Iphulo Lokufuna IMouflon
Ngenye intsasa yentwasahlobo, kuse nasebukhweni bezinja, sahamba ngemoto eyayikwazi ukuhamba nakoluphi na uhlobo lwendlela siphethe iimaphu, iikhamera, iminqwazi yokukhusela ilanga sinxibe neebhutsi. Sasifuna ukuya kufika phezulu kwiHlathi ekuthiwa yiPaphos, eTroodos kwiintaba ezikwisiqithi saseCyprus, apho sasinethemba lokuba siza kuzibona iimouflon. Olu luhlobo olunjani lwesilwanyana?
EZI zilwanyana zizimvu zasendle, yaye zifumaneka kuwo wonke ummandla weMeditera. Isilwanyana esasifuna ukwazi ngaso yimouflon yaseCyprus yaye sihle njengexhama kodwa siphila njengebhokhwe. Iingcali ngezilo ziyibiza ngokuba yiOvis gmelini ophion, ngoxa abantu baseCyprus besithi yiagrinó. Inokufunyanwa kuphela kwiintaba ezikwimimandla esemaphandleni.
Sawushiya uhola wendlela, sahamba kwiinduli saza sawela kwintlambo entle. Kukho iidolophana ezakhiwe phezu kwaloo mathambeka, yaye kukho imiyezo yeziqhamo ecaleni kwezo ntlambo. Noko ke, kungekudala kwakuba nzima ukuhamba yaye imoto yethu yayisondela elungqamekweni lwaloo ndlela iyimiwewe. Ekugqibeleni sade safika apho sasisiya khona ehlathini. Ngoku sasiphakathi eHlathini ekuthiwa yiPaphos elinemithi yompayini nemisedare eliziihektare ezingama-60 000. Sathenga ikofu saza sancokola noAndreas, umlimi wamahlathi onxibe impahla eziluhlaza owayekuvuyela ukuthetha ngale mvu yasendle.
Wathi, imvu yasendle sesona silwanyana sanyisayo sikhulu apha eCyprus. Ngaphambili uninzi lwazo lwaludakasa kwesi siqithi. AmaGrike namaRoma amaninzi enza imifanekiso yale mvu yasendle ngamatye amancinane, aza kwimibhalo yamaxesha aphakathi achaza indlela iindwalutho ezazikuvuyela ngayo ukuzingela kuMahlathi abizwa ngokuba yiPaphos.
Njengokuba sasisiya ngakwindawo ebiyelweyo, uAndreas wasixelela okungakumbi ngembali yale mvu yasendle. Ngokomzekelo, safunda ukuba ezi zilwanyana zaya zisiba mbalwa ngenxa yokuba abazingeli babezidubula. Ukususela ngowe-1938 kwahlaziywa imithetho yokuzingela eCyprus ukuze kukhuselwe esi silwanyana. Abalimi bamahlathi namapolisa bakuphelisa ukuzingela ngaphandle kwemvume. Emva konyaka kwakungafuneki mzingeli kwelo hlathi. Olu tshintsho, kuquka namanyathelo ongezelelekileyo aye athatyathwa ukususela ngowe-1960, aye aphumela ekubeni ezi zimvu zasendle zande.
Ezokuqala Esadibana Nazo
Salandela uAndreas sisiya ngakwindawo ebiyelweyo yaye sasihamba phakathi kwamatyholo nemithi. Esenzela umqondiso wokuba masithule, uAndreas wahamba phambi kwethu umganyana, wasinyusa kwithambeka elithile. Apho sabona iimazi ezintathu namatakane amabini asandul’ ukuzalwa esidla ebaleni lehlathi. Inkunzi nemazi zimalunga neesentimitha ezingama-90 ubude, kwaye uboya bayo bumdaka ngebala, esiswini iluthuthu.
Izityalo ezikhula ezintabeni ezityiwa ziimouflon zininzi ebudeni beli xesha lo nyaka, yaye iinkunzi neemazi zixakeke gqitha zisitya kangangokuba azisijongi nokusijonga. Noko ke, amatakane asandul’ ukuzalwa ayayeka ukudloba aze egxadazela, asondele ngakuthi. Hayi indlela esivuya ngayo! Kodwa ayoyika ukufotwa yaye abaleka onke ezimela ngemithi.
Sivuyiswa zezo sizibonileyo, saceba ukuba silihambe lonke ihlathi sinethemba lokuba siza kubona ezinye izimvu zasendle. UAndreas wacebisa ukuba siye kwasekuseni, kuba izilwanyana zidla ngokufuna ukutya ngelo xesha. Ekubeni sasicebe ukuba siza kuhlala ezintenteni ngasentlanjeni ubusuku bonke, iintaba ezingasentlanjeni zingayindawo esingakhangela kuyo ezi zilwanyana. Seva ukuba izimvu zasendle amaxesha amaninzi ebudeni beenyanga zehlobo zihlala kumathambeka angentla, kodwa ebusika xa iinduli zigqunywe likhephu, zikhangela izityalo ezityekayo kwimimandla engamathafa de ziphumele ngaphandle kwehlathi.
Inkunzi nemazi zidibana ekwindla. Ebusika izimvu zasendle ziyahamba ziyimihlambi ephakathi kwe-10 nama-20. Xa kuzalwa amatakane ngoAprili okanye ngoMeyi, ezi zimvu zasendle ziyahlukana zibe ngamaqela amancinane, njengezo siye sazibona kula ndawo ibiyelweyo. Ngokuqhelekileyo iinkunzi ezindala ziyazizingelela ukutya.
Inkunzi Yegusha Yasendle!
Xa kwakumpondo zankomo ngemini elandelayo, sahamba ngemoto sanyuk’ induli, sashiya imoto ebaleni, saza sahamba ehlathini ngaphambi kokuba ilanga livele. Ehlathini kwakusathe cwaka, yaye phakathi kwemithi kwakusekho inkungu. Njengokuba sasimile sinandipha loo nzolo, sasibuka loo nkunzi intle yondlekileyo, neyayinoboya obabusele buphela. Umqala wayo ugqunywe buboya obumdaka ngebala. Iqethule intloko, iyasijonga phakathi kwaloo misebe imdaka ngebala yaye isezela umoya ijoja ivumba labantu. Uphondo ngalunye lwayo olukhulu nolubugophe lungangeesentimitha ezingama-40! Ingaphezulu ngobunzima kuneemazi ebesizibone izolo yaye ifanele ukuba iziikhilogram ezingama-35 ubunzima.
Sama bhunxe, kunzima nokuphefumla. Noko ke, kubonakala ukuba esi silwanyana sive ngevumba ukuba kukho abantu, yaye saphakamisa intloko yaso saphinda saqubuda emva koko sagqotsa. Oko sikubonileyo nesikuvileyo kwezi ntsuku zimbini kuye kwasichukumisa gqitha. Luye lwakhula uxabiso lwethu ngoMdali, owathi: “Zezam zonke izilwanyana zasendle ezisehlathini, amarhamncwa asezintabeni eziliwaka.”—INdumiso 50:10.
[Imifanekiso ekwiphepha 24, 25]
Imvu yasendle yaseCyprus kanti (emva) yimvu yasendle yaseYurophu
[Inkcazelo Ngemifanekiso ekwiphepha 25]
Ngentla ekunene: Oxford Scientific/photolibrary/Niall Benvie; European Mouflon: Oxford Scientific/photolibrary