Yibani Nemihlali Ngalo Ithemba
UJOE wayegula kakhulu sisifo esinganyangekiyo somhlaza. Umfazi wakhe, uKirsten nabahlobo bakhe abambalwa babesecaleni kwebhedi yakhe bencokola naye. UKirsten wajonga umyeni wakhe yaye waphawula ukuba iinyembezi zazisehla ezidleleni zakhe. Ekuqaleni, wayecinga ukuba uJoe uva iintlungu. Mhlawumbi kwakunjalo, kodwa waxelela umfazi wakhe ukuba wayengaliliswa ziintlungu.
UKirsten uthi: “Ngeli xesha linzima, uJoe wayengqongwe ngabahlobo bakhe abasenyongweni ababeze ukuze babe kunye naye. Kwakhona, wayenethemba elixabisekileyo awayeqinisekile ngalo kunanini na ngaphambili ebomini bakhe, yaye wayesazi ukuba akukho mntu wayenokulihlutha kuye. Eneneni wavuma ukuba wayeneenyembezi zovuyo. Kamva ngobo busuku, uJoe wafa.”
Liliphi ithemba elomeleza uJoe njengokuba esi sifo wayenaso sasithabath’ unyawo? Sisithembiso sikaYehova uThixo sobomi obungunaphakade kumhlaba oyiparadesi singabikwa hlaba. (INdumiso 37:10, 11, 29) ISityhilelo 21:3, 4 sithi: “Intente kaThixo iphakathi koluntu . . . Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili [kuquka iingxaki ezininzi zanamhlanje] zidlule.”
Ithemba Kwanangabantu Abafileyo
KuJoe ukuzaliseka kwethemba awayenalo kwakuthetha ukuba wayeza kuvuka emangcwabeni. Eneneni wayeziva ethuthuzelekile sisithembiso sikaYesu sokuba “bonke abo bakumangcwaba enkumbulo”—abantu abafileyo abakwinkumbulo kaThixo—baya kuvuka kubuthongo bokufa. (Yohane 5:28, 29) Ngaba ubuhlungu kuba kuye kwafa ilungu lentsapho okanye umhlobo wakho? Ukuba kunjalo, ithemba lovuko linokukuthuthuzela nawe. Kuyavunywa ukuba, eli themba aliyiphelisi intlungu esiba nayo xa kufe ilungu lentsapho okanye umhlobo. NakuYesu “zasuka zathi waxa iinyembezi” xa weva ukuba umhlobo wakhe uLazaro ufile. Kodwa ithemba lethu liyayithomalalisa noko intlungu esinayo.—Yohane 11:14, 34, 35; 1 Tesalonika 4:13.
UKirsten uthi: “Xa uJoe wabulawa ngumhlaza, ndandicinga ukuba andisoze ndiphinde ndonwabe. Nangoku, nakuba sekudlule iminyaka embalwa oku kwenzekayo, ndiyaqonda ukuba ubomi kum abusoze bufane ndisaphila kule nkqubo yezinto. Kuyabonakala ukuba uJoe akakho. Phofu ke, ndingatsho ukuba ndinoxolo lwengqondo yaye ndanelisekile.”
Oko kuthethwa nguKirsten kusikhumbuza ukuba kule nkqubo yezinto asinakulindela ukuba ngalo lonke ixesha siya kuhlala sonwabile. Ubomi bunamahlandinyuka. Yaye kubakho amaxesha okudakumba, xa kungafanelekanga ukudloba. (INtshumayeli 3:1, 4; 7:2-4) Kwakhona, abanye bethu basenokuba baxinezelekile ngenxa yezinto ezahlukahlukeneyo. Noko ke, amathemba aseBhayibhileni ayasithuthuzela, yaye ubulumko obugqithiseleyo esibufumana eBhayibhileni bunokusinceda siphephe iinzima ezisenza singonwabi. UThixo uthi: “Yena ke ondiphulaphulayo, uya kuhlala ngonqabiseko aze angaphazamiseki ekunkwantyiseni kwentlekele.”—IMizekeliso 1:33.
Ewe, uYehova usikhathalele. Ngokusuk’ entliziyweni ufuna sonwabe—kungekhona nje iminyaka embalwa kodwa ngonaphakade! Kungoko ke, uNyana wakhe wathi: “Banoyolo abo bayiphapheleyo intswelo yabo yokomoya.” (Mateyu 5:3) Siya kuba zizilumko ukuba siyawasebenzisa la mazwi.
[Ibhokisi/Umfanekiso okwiphepha 9]
Izinto Ezisithoba Ezifunekayo Ukuze Sonwabe
1. Khulisa uxabiso lwakho ngezinto zokomoya.—Mateyu 5:3.
2. Yaneliseka, uze ukuphephe “ukuthanda imali.”—1 Timoti 6:6-10.
3. Kuphephe ukuthanda iziyolo.—2 Timoti 3:1, 4.
4. Yiba nesisa uze usebenzele ekubeni nabanye abantu bonwabe.—IZenzo 20:35.
5. Yiba nombulelo uze ube noxabiso ngezinto osikelelwe ngazo.—Kolose 3:15.
6. Kulungele ukuxolela.—Mateyu 6:14.
7. Bakhethe ngobulumko abantu onxulumana nabo.—IMizekeliso 13:20.
8. Nyamekela umzimba wakho uze uyiphephe imikhwa emibi.—2 Korinte 7:1.
9. ‘Yibani nemihlali ngalo ithemba’ lethu eliseBhayibhileni.—Roma 12:12.
[Imifanekiso ekwiphepha 8, 9]
Ithemba elisekelwe eBhayibhileni lobomi kwihlabathi elitsha lisithuthuzela gqitha