Imbono YeBhayibhile

Ngaba Mnye Kuphela UThixo Oyinyaniso?

UMOLEKI, uAshtoreti, uBhahali, uDagon, uMerodaki, uZeyus, uHermes, noArtemis ngoothixo noothixokazi abakhankanywa ngamagama eBhayibhileni. (Levitikus 18:21; ABagwebi 2:13; 16:23; Yeremiya 50:2; IZenzo 14:12; 19:24) Noko ke, nguYehova kuphela iZibhalo ezimbiza ngokuba nguThixo uSomandla. Kwingoma yoloyiso, uMoses wakhokela abantu bakhe becula ingoma ethi: “Ngubani na onjengawe phakathi koothixo, Yehova?”—Eksodus 15:11.

Kuyacaca ukuba, eBhayibhileni kuthiwa uYehova unamandla kunabo bonke abanye oothixo. Kodwa aba thixo bangenamandla banayiphi indima? Ngaba bona nabanye oothixo abaninzi abaye banqulwa ukutyhubela imbali bangoothixo bokwenene abazithoba kuThixo uSomandla, uYehova?

UThixo Wasemaphupheni

IBhayibhile imchaza uYehova njengokuphela koThixo oyinyaniso. (INdumiso 83:18; Yohane 17:3) Umprofeti uIsaya wabhala amazwi awathethwa nguThixo xa wathi: “Phambi kwam akuzange kuyilwe Thixo, nasemva kwam akubangakho namnye. Mna—ke, ndinguYehova, yaye akukho msindisi ngaphandle kwam.”—Isaya 43:10, 11.

Bonke abanye oothixo abanamandla kunoYehova. Kwinkoliso yeemeko abaphili—bayinto nje ethelekelelwa ngabantu. IBhayibhile xa ibhekisela kwaba thixo ithi ‘bayimveliso yezandla zomntu . . . , ababoni, abeva, abadli, okanye abajoji.’ (Duteronomi 4:28) IBhayibhile ifundisa ngokucacileyo ukuba uYehova ukuphela koThixo oyinyaniso.

Akumangalisi ukuba iZibhalo zisilumkisa ngokungqongqo ukuba singanquli nabaphi na abanye oothixo kunoko sinqule uYehova. Ngokomzekelo, iMithetho yokuqala Elishumi eyanikwa uMoses, uhlanga lwamandulo lwakwaSirayeli lwaxelelwa ukuba linganquli nabaphi na abanye oothixo. (Eksodus 20:3) Kwakutheni ukuze kubekwe loo mthetho?

Okokuqala, ukunqula uthixo ongekhoyo kukumnyol’ esweni uMdali. IBhayibhile ithi ngabanquli boothixo bobuxoki “bananisa inyaniso kaThixo ngobuxoki, behlonela yaye benikela inkonzo engcwele kwindalo kunakuLowo wadalayo.” (Roma 1:25) Amaxesha amaninzi aba thixo benziwe ngezinto ezidalwe nguThixo, njengesinyithi okanye umthi. Oothixo abaninzi banxulunyaniswa nezinto zendalo njengeendudumo, ulwandle nomoya. Ngokuqinisekileyo ke ngoko, ukunqula oothixo abanjalo kubonisa phandle ukuba asimhloneli uThixo uSomandla.

KuMdali, oothixo bobuxoki nezithixo bayinto elizothe. Kanti uThixo akakholiswa ngokukodwa ngabantu ababenzayo oothixo bobuxoki. Indlela abajonga ngayo uyichaza ngokuphandle kula mazwi athi: “Izithixo zeentlanga yisilivere negolide, umsebenzi wezandla zomntu wasemhlabeni. Zinomlomo, kodwa azithethi; zinamehlo, kodwa aziboni; zineendlebe, kodwa aziva. Akukho moya emlonyeni wazo. Abo bazenzayo baya kuba njengazo, wonk’ ubani okholosa ngazo.”—INdumiso 135:15-18.

IBhayibhile inesinye isizathu ngokusilumkisa ngokungqongqo ukuba singanquli nabani na okanye nantoni na ngaphandle koYehova uThixo. Unqulo olunjalo yinkcitha xesha kwaye lulilize. Umprofeti uIsaya wayechan’ ucwethe xa wayesithi: “Ngubani na oyile uthixo okanye otyhide umfanekiso oqingqiweyo? Akubanga yingenelo konke konke oko.” (Isaya 44:10) Kwakhona iBhayibhile ithi: “Bonke oothixo bezizwana bangoothixo abangenaxabiso.” (INdumiso 96:5) Oothixo bobuxoki abanto yanto, yaye ukunqula into engekhoyo kulilize.

UYesu, Iingelosi, NoMtyholi

Maxa wambi iZibhalo ziye zibhekise ebantwini ngokuthi bangoothixo. Noko ke, xa lihlolisiswa kakuhle ibinzana elithi “thixo” kufunyaniswa ukuba eli binzana alibhekiseli kwaba bantu njengoothixo. Kunoko, ngolwimi lwantlandlolo iBhayibhile eyabhalwa ngalo, ibinzana elithi “thixo” lalikwasetyenziswa ukuchaza umntu onegunya okanye umntu onento yokwenza noThixo uSomandla.

Ngokomzekelo, ezinye iindinyana zeBhayibhile zithetha ngoYesu Kristu zithi nguthixo. (Isaya 9:6, 7; Yohane 1:1, 18) Ngaba oko kuthetha ukuthi uYesu ufanele anqulwe? UYesu ngokwakhe wathi: “NguYehova uThixo wakho omele umnqule, yaye nguye yedwa omele unikele inkonzo engcwele kuye.” (Luka 4:8) Licacile elokuba, nangona uYesu enamandla yaye enobuntu obufana nobukaThixo, iBhayibhile ayithi ufanele anqulwe.

Kwakhona iingelosi kubhekiselwa kuzo ‘njengoothixo.’ (INdumiso 8:5; Hebhere 2:7) Sekunjalo, iZibhalo azisikhuthazi ukuba sinqule iingelosi. Enyanisweni, ngesinye isihlandlo, umpostile uYohane owayesaluphele nowamangaliswa kukubona ingelosi waguqa ngamadolo wayinqula. Noko ke, ingelosi yathi: “Lumka! Ungakwenzi oko! . . . Nqula uThixo.”—ISityhilelo 19:10.

Umpostile uPawulos wamchaza uMtyholi ‘njengothixo wale nkqubo yezinto.’ (2 Korinte 4:4) ‘Njengomlawuli weli hlabathi,’ uMtyholi uye wakhuthaza ukunqulwa koothixo bobuxoki. (Yohane 12:31) Ngoko ke, xa unqula oothixo abenziwe ngabantu, unqula uSathana. Kodwa uSathana akangothixo esifanele simnqule. Uzinyulile njengomlawuli, ngumrhwaphilizi. Ekugqibeleni, yena uya kutshatyalaliswa kuquka nazo zonke iintlobo zonqulo lobuxoki. Xa oko kusenzeka, bonke abantu—ewe, yonk’ indalo—iya kuyiqonda ngonaphakade into yokuba uYehova ukuphela koThixo oyinyaniso nophilayo.—Yeremiya 10:10.

NGABA WAKHA WAZIBUZA?

◼ IBhayibhile ifundisa ntoni ngokunqula abanye oothixo?—INdumiso 135:15-18.

◼ Ngaba uYesu neengelosi bafanelwe banqulwe njengoothixo?—Luka 4:8.

◼ Ngubani ekuphela koThixo oyinyaniso?—Yohane 17:3.

[Imifanekiso ekwiphepha 28, 29]

Imifanekiso ukususela ekhohlo ukusa ekunene: nguMariya, eItali; nguMaya uthixo wombona, eMexico nakuMbindi Merika; nguAshtoreti, eKanana; uthixo wamakhubalo, eSierra Leone; ngamaBhuda, eJapan; eChicomecóatl, ama-Aztec, eMexico; ukhetshe uHorus, eYiputa; uZeyus, eGrisi

[Inkcazelo]

Uthixo wombona, ukhetshe uHorus, noZeyus: Lo mfanekiso uthatyathwe yiBritish Museum