Kutheni Sisaluphala?

“Umntu, ozelwe ngumfazi, unobomi obufutshane obuzele kukuphazamiseka.”—YOBHI 14:1.

USENOKUCINGA ukuba zonke izinto eziphilayo ekugqibeleni ziya kwaluphala. Iimoto noomatshini bokutshayela abasetyenziswa imihla ngemihla ekugqibeleni bayayeka ukusebenza. Kulula ukucinga ukuba nezilwanyana nazo ziyaluphala zize zife ngendlela efanayo. Kodwa isazi-nzulu ngezilwanyana uSteven Austad uthi: “Izinto eziphilayo zahlukile koomatshini. Enyanisweni, iimpawu ezenza izinto eziphilayo zahluke kusenokwenzeka ukuba zona ziyakwazi ukuzihlaziya.”

Indlela umzimba ophola ngayo emva kokuba nenxeba iyamangalisa kodwa imangalisa ngakumbi indlela umzimba ozihlaziya ngayo ngokuthe rhoqo. Ngokomzekelo, cinga nje ngamathambo akho. Iphephancwadi iScientific American lithi: “Kusenokubonakala ngathi ithambo alikhuli, kodwa lisoloko lizihlaziya ngalo lonke ixesha lokuphila komntu. Le nkqubo ibangela ukuba umzimba ube namathambo amatsha rhoqo emva kweminyaka eli-10.” Amanye amalungu omzimba wakho ahlaziywa rhoqo. Ezinye iiseli kulusu lwakho, esibindini nasemathunjini zisenokuba zihlaziywa suku ngalunye. Mzuzwana ngamnye, umzimba wakho uvelisa iiseli ezintsha ezizizigidi ezingama-25. Ukuba oku bekungenzeki yaye onke amalungu omzimba wakho ebengazipholeli okanye athatyathel’ indawo ngamanye, ubuya kwaluphala usengumntwana.

Isibakala sokuba singawohloki sibonwa xa iingcali zebhayoloji zifunda ngeemolekyuli ezikwiiseli eziphilayo. Xa iiseli zakho zithatyathel’ indawo ziiseli ezintsha, seli nganye entsha ifanele ibe nenye iDNA yakho, imolekyuli enayo yonke inkcazelo ifanele iphinde ivelise ezinye iimolekyuli zomzimba wonke. Cinga nje ukuba zizihlandlo ezingaphi iDNA iveliswa, kungekhona nje ebudeni bokuphila kwakho, kodwa ekuqaleni kobomi babantu! Ukuqonda nje indlela ekumangalisa ngayo oku, cinga ngento enokwenzeka ukuba ubunokusebenzisa umatshini wokukhuphela uze ukhuphele uxwebhu yaye usebenzise olu xwebhu lutsha ukwenza olunye uxwebhu. Ukuba ukwenza oku ngokuphindaphindiweyo, amaxwebhu alandelayo asenokungabonakali kakuhle yaye ekugqibeleni usenokungakwazi nokuwafunda. Okuvuyisayo kukuba ngendlela eyiyo iDNA yethu ayiphelelwa okanye iwohloke xa iiseli zethu ziziphindaphinda. Kutheni oku kunjalo? Kungenxa yokuba iiseli zethu zineendlela ezininzi zokulungisa enye iDNA. Ukuba oku bekungenjalo, ngekungekho bantu!

Ekubeni onke amalungu omzimba wethu—ukususela nje emathanjeni ukusa kwiimolekyuli ezincinane—ngalo lonke ixesha zithatyathel’ indawo zezinye okanye zilungiseke, ukuguga kwazo akukuchazi kakuhle ukwaluphala. Amalungu amaninzi omzimba ayazilungisa okanye athatyathel’ indawo ngamanye kangangeminyaka emininzi, yaye oku kwenzeka ngendlela eyahlukileyo kwelinye nangesantya esingafaniyo. Ngoko ke, kutheni onke amalungu eyeka ukusebenza ngexesha elinye?

Ngaba Abantu Babedalelwe Ukwaluphala?

Kutheni ikati iphila iminyaka engama-20 kodwa isilwanyana ekuthiwa yiopossum esilingana nayo siphila nje iminyaka emithathu?a Kutheni ilulwane liphila iminyaka engama-20 okanye engama-30, kodwa yona impuku iphila nje iminyaka emi-3? Kutheni ufudo olukhulu luphila iminyaka eli-150 kodwa yona indlovu iphila nje iminyaka engama-70? Izinto ezinjengokutya, ubungakanani bomzimba, ubungakanani bobuchopho okanye indlela abantu abaphila ngayo ayisichazi kakuhle isizathu sokuba bahluke ubomi obuphilwa zezi zilwanyana. IEncyclopædia Britannica ithi: “Kwimizila yemfuza kukho imiyalelo echaza iminyaka eso silwanyana esifanele siyiphile.” Kodwa njengokuba loo minyaka isondela, yintoni ebangela amalungu omzimba ayeke ukusebenza?

Isazi ngokwakhiwa kweemolekyuli uGqr. John Medina wabhala wathi: “Kubonakala ngathi kukho imiqondiso engaziwayo esuka ivele nje ngamaxesha athile ize ichazele iiseli ukuba ziyeke ukwenza umsebenzi eziqhele ukuwenza.” Kwakhona sithi: “Kukho imizila yemfuza exelela iiseli nawo onke amanye amalungu omzimba ukuba akhule yaye afe.”

Imizimba yethu sinokuyifanisa nenkampani ebiqhuba ishishini eliphumelelayo kangangeminyaka emininzi. Ngequbuliso abaphathi bayayeka ukuqesha nokuqeqesha abantu abatsha, bayayeka ukulungisa nokuthenga oomatshini abatsha, bayayeka ukugcina isakhiwo sikwimeko entle nokusihlaziya. Kungekudala ishishini liyawohloka. Kodwa kutheni bonke abo baphathi beyekile ukusebenzisa inkqubo ebebeyisebenzisa ukuze elo shishini liphumelele? Lo mbuzo uyafana nalowo obuzwa ziingcali zebhayoloji ezifunda ngokwaluphala. Incwadi ethi The Clock of Ages ithi: “Xa kuphandwa ngokwaluphala, eyona nto ingumnqa kukuzama ukwazi isizathu sokuba iiseli ziyeke ukuziphindaphinda kodwa kunoko ziqalisa ukufa.”

Ngaba Ukwaluphala Kunokuthintelwa?

Ukwaluphala kuye kwachazwa “njengeyona nto iyinkohla kuzo zonke iingxaki zenkqubo yebhayoloji.” Emva kweminyaka emininzi kuzanywa, uphando lwenzululwazi alukwazanga ukuchaza isizathu sokuba abantu baluphale yaye ngokuqinisekileyo alukhange lufumane nento yokukuthintela. Ngowama-2004 iphephancwadi iScientific American lapapasha isilumkiso esivela kwizazinzulu ezingama-51 ezazifunda ngokwaluphala. Yathi: “Akukho chiza lithengiswayo ngoku elinokwenza ungakhawulezi waluphale, likwenze ungaluphali okanye likubuyisele emva ukwaluphala.” Nangona ukutya uhlobo oluthile lokutya uze wenze umthambo kunokukwenza ube sempilweni uze ungafi ngaphambi kwexesha ngenxa yezifo, akukho nto inokwenza ungakhawulezi waluphale. Oku kusikhumbuza amazwi kaYesu afumaneka eBhayibhileni athi: “Ngubani na kuni onokuthi ngokuba nexhala ongeze ikubhite enye kubude bobomi bakhe?”—Mateyu 6:27.

Ethetha ngemizamo eyenziwayo ukuze kufunyanwe into enokunyanga ukwaluphala, uMedina uthi: “Asisazi isizathu sokuba sisaluphala. . . . Emva kwephulo lokunyanga umhlaza kwiminyaka emininzi edluleyo, asikalifumani iyeza lawo. Yaye ukwaluphala kuntsonkothile xa kuthelekiswa nezinto ezibangela umhlaza.”

Uphando Lukhokelele Kwisigqibo Esibalulekileyo

Uphando ngendlela izinto eziphila ngayo nesizathu sokuba zisaluphala aluwabhangisanga amathemba okuphila ubomi obude. Abanye baye bafumanisa ukuba uphando lwabo lubenze baqonda into ebalulekileyo ngokwaluphala. Isazi ngeemolekyuli uMichael Behe uthi: “Ebudeni beminyaka engamashumi amane edluleyo izazi ngeemolekyuli zale mihla ziye zayichaza indlela esebenza ngayo iseli. . . . Imiphumo yolu phando lweeseli—ukuphanda ngobomi ukususela kwimolekyuli—lubonisa ngokucacileyo ukuba izinto eziphilayo zayilwa ngumntu othile!’” Lo mntu ukrelekrele wenza izinto eziphilayo. Kakade ke, asingoBene owaqala watsho. Emva kokuba ecingisise nzulu ngendlela umzimba womntu owenziwe ngayo, umdumisi wamandulo wathi: “Ngendlela eyoyikekayo ndenziwe ngokumangalisayo.”—INdumiso 139:14.

Ukuba zonke izinto eziphilayo zidaliwe, ngoko kukho umbuzo obangel’ umdla othi, Ngaba uThixo, uMyili Omkhulu, wabadala abantu ukuba baphile ubomi obulingana nobezilwanyana, okanye wayefuna siphile ubomi obude kunazo?

[Umbhalo osemazantsi]

[Amagama acatshulweyo akwiphepha 6]

‘Senziwe ngendlela emangalisayo’

[Umfanekiso okwiphepha 4, 5]

Ngaba ukwaluphala kubangelwa kukuwohloka komzimba?

[Inkcazelo Ngomfanekiso okwiphepha 6]

DNA: Photo: www.comstock.com