Ekugqibeleni—Bonke Baya Kuba Nezindlu Ezisemgangathweni!
NGAPHANDLE kweNairobi, eKenya, kukho indawo ebiyelweyo ezihektare ezingama-56 nenezakhiwo zeUnited Nations Gigiri, kukwakho nekomkhulu leUN-HABITAT. Le ndawo ibonisa ukuzinikela kwamanye amazwe ukucombulula ingxaki yehlabathi lonke yokungabi nandawo yakuhlala. Xa uhamba kwiGigiri Nature Trail, ubona oko kunokuphunyezwa xa abantu besenza umgudu yaye bexhaswa ngemali. Le ndawo ngaphambili yayizele zizinto ezimdaka, yalungiswa yantle, yayindawo yokuzihlaziya yabo baphangela apho kuquka neendwendwe.
Noko ke, kwiikhilomitha nje ezimbalwa, kukho amatyotyombe asandul’ ukwakhiwa, yaye kusakhiwa namanye. Oku kubonisa indlela ekunzima ngayo ukucombulula le ngxaki yokungabi namakhaya. Izindlu ezakhiwe ngodaka, ngezinti, namazinki, zizikwemitha ezili-16 ubukhulu. Iindledlana phakathi kwazo zinamanzi amdaka nanukayo. Abahlali bahlawula imali ephindaphindwe kahlanu kunaleyo ihlawulwa ngabantu abaqhelekileyo abahlala eUnited States. Inkoliso yabantu abamalunga nama-40 000 abahlala apho baphakathi kweminyaka engama-20 nama-30 ubudala. Abangomavila. Beze apho kuba befuna umsebenzi eNairobi.
Ngokwahlukileyo koko, iinkokeli zehlabathi zidibene ngeentloko kwindawo ecocekileyo, enento yonke, nentle, kuxoxwa ngekamva lamadoda, amabhinqa, nabantwana abangamahlwempu abahlala apha kufuphi. Ngokutsho kukasosiba-jikelele weZizwe Ezimanyeneyo, okubuhlungu kukuba “ihlabathi linayo imali, linokukwazi ukuyiphelisa le ngxaki yaye linawo namandla” okuphucula ubomi babantu abahlala ematyotyombeni. Yintoni ekufuneka yenziwe? UMnu. uAnnan uqukumbela ngokuthi: “Ndinethemba lokuba . . . bonke abantu abakule ngxaki [baza] kumelana nokungakhathali nokusilela kukarhulumente okuye kwabangela ukuba le ngxaki ingaconjululwa.”
Noko ke, angakanani amathuba okuba oko kwenzeke? Yintoni efunekayo ukuze abezopolitiko bamazwe ngamazwe, nabasekuhlaleni bayeke ukugxininisa kwizinto abanomdla kuzo kodwa kunoko bafune isicombululo sale ngxaki? Kukho umntu Othile onazo izinto, indlela, namandla okuphelisa le ngxaki. Okubaluleke ngakumbi kukuba uyathanda yaye uzimisele ukukwenza oko. Urhulumente wakhe sele eyichazile indlela aza kuyiphelisa ngayo ngokupheleleyo le ngxaki yehlabathi lonke.
Ukwakhiwa Kwezindlu Ezintsha
EBhayibhileni, uMdali wethu uYehova uThixo uchaza oko aza kukwenza. Uthembisa esithi: “Ndidala amazulu amatsha nomhlaba omtsha.” (Isaya 65:17) Oko kuya kubangela iinguqulelo ezinkulu. “Amazulu” amatsha ngurhulumente oya kwenza izinto oorhulumente babantu abangakwazanga ukuzenza. UBukumkani bukaThixo, okanye urhulumente, usiqinisekisa ngempilo entle, unqabiseko, nokuzihlonela kwebutho labantu elitsha eliza kuphila emhlabeni. Ngaphambilana, uIsaya waxelelwa ukuba abo baza kuba ngamalungu ebutho labantu elitsha emhlabeni baza kuhlanganiswa “ekupheleni kwemihla.” (Isaya 2:1-4) Oku kuthetha ukuba ezi nguqulelo sele zisemnyango.—Mateyu 24:3-14; 2 Timoti 3:1-5.
Okuphawulekayo kukuba, kumazwi abhalwe kwezinye zeendinyana zikaIsaya isahluko 65, ngokukhethekileyo uThixo ulungiselele izindlu eziya kuhlala zihleli zabantu bonke ngelo xesha. Uthi: “Ngokuqinisekileyo baya kwakha izindlu baze bahlale. Abayi kwakha kuhlale abanye.” (Isaya 65:21, 22) Khawufan’ ucinge ekugqibeleni unendlu esemgangathweni, uhlala kwindawo ecocekileyo yaye ukhuselekile eparadesi! Ngubani ongafuniyo ukuhlala kwindawo enjalo? Kodwa sinokuqiniseka njani ngoko uThixo akuthembisileyo?
Isithembiso Esiqinisekileyo
Ekuqaleni xa uThixo wadala uAdam noEva, akazange abashiye nje. Kunoko, babehlala kumyezo wase-Eden, ipaki entle enomoya ococekileyo, amanzi nokutya okuyintabalala. (Genesis 2:8-15) UAdam waxelelwa ukuba ‘awuzalise umhlaba’ kungekhona ukuba uxinane. (Genesis 1:28) Ukususela ekuqaleni, injongo kaThixo yayikukuba abantu banandiphe uxolo, imvisiswano, nezinto ezininzi ezilungileyo.
Kamva ngemihla kaNowa, ibutho labantu lalizaliswe lugonyamelo nokuziphatha okubi, ngoko ke “umhlaba wawonakele emehlweni oThixo oyinyaniso.” (Genesis 6:11, 12) Ngaba uThixo wayibetha ngoyaba loo meko yelo hlabathi? Akunjalo. Wakhawuleza wathabatha amanyathelo. Wawucoca umhlaba wonke ngokuzisa uMkhukula, ngenxa yegama lakhe nangenxa kaNowa olilungisa nenzala yakhe. Ngoko ke, xa uNowa waphumayo emkhombeni ephumela kwikhaya lakhe elitsha, kwaphinda kwathiwa qhamani “nande niwuzalise umhlaba.”—Genesis 9:1.
Kamva, uThixo wanika amaSirayeli ilifa awayelithembise ukhokho wabo uAbraham. Elo Lizwe Lesithembiso lachazwa ‘njengelizwe elilungileyo neliphangaleleyo, ilizwe eliqukuqela ubisi nobusi.’ (Eksodus 3:8) Ngenxa yokungathobeli kwawo, amaSirayeli abhadula entlango kangangeminyaka engama-40 engenayo indawo esisigxina yokuhlala. Sekunjalo ethembekile kwisithembiso sakhe, uThixo ekugqibeleni wawanika ilizwe awayeza kuhlala kulo. Ingxelo ephefumlelweyo ithi: “UYehova wabanika ukuphumla entweni yonke . . . Akukho sithembiso sasilelayo kuzo zonke izithembiso ezilungileyo uYehova awayezenzile kwindlu kaSirayeli; zonke zaba yinyaniso.”—Yoshuwa 21:43-45.
Ukuba Nendlu Ekugqibeleni!
Ngoko ke, icacile into yokuba amazwi kaYehova akuIsaya isahluko 65 akazozithembiso nje ezililize. NjengoMdali wezinto zonke, ngokuqinisekileyo unawo amandla okwenza nantoni na efunekayo ukucoca umhlaba aze azalisekise injongo yakhe yantlandlolo ngawo. (Isaya 40:26, 28; 55:10, 11) Ukongezelela, iBhayibhile isiqinisekisa isithi uyafuna ukwenjenjalo. (INdumiso 72:12, 13) Ngaphambili uye wabanika abantu bakhe abangamalungisa izindlu ezisemgangathweni, yaye uza kuphinda kungekudala akwenze oko.
Xa uNyana wakhe, uYesu Kristu wayesemhlabeni, ngokukhethekileyo wafundisa abalandeli bakhe ukuba bathandazele ‘ukuthanda kukaThixo kwenzeke emhlabeni njengasezulwini.’ (Mateyu 6:10) Wabonisa ukuba umhlaba uya kuba yiparadesi. (Luka 23:43) Cinga nje indlela okuya kuba ngayo oku. Amatyotyombe aza kube engekho, akukho bantu baza kulala ezitratweni, okanye bakhutshwe ezindlwini zabo. Hayi indlela ekuya kuba mnandi ngayo ngelo xesha! Xa kulawula uBukumkani bukaThixo, ekugqibeleni wonke umntu uya kuba nendawo yokuhlala!
[Ibhokisi ekwiphepha 26]
IZINDLU ZAMANDULO ZAMASIRAYELI
AmaSirayeli, njengamaKanana awayephila ngaphambi kwawo, ayethanda izindlu ezakhiwe ngamatye, kuba ezo zakhiwo zazomelele yaye zaziwakhusela kubaphangi. (Isaya 9:10; Amosi 5:11) Noko ke, kwimimandla esemazantsi kwakusetyenziswa izitena zodaka okanye ngamanye amaxesha izitena ezitshisiweyo xa kusakhiwa udonga lwendlu. Izindlu ezininzi zaziba ziflethi, ezinye zaziba negumbi eliphezulu. Kwakukho ionti entendelezweni yaye kwezinye kwakubakho iqula okanye itanki.—2 Samuweli 17:18.
Umthetho kaMoses wawunemithetho eliqela ngendlela izindlu ezifanele zakhiwe ngayo. Ukhuseleko yeyona nto yayibalulekile. Emacaleni ophahla lwendlu eyiflethi kwakufanele kwakhiwe ungqameko ukuze kuthintelwe ingozi. Umthetho weshumi walumkisa amaSirayeli ukuba elowo anganqweneli indlu yedlelane lakhe. Nabani na ofuna ukuthengisa indlu yakhe, wayenelungelo lokuphinda ayithenge, ubuncinane kangangexesha elithile.—Eksodus 20:17; Levitikus 25:29-33; Duteronomi 22:8.
Indlu kwaSirayeli yayiyindawo ebalulekileyo yokufundisa izinto zokomoya. Ngokukhethekileyo iintloko-ntsapho zayalelwa ukuba zifundise oonyana bazo imiyalelo kaThixo xa zihleli endlwini, yaye zazingafanele zibe nezinto ezinento yokwenza nonqulo zithixo ezindlwini zazo.—Duteronomi 6:6, 7; 7:26.
[Umfanekiso]
KuSirayeli wamandulo, amakhaya ayesetyenziselwa izinto zokomoya, njengokubhiyozela uMthendeleko Weminquba
[Ibhokisi/Umfanekiso okwiphepha 28]
IZINDLU ZAMANDULO
IBhayibhile ayithethi nto ngokuba indoda yokuqala uAdam, yayihlala endlwini. Noko ke, iGenesis 4:17 ithi uKayin “wakha isixeko waza wasithiya eso sixeko ngegama lonyana wakhe uEnoki.” Kusenokwenzeka ukuba eso sixeko, ngokomgangatho wanamhlanje, yayiyidolophana nje encinane ebiyelwe ngeendonga. Uhlobo lwezindlu ababehlala kuzo aluchazwanga kule ngxelo. Mhlawumbi kule dolophana kwakuhlala amalungu entsapho kaKayin kuphela.
Iintente yayizizindlu eziqhelekileyo ezazisetyenziswa kumaxesha angaphambili. Omnye wenzala kaKayin uYabhali ubizwa ngokuba “ngunozala wabo bahlala ezintenteni nabanemfuyo.” (Genesis 4:20) Kwakuye kube lula ukugxumeka intente nokufuduka kunye nayo.
Ekuhambeni kwexesha, ngenxa yempucuko izixeko zazaliswa zizindlu ezikumgangatho ophakamileyo. Ngokomzekelo, isixeko saseUre, apho usolusapho uAbram (UAbraham) wayekhe wahlala khona, kwafunyanwa amabhodlo anamagumbi ali-13 okanye ali-14 atyatyekiweyo aza akalikwa, nto leyo ebonisa ukuba abantu ababehlala apho babehlala kwizindlu ezisemgangathweni. Ezo zindlu zazintle gqitha yaye abanye abantu basenokuba babekunqwenela ukuba nazo.
[Umfanekiso okwiphepha 24, 25]
UThixo uthembisa amalungisa izindlu ezikhuselekileyo