Okwenzeka Ehlabathini

◼ Abantwana abangama-60 ekhulwini kwabaneminyaka emithathu ubudala eBrazil babolelwa ngamazinyo. Esinye sezizathu kukuba emva kokuba bencance ibhotile enesiselo esiswiti ebusuku abawahlambi amazinyo.—FOLHA ONLINE, BRAZIL.

◼ Oomama abangama-25 ekhulwini eUnited States ababeleki ngendlela eqhelekileyo kodwa benziwa uqhaqho. KwisiXeko saseNew York, elo nani liliphindaphinda kahlanu elowe-1980. Kulula ukulucwangcisa olu tyando, kodwa iingozi ezibangelwa kukwenziwa kwalo ngokungeyomfuneko “azithetheki.”—THE NEW YORK TIMES, United States.

◼ Kule minyaka ili-100 idluleyo, iqondo lobushushu kwisiXeko saseMexico liye lenyuka ngamaqondo ama-4 ngokukaCelsius xa uthelekisa nokunyuka ngeqondo elisisi-0,6 ehlabathini lonke. Iingcali zithi oko kubangelwa kukugecwa kwamahlathi nokwanda kwabemi kwesi sixeko.—EL UNIVERSAL, MEXICO.

◼ Lingaphezu kwesiqingatha inani lamadoda nabafazi abatshatayo eUnited States abebekade behlalisana. Abo bantu banamathuba aphindwe kabini okuqhawula umtshato kunabo bangakhange bahlalisane ngaphambi kokuba batshate.—PSYCHOLOGY TODAY, United States.

Ezona Zinto Zicaphukisayo Emsebenzini

IWashington Post ithi: “Ukukhwaza efowunini, [ukusetyenziswa] kwefowuni enesandisi-lizwi nokukhalazela ukunikwa umsebenzi omninzi zezona zinto zicaphukisayo emsebenzini.” Ezinye izinto ezicaphukisayo emsebenzini “kukuqhogana kweqela elithile phakathi kwabasebenzi, ukufika emva kwexesha emsebenzini, ukuthetha wedwa, ukuncokola nomntu okwenye iofisi evulekileyo, ukungahlambi nokuxhafuza xa usitya.” Kwakhona ezo zinto zicaphukisayo ziyawuchaphazela umsebenzi. Noko ke, abantu abaninzi abaye baphendula xa kwakuphandwa ngale nyewe bathi abazange bathethe nabantu abenza ezo zinto. Eli phephandaba lithi: “Kukho isizathu esivakalayo esibangela ukuba bangakwenzi oko. Aba bantu bakhalazayo basenokuba nabo babekek’ ityala.”

Abantu Abaninzi Bahlala Ezixekweni

ICBC News ithi: “Kwiminyaka emibini ezayo isiqingatha sabantu emhlabeni siza kube sihlala ezixekweni.” Ngokutsho kwengxelo yeZizwe Ezimanyeneyo, iUnited States inomlinganiselo ophakamileyo wabantu abahlala ezixekweni, phantse ibe ngabantu abasithoba kwabalishumi. Kwiminyaka nje engama-55 edluleyo, iNew York neTokyo, kuphela kwezixeko ezibini ezazinabemi abalishumi lezigidi okanye ngaphezulu. Namhlanje, elo nani liye landa laya kufikelela kwizixeko ezingama-20 ezinabemi abangaphezu kwezigidi ezili-10, kuquka iJakarta, isiXeko saseMexico, iMumbai neSão Paulo. UKofi Annan, uSosiba-jikelele weZizwe Ezimanyeneyo uthi: “Ngenxa yokwanda okungaka kwabemi, kufanele kwenziwa iinguqulelo ezinkulu kwezoqoqosho nakwezentlalo kumazwe amaninzi.”

Ukwala Ukwenza Okuthile Ngenxa Yesazela

INational Human Rights Committee of the Republic of Korea ithi ukwala ukungenelela inkonzo yasemkhosini ngenxa yesazela lilungelo elingenakutshintsha. Ikomiti yacebisa ukuba eli lungelo lifanele lihlonitshwe ngokumisela enye inkonzo yaseburhulumenteni. Icebiso leThe Korea Times “liyangqubana” noMgaqo-siseko weNkundla wakutshanje oxhasa umthetho osebenzayo ngoku emkhosini nongenawo nomnyinyiva lo wokwala ukwenza okuthile ngenxa yesazela. INkundla Ephakamileyo yathi uwiso-mthetho kungekhona inkundla lufanele lumisele eli lungelo ngokusemthethweni. Nyaka ngamnye, abafana bakwiRiphabliki yaseKorea abaphakathi kwama-500 nama-700 bavalelwa entolongweni ngenxa yokuba bengavumi ukungenelela inkonzo yasemkhosini. Kule minyaka idluleyo amalungu nama-10 000 amaNgqina aye avalelwa ngenxa yesi sizathu.