Ngaba Uya Kuba Lingqina LoThixo Oyinyaniso?
“Ningamangqina am, utsho uYehova, ukuba ndinguThixo.”—ISAYA 43:12.
1. Kutheni simele sihlonele uThixo oyinyaniso?
KUNGETHUBA lide nje ngaphambi kokuba uYesu afe, “wawaphakamisa amehlo akhe wakhangela ezulwini” ukuze athandaze. Wambiza Lowo wayethandaza kuye ‘njengokuphela koThixo oyinyaniso.’ (Yohane 17:1, 3) Kusengqiqweni ukuba, kunokubakho uThixo omnye kuphela ophilileyo noyinyaniso, uMongami wendalo iphela, uMdali. Ekubeni sibekho ngenxa yoThixo oyinyaniso, simele sinikele kuye imbeko emfaneleyo. Kunjengoko ISityhilelo 4:11 sikubonisa oku ngokuthi: “Ufanele, Nkosi, ukwamkela uzuko, nembeko, namandla; ngokuba inguwe owadala zonke izinto, nangenxa yokuthanda kwakho zikho, zadalelwa oko.”
2. (a) Yintoni ekusengqiqweni ukuyikholelwa ngoThixo oyinyaniso? (b) Unxibelelana njani nabo bafuna ukumnqula?
2 Bekuya kuba sengqiqweni ukulindela ukuba uThixo oyinyaniso ebengayi kuzinyamezela ngonaphakade iimeko ezimbi eziye zonakalisa izidalwa zakhe ezisemhlabeni. Yaye bekuya kuba sengqiqweni kwakhona ukukholelwa ukuba ebeya kubazisa abanquli bakhe oko aya kukwenza noko afuna bakwenze ngaphambi kokuba aphumeze imigwebo yakhe. (Amosi 3:7) Unxibelelana njani nabantu abafuna inyaniso? Usebenzisa abantu abavumayo njengezithethi zakhe. “Ningamangqina am, utsho uYehova, . . . Phambi kwam akubunjwanga thixo, nasemva kwam akuyi kubakho namnye. Mna ke, mna ndinguYehova, akukho msindisi ingendim.” (Isaya 43:10, 11) Kodwa umntu angabahlula njani abo basetyenziswa nguThixo oyinyaniso njengamangqina akhe? Bona nesigidimi sabo bahluke njani kubanquli babanye oothixo?
Ucelomngeni Olubhekiswa Kwabanye Oothixo
3. Luluphi ucelomngeni uYehova aluzisa kubo bonke abanye oothixo?
3 UYehova waphefumlela uIsaya ukuba abhale olu celomngeni lubhekiswa kubo bonke abanye oothixo: “Ngubani kuni [oothixo beentlanga nezizwe] onokukuxela oko [isiprofeto esichanileyo]? Mabasivise izinto zangaphambili [ezisaza kwenzeka], mabamise [njengoothixo] amangqina abo, bagwetyelwe [njengoothixo]; mabeve ke abantu [izizwe neentlanga], bathi, Yinyaniso.” (Isaya 43:9) Ngaloo ndlela uYehova ucel’ umngeni bonke oothixo abanqulwa ngabantu ukuba babonise ukuba bangoothixo. Amangqina abo amele abonise ubungqina bokuba oothixo babo banokuthenjwa yaye bakufanele ukunqulwa.
4. Sazi njani ukuba oothixo beentlanga zamandulo babengento yanto?
4 Kodwa yintoni eye yaveliswa ngabo thixo nabanquli babo? Ngaba baye basikhokelela ekuzuzeni uxolo, impumelelo, impilo nobomi bokwenene? Imbali ingqina ukuba oothixo abaninzi beentlanga zamandulo babonakala bengento yanto yaye bengenamandla. Abazange babe nako nokusinda njengezinto ezinqulwayo, ekubeni bengasekho namhlanje. Oothixo abaninzi baseYiputa, baseAsiriya, eBhabhiloni, bamaMedi namaPersi, baseGrisi, eRoma nabezinye iintlanga zamandulo bangqineka bengabobuxoki. Bafumaneka kuphela kwiincwadi zembali okanye kwiimyuziyam apho imifanekiso yabo eqingqiweyo izizinto nje abantu abanomdla wokuzibuka.
5. Yintoni esinokuyibuza ngoothixo bamaxesha anamhla?
5 Kanti, ngaba oothixo banamhlanje nabanquli babo balunge ngakumbi kunabo bamandulo? Unqulo lwamaHindu lulodwa nje lunezigidi zoothixo. AmaBhuda, amaKatolika, abalandeli bakaConfucius, amaYuda, amaProtestanti, amaShinto, abalandeli bakaTao nabanye abantu abaninzi banababo oothixo. EAfrika, eAshiya nakwezinye iindawo, amandla endalo, izilwanyana nezinye izinto zinqulwa njengoothixo. Ubuhlanga nokuthanda izinto eziphathekayo, nomntu ngokwakhe, ziye zangoothixo, kangangokuba inkoliso yabantu izinikela ngokupheleleyo kuzo. Luhlobo luni lonqulo ngenene olumela lowo uthi: “NdinguYehova; akukho wumbi, akukho Thixo ingendim”—Isaya 45:5.
“Nobaqonda Ngeziqhamo Zabo”
6. Sinokulwahlula njani unqulo lokwenyaniso kunqulo lobuxoki?
6 UYesu wandlala umgaqo oqinisekileyo wokufanisa oko kuyinyaniso okanye kububuxoki ngokuphathelele unqulo. Wathi: “Nobaqonda ngeziqhamo zabo. . . . Yonke imithi elungileyo ivelisa iziqhamo ezihle, ke wona umthi ongenguwo uvelisa iziqhamo ezibi . . . Wonke umthi ongavelisi ziqhamo zihle uyagawulwa, uphoswe emlilweni.” (Mat. 7:16-19) Ngaloo ndlela, ukuze sahlule uThixo oyinyaniso kwabo bobuxoki, nabanquli bokwenyaniso kwabo bobuxoki, kufuneka sihlolisise oko bakuvelisayo. Ngaba iziqhamo zabo “zihle,” okanye ‘zibi’?
7. Imbali yale nkulungwane isixelela ntoni ngeenkonzo zeli hlabathi?
7 Ngokomzekelo, ziziphi iinkonzo kwezikhoyo ehlabathini eziye zamisela uxolo lokwenene phakathi kwabanquli bazo kwihlabathi lonke? Ngokuqinisekileyo, amalungu onqulo lokwenyaniso, abazalwana bokomoya, abamele babulalane. Kodwa abantu abazizigidi ezilikhulu baye babulawa kwiimfazwe zale nkulungwane yama-20, yaye zonke ezo mfazwe ziye zaxhaswa ziinkonzo zeli hlabathi. Ngokomphumo, abantu bonqulo, baye babulala abanye abantu bonqulo. Kangangezihlandlo ezininzi, baye babulala abantu bonqulo lwabo. AmaKatolika ebebulala amaKatolika, amaProtestanti ebulala amaProtestanti, amaSilamsi ebulala amaSilamsi, nabezinye iinkonzo baye bahamba ngelo khondo linye.
8. Abakhi-mkhanya bayichaza njani indlela oluye lwasilela ngayo unqulo kwixesha lethu?
8 Kwiphephandaba lomhleli elinomxholo othi “The Violence Done in God’s Name” (Ugonyamelo Olwenziwa Egameni LikaThixo), uMike Royko, ngokungathi uxelela uThixo, wathi ngeenkonzo zeli hlabathi: “Zibonakalisa ukuzinikela kwazo kuwe ngokuthi abantu bazo abangamakhulu ngamakhulu babulalane. Ndikholelwa kwelokuba bagqiba ekubeni ukuba iqela elithile linokoyisa elinye, oko kuya kubonisa ukuba indlela elikunqula ngayo ichanile.” Wathi ngoxa upopu ezenza umntu onoxolo, “abalandeli bakhe baye baziwa bengabaphalaza igazi elinokuzalisa izigidi ezimbalwa zeegaloni xa bethe banyukelana ngumsindo.” Kwakhona, xa owayesakuba nguMongameli waseUnited States, uMongameli Carter waphawula ukuba “ihlabathi liphambene,” wathi: “Inkolelo enamandla yonqulo, emele imanyanise abantu ngothando, ngokufuthi ibonakala iyinxalenye yokuphambana nobugebenga.”
9. Kutheni singafanele sizilandele “izithixo ezingeni”?
9 Iziqhamo ezibi ngolo hlobo zichasene noko kumele kuveliswe ngabo banqula uThixo oyinyaniso. (Galati 5:19-23) Kungoko abo baxhasa iinkonzo ezilwayo neengcamango zazo beyinxalenye yonqulo lobuxoki kanye njengoko ayenjalo amaYiputa, ama-Asiriya, amaBhabhiloni nabanye bamandulo abathi bakhangela ‘kwizinto ezingento, ezizizidenge.’ (Habhakuki 2:18) Yaye kanye njengoko ilizwi lesiprofeto loThixo oyinyaniso lathi lazaliseka kunqulo lobuxoki lwamandulo, ngoko liya kuba njalo nakwixesha lethu: “Izithixo ezingeni zothi shwaka zonke ziphela.” (Isaya 2:18) Siyinyaniso esi silumkiso sakhe sithi: “Musani ukubheka kwiinto [kwizithixo, NW] ezingeni.”—Levitikus 19:4.
Ngoobani Abanikela Ubungqina NgoYehova?
10. Ngaba abaxhasi beenkonzo zeli hlabathi bangamangqina kaThixo oyinyaniso?
10 Ingqina loThixo oyinyaniso lifanele linikele ubungqina Ngaye. Ngaba abaxhasi beenkonzo zeli hlabathi bayabunikela obo bungqina? Kufuthi kangakanani na abantu bezi nkonzo bethetha nawe ngonqulo lwabo? Kunini apho bathe batyelela ekhayeni lakho ukuza kunikela ubungqina ngothixo wabo? Ucelomngeni athe uThixo oyinyaniso walwenza kwabo bobuxoki lokuba bavelise amangqina luye lwabethwa ngoyaba. Abantu beenkonzo zeli hlabathi abanabo ubungqina obunjalo. Abanakukuxelela ukuba ngubani uThixo oyinyaniso okanye ziyintoni na iinjongo zakhe. Abefundisi babo baye basilela ukubafundisa inyaniso. “Ngabakhokeli beemfama abakwaziimfama; ke kaloku, xa sukuba imfama ikhokela imfama, zombini ziya kweyela emhadini.”—Mateyu 15:14.
11. Ngoobani kuphela abanikela ubungqina ngegama loThixo oyinyaniso?
11 Ngoobani abakuvumayo ukuncama ixesha, izinto eziphathekayo, kwanobomi babo, ukuze banikele ubungqina ngoThixo oyinyaniso? Ngoobani abaxelela abantu ukuba uThixo oyinyaniso uthi: “NdinguYehova, lilo elo igama lam”? (Isaya 42:8) Ngoobani abafundisa ukuba “wena, ugama linguYehova, unguwe wedwa Osenyangweni phezu kwehlabathi lonke”? (INdumiso 83:18) Ngexesha lakhe, uYesu wakwazi ukuthi ngoThixo oyinyaniso: “Ndilibonakalisile igama lakho.” (Yohane 17:6) Kweli xesha lethu, ngamaNgqina kaYehova kuphela anokuthetha oko. Hayi indlela elifaneleke ngayo igama lawo—amaNgqina kaYehova!
Ukunikela Ubungqina NgoBukumkani
12. Yiyiphi imfundiso ebalulekileyo amele amangqina okwenyaniso ayixelele abanye?
12 Ukongezelela ekwenzeni igama loThixo oyinyaniso laziwe, ngokuyintloko, yintoni enokuthethwa ngamangqina akhe ngokuphathelele iinjongo zakhe? UYesu wamisela umzekelo ngokufundisa abalandeli bakhe ukuba bathandaze bathi kuThixo oyinyaniso: “Mabufike ubukumkani bakho.” (Mateyu 6:10) UBukumkani bukaThixo basezulwini bungurhulumente oya kuthi ekugqibeleni alawule umhlaba wonke. (Daniyeli 2:44) Babungumxholo wemfundiso kaYesu. (Mateyu 4:23) Ngenxa yokuba uBukumkani bukuphela kwesicombululo kwiingxaki zoluntu, wabongoza wathi: “Funani ke tanci ubukumkani bukaThixo nobulungisa bakhe.”—Mateyu 6:33.
13. (a) Zibonisa ntoni izibakala mayela nokushumayela kwamaNgqina kaYehova ngoBukumkani bukaThixo? (b) Ukushumayela ngoBukumkani kububo njani ubungqina bokuba uYehova ungokuphela koThixo wesiprofeto sokwenyaniso?
13 Ngoobani namhlanje abanikela ubungqina ngoBukumkani bukaThixo? Unjingalwazi uC. S. Braden, ongumphengululi onenzondelelo wonqulo lweli hlabathi, wathi: “AmaNgqina kaYehova aye awugubungela ngokoqobo umhlaba ngokunikela ubungqina kwawo. . . . Kunokutshiwo ngokunyanisekileyo ukuba akukho nalinye iqela lonqulo ehlabathini eliye labonisa inzondelelo nokuzingisa okungakumbi ekuzameni ukusasaza iindaba ezilungileyo zoBukumkani kunokuba enzile amaNgqina kaYehova.” Kodwa oku wakubhala phantse iminyaka engama-40 eyadlulayo! Namhlanje kunikelwa ubungqina boBukumkani obungakumbi, kuba ngoku kukho amaNgqina amaninzi ngokuphindwe kalishumi kunangoko! Malunga nezigidi ezithathu ezinesiqingatha zawo, kumabandla anokuba ngama-54 900 kwihlabathi lonke, anikela ubungqina ngoBukumkani, yaye anda ngokukhawuleza. Esi siqhamo sihle sibubungqina bokuba uYehova nguThixo wesiprofeto sokwenyaniso. Nguye owaphefumlela uNyana wakhe, uYesu, ukuba axele kwangaphambili ngokuphathelele ixesha lethu: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.”—Mateyu 24:14; Yohane 8:28.
Ukuxelisa Uthando LukaThixo
14. Luluphi uphawu olumele luxeliswe ngamangqina kaThixo oyinyaniso, yaye kunokuthetha ntoni ukuba akakwenzi oko?
14 Amangqina okwenyaniso kaThixo amele axelise uphawu lwakhe oluyintloko—uthando. “Lowo ungenaluthando akazange amazi uThixo, ngokuba uThixo uluthando.” (1 Yohane 4:8) Ngenene, “babonakala ngaloo nto abantwana bakaThixo, nabantwana bakaMtyholi. Bonke abangenzi bulungisa abangabakaThixo, nalowo ungamthandiyo umzalwana wakhe. . . . Sithandane; singabi njengoKayin, obengowongendawo, wambulala umninawa wakhe.”—1 Yohane 3:10-12.
15. Kutheni sinokuthi amaNgqina kaYehova abonisa uthando lokwenene?
15 NgamaNgqina kaYehova kuphela anolo hlobo lothando. Akazinikeli emfazweni, kubuhlanga nakubuzwe. Akazixhasi iimfazwe zeli hlabathi yaye ngoko akasayi kuze abe kwimeko yokuxhasa ukubulawa kwabazalwana bawo bokomoya kwezinye iindawo zehlabathi. ‘Akangabo abehlabathi’ njengoko uYesu watshoyo yaye ‘alibeke phantsi ikrele.’—Yohane 17:14; Mateyu 26:52.
16. Bancedwa njani abanye ekubeni bafanise amangqina kaThixo oyinyaniso?
16 Uphengululo olunomxholo othi “More About Justifying Violence” (Okungakumbi Malunga Nokuthethelela Ugonyamelo) lwathi: “AmaNgqina kaYehova aye azingisa ekulondolozeni ukuma kwawo ‘kobundilele bobuKristu’ obungenalugonyamelo . . . Ukuma kwawo okuzingisileyo ngokunxamnye nalo naluphi na uhlobo lwenkonzo yesizwe yezomkhosi okanye yezasekuhlaleni, yaye ukwala kwawo ukuhlonela imiqondiso yokuzifanisa ngokobuzwe kuye kwaphumela ekubeni asiwe ematyaleni, avalelwe ezintolongweni, aze ahlaselwe ngamahlokondiba abantu kumazwe amaninzi . . . Noko ke, amaNgqina akazange aziphindezelele ngogonyamelo.” Iphephandaba laseBrazil iO Tempo lathi ngawo: “Nangona kukho iinkonzo ezininzi ezinemfundiso enempembelelo enamandla kuzo zonke iindawo zehlabathi, akukho nokuba ibenye emhlabeni namhlanje ebonisa uthando olufanayo.” Olu thando lokwenene awathetha ngalo uYesu, lufanisa amangqina okwenyaniso kaThixo. “Ngayo le nto baya kwazi bonke, ukuba ningabafundi bam, ukuba nithe nathandana.”—Yohane 13:35.
Intshutshiso Yandisa Ubungqina
17, 18. Nguwuphi umzekelo wakutshanje obonisa indlela intshutshiso enokongeza ngayo ubungqina boBukumkani?
17 Intshutshiso inokude ibangele ukuba ubungqina boBukumkani bande. Ngokomzekelo, eIndiya kukho kuphela amaNgqina kaYehova amalunga nama-8 000. Kanti, kutshanje igama neenjongo zikaYehova ziye zaziswa ngokubanzi kwelo lizwe ngenxa yoko kuye kwenziwa ngabantwana abangamaNgqina abali-11 ekuxeliseni amaKristu enkulungwane yokuqala awathi enkundleni yamatyala: “Simele kukuthi sive uThixo kunokuba sive abantu.” (IZenzo 5:29) Aba bantwana baseIndiya babenikwe uphum’ aphele esikolweni ngenxa yokungawuculi umhobe wesizwe. Kodwa, ngokwengxelo yeDeccan Herald yaseBangalore, iNkundla Ephakamileyo yaseIndiya yawisa umthetho wokuba, “kweli lizwe ukucula Umhobe Wesizwe akunyanzeliswa.” INkundla yaphawula ukuba aba bantwana “babebonise imbeko efanelekileyo” nokuba ukungaculi kwabo “kwakungekuko ukungazithobi phantsi kwegunya nangayiphi na indlela.” INkundla yayalela ukuba abantwana bamkelwe esikolweni kwakhona.
18 Elo phephandaba lakwathi: “Aba bantwana bala ukucula Umhobe Wesizwe ngenxa yokuba amaNgqina kaYehova azigqala njengamaKristu yaye azinikele ngokupheleleyo eBukumkanini bukaThixo. . . . Ngoko ke akananxaxheba nakuyiphi na imicimbi yeSizwe ephathelele iipolitiki.” Kwakhona, iThe Telegraph yaseCalcutta yabika oku: “Isenzo sabantwana besikolo siye sawabalaselisa . . . amaNgqina kaYehova, abesoloko engaziwa ngabantu abaninzi kwilizwe lethu de kwakutshanje.” Ewe, ‘ezi ndaba zilungileyo zobukumkani ziya kushunyayelwa ukuze zibe bubungqina kuzo zonke iintlanga’ ngaphambi kokufika kwesiphelo.—Mateyu 24:14.
Ukuhlanganiswa KwamaNgqina OThixo Oyinyaniso
19. Yintoni ekufuneka beyenzile abantu abaneentliziyo ezinyanisekileyo ukuba bafuna ukunqula uThixo oyinyaniso?
19 Namhlanje, uThixo oyinyaniso, uYehova, unabantu bakhe abanikela ubungqina bolongamo neenjongo zakhe. Njengoko bevakalisa isigidimi sakhe ngamandla amakhulu ngakumbi kunabakha banawo, uhlanganisa abantu abalinani elandayo nabantliziyo zinyanisekileyo bazo zonke iintlanga ukuba banxulumane nabanquli bakhe. (Isaya 2:2-4) Bashiya oothixo babo bobuxoki baze babuyele kunqulo loThixo oyinyaniso, kanye njengokuba abo babefuna ukunqula uYehova bathi bakhululwa ekuthinjweni kwiBhabhiloni yamandulo, apho ukunqulwa koothixo bobuxoki kwakuxhaphakile.—Isaya 43:14.
20, 21. Kutheni kungxamisekile ukushiya oothixo bobuxoki ngoku nokungabi ngababukeli nje kuphela?
20 Ngaba uya kuba lingqina loThixo oyinyaniso? Ngaba uya kulumela unqulo lokwenyaniso uze ukuphephe ukuba nesabelo kwityala legazi nelokuziphatha kweli hlabathi noothixo balo bobuxoki? ILizwi likaThixo liyabongoza: “Phumani kuyo [unqulo lobuxoki olubuBhabhiloni], bantu bam, ukuze ningadlelani nayo ngezono zayo, nokuze ningamkeliswa kwizibetho zayo.” (ISityhilelo 18:4) Ewe, ‘phuma,’ thabatha inyathelo ngaphambi kokuba ushiywe lixesha! Musa ukuba njengendoda ethile, eyathi xa yayibuzwa malunga nenkonzo eyikhethayo kwiphephandaba lamaKatolika, yathi: “Ndicinga ukuba ndingumntu nje obukele oko kwenziwa ngabantu bakaYehova. Ndikukholelwa kakuhle kakhulu oko amaNgqina kaYehova akukholelwayo—kodwa andifuni kubandakanyeka.”
21 Noko ke, kungekudala wonke umntu osemhlabeni uya kubandakanyeka xa uYehova egweba oothixo bobuxoki beli hlabathi nabanquli babo: “Bona oothixo abangalenzanga izulu nehlabathi, baya kudaka ehlabathini, naphantsi kwezulu.” (Yeremiya 10:11) Ngelo xesha akuyi kubakho bantu babukeleyo. Kuya kubakho kuphela abo bangamaNgqina oThixo oyinyaniso nabo bangengawo. (Mateyu 24:37-39; 2 Petros 2:5; ISityhilelo 7:9-15) Ngaba uya kuba lingqina loThixo oyinyaniso? Umele ube lilo kuba “yena uThixo [oyinyaniso, NW] kuthi nguThixo wosindiso, kokukaYehova, iNkosi yethu, ukukhupha ekufeni.”—INdumiso 68:20.
Imibuzo Yempinda
◻ Luluphi ucelomngeni olwenziwa nguThixo oyinyaniso koothixo bobuxoki?
◻ Kungawuphi umgaqo oqinisekileyo esinokuthi ngawo sahlule unqulo lokwenyaniso kolo lobuxoki?
◻ Sisiphi isiqhamo esibonisa ukuba oothixo beli hlabathi abanto yanto njengabo bamandulo?
◻ Sisiphi isiqhamo esihle esimele siveliswe ngamangqina kaThixo oyinyaniso, yaye ngubani osibonisayo?
◻ Kutheni le nto kungxamisekile ukuthabatha inyathelo ngoku lokushiya unqulo lobuxoki?
[Imifanekiso ekwiphepha 16]
Oothixo abangento beentlanga zamandulo abasajongwa njengezinto zokunqulwa
[Umfanekiso okwiphepha 17]
Kwinkulungwane yethu abantu abamalunga nezigidi ezilikhulu baye babulawa ezimfazweni ezixhaswa ziinkonzo zeli hlabathi
[Inkcazelo]
Umfanekiso womkhosi waseU.S.
[Umfanekiso okwiphepha 18]
UYesu wathi amangqina okwenyaniso ayeya kwaziwa ngokuthi athandane