Ngaba Unokukuthintela Ukwaluphala?
‘Imihla yeminyaka yethu yiminyaka engamashumi asixhenxe—yaye ukuba iye yanamandla akhethekileyo iba ngamashumi asibhozo; kuba imele idlule ngokukhawuleza, siphaphazele simke.’—INDUMISO 90:10.
KHAWUBE nomfanekiso-ngqondweni wakho uvuyela iminyaka yobutsha. Usoloko usempilweni yaye ingqondo yakho ibukhali. Ngaba ucinga ukuba elo liphupha nje? Khawucinge ngesi sibakala: Nangona ezinye izikhwenene ziphila zide ziye kufikelela kwiminyaka elikhulu, kunqabile ngeempuku ukuba zigqithe kwiminyaka emithathu. Ukungalingani kwexesha lokuphila kwezidalwa kubangele ukuba izazi ngendalo zigqibe ngelithi, kumele kubekho isizathu esibangela ukwaluphala yaye ukuba kunjalo, kusenokuba ikho into enokwenziwa ukukuphelisa.
Zikhangela ichiza elinokuthintela ukwaluphala, iinkampani zamachiza ziye zachitha imali eninzi. Ukongezelela, abantu abazelwe emva kwemfazwe yehlabathi yesibini ngoku abakwiminyaka yama-60 ubudala, eyona nto ibaxhalabisayo kukwaluphala.
Uhlolisiso ngokwaluphala nalo luye lwayeyona nto ibalulekileyo kubaphandi abaliqela abaphanda ngemizila yemfuza, ukwakhiwa kweemolekyuli, inzululwazi ngezilwanyana nenzululwazi ngokwaluphala kwabantu. Incwadi ethi Why We Age, kaSteven Austad ithi: “Xa izazinzulu ngokwaluphala zidibene zichwayita ngokungathi ziza kuphuma nento kanti enyanisweni ziqinelwe yinqawa. Azide zisiqonde esona sizathu sibangela ukuba abantu baluphale nendlela okwenzeka ngayo oko.”
Abantu babik’ imbiba babik’ ibuzi xa bechaza unobangela wokwaluphala. Enye yazo kukuwohloka kweeseli; ukanti enye kukuba ukwaluphala kwamiselwa kwangaphambili. Abanye bathi oku kubandakanyaka ezi mbono zombini. Abantu bakwazi kakuhle kangakanani okwenzekayo emntwini xa esaluphala? Ngaba sikho isizathu esibangela ukuba ulindele ukuba kukho amachiza anokuphelisa ukwaluphala?
[Isicangca/Imifanekiso ekwiphepha 2, 3]
(Ukuba ufuna inkcazelo ehlahlelwe kakuhle, yiya kwimpapasho)
IMINYAKA ESENOKUPHILWA ZEZI ZINTO
Inyosi
Iintsuku ezingama-90
↓
Impuku
Iminyaka emithathu
↓
Inja
Iminyaka eli-15
↓
Inkawu
Iminyaka engama-30
↓
Ingwenya
Iminyaka engama-50
↓
Indlovu
Iminyaka engama-70
↓
Umntu
Iminyaka engama-80
↓
Isikhwenene
Iminyaka eli-100
↓
Ufudo olukhulu
Iminyaka eli-150
↓
Umthi omkhulu
Iminyaka engama-3 000
↓
Umthi wompayina
Iminyaka engama-4 700
[Umfanekiso okwiphepha 3]
Ezinye izikhwenene zinokuphila iminyaka eli-100, kodwa abantu baphila nje iminyaka engama-80 Abaphandi bayabuza: “Yintoni ebangela ukwaluphala?”