Ukufuna Ukuthandwa

Mandulo, kwisixeko esikummandla ngoku oyiTurkey, kwakuhlala intombi egama linguLeya. ULeya wayengemhle kangako, kodwa udade wabo omncinane, uRakeli, wayeyinzwakazi.

URAKELI wadibana nendoda eyayimthanda kakhulu, kangangokuba yavuma ukusebenzela uyise iminyaka esixhenxe ukuze batshate. Noko ke, ngobusuku bomtshato, uyise wezi ntombi wathumela uLeya kunokuba athumele udade wabo. Asiyazi indlela uLeya awayevakalelwa ngayo ngeli qhinga likayise, kodwa kumele ukuba wayesazi ukuba esi yayingesiso isiqalo esihle somtshato.

Emva kokubona okwenzekileyo, lo myeni mtsha akazange ayithande le nto. Uyise wezi ntombi wamxelela ukuba kulisiko lasekuhlaleni ukuba kutshate intombi endala kuqala. Ngoko ke, uLeya watshata ngobuqhetseba nendoda eyayithanda udade wabo omncinane, neyamtshatayo kamva. Imele ukuba yayilihlwili intliziyo kaLeya kukubona udade wabo ethandwa ngaphezu kwakhe! ULeya wayengenakubalisa nto ngeentsuku zokuthandana kwakhe. Phofu, ukuba zazikho iinkumbulo ezimyoli zosuku lomtshato wakhe, kumele ukuba zazimbalwa. Hayi indlela ekumele ukuba wayefuna ngayo ukuthandwa njengoRakeli! Ngoko ke, mhlawumbi ngenxa yemeko awazifumana ekuyo neyayingaphaya kwamandla akhe, kumele ukuba uLeya wayeziva engathandwa yaye engafunwa.a

Ngomlinganiselo othile, abantu abaninzi namhlanje bayiqonda kakuhle imeko kaLeya. Sonke, sinemvakalelo eyendele nzulu yokufuna ukuthanda nokuthandwa. Mhlawumbi silifuna ngamehl’ abomvu iqabane elinokusithanda. Sifuna ukuthandwa ngabazali, abantwana bethu, oodade wethu nabantakwethu kunye nabahlobo. Ngokufana twatse noLeya, sinokubona indlela abathandwa ngayo abanye nendlela thina esingathandwa ngayo.

Sisebancinane, besisiva ngamabali abantu abathandanayo, baza baphila kamnandi ubomi babo bonke. Iimvumi zicula ngothando neembongi zibonga ngalo. Noko ke, umphengululi othile ngalo mba wabhala wathi: “Zimbalwa izinto namashishini aye abonakala ngathi aza kuqhuba kakuhle xa eqala, kodwa asilela ngokuphindaphindiweyo njengothando.” Enyanisweni, lulwalamano lwethu nabona bantu sisondelelene nabo oluye lwasingcungcuthekisa—lusishiya neentliziyo ezingamahlwili kunolonwabo oluhlala luhleli. Kumazwe amaninzi, malunga nemitshato engama-40 ekhulwini iphelela kuqhawulo-mtshato, ibe engekaqhawuki, ayonwabisi kwaphela.

Kwamanye amazwe liye lantinga inani labazali abangenamaqabane neentsapho ezingonwabanga, yaye abantwana baba ngamaxhoba. Inyaniso yile, abantwana ngokukhethekileyo bafuna ukukhuselwa ngokweemvakalelo kwintsapho enobubele nenothando. Ngoko ke, kwenzeke ntoni kuthando? Simele silufune phi ukhokelo ukuze sifunde ngolu phawu luxabisekileyo? Amanqaku alandelayo aza kuyihl’ amahlongwane le mibuzo.

[Umbhalo osemazantsi]