabadala abantu enenjongo yokuba ze bafe ngenye imini.

Oko kufundiswa yiBhayibhile: IBhayibhile itsho ngokucacileyo ukuba uThixo “Useke umhlaba phezu kweendawo omiswe kuzo; Awuyi kushukunyiswa ukusa kwixesha elingenammiselo, okanye nangonaphakade.” (INdumiso 104:5) Mayela nabantu abaphila kuwo, iBhayibhile ithi: “Amalungisa aya kuwudla ilifa umhlaba, ahlale kuwo ngonaphakade.”—INdumiso 37:29.

Kucacile, iBhayibhile ayivisisani nendlela eqondwa ngayo iArmagedon. Ngoko ke, yiyiphi inyaniso?

[Umbhalo osemazantsi]