Ngaba Kuya Kuvunyelwa Inkululeko Engakumbi Yesazela EMexico?
NGUMBHALELI KAVUKANI! EMEXICO
INKULULEKO yonqulo eMexico yamiselwa ngokusemthethweni. Noko ke, umthetho useneminye imiqobo kwinkululeko yonqulo. Ngokomzekelo, ukungavumi ukuphumeza inkonzo yasemkhosini ngenxa yesazela akwamkelekanga kweli lizwe. Yiloo nto i-Institute of Legal Investigations, of the National Autonomous University of Mexico (iUNAM), yagqiba kwelokuba ibe nongcelele lweentetho ezinomxholo othi “Ukungavumi Ukwenza Okuthile Ngenxa Yesazela EMexico Nasehlabathini.” I-Institute of Legal Investigations yeUNAM ingaphantsi korhulumente, kodwa injongo yayo kukuphanda ngemithetho emisiweyo nokusetyenziswa kwayo. AmaNgqina kaYehova eMexico acelwa ukuba athumele ummeli ukuze anikele intetho enomxholo othi “AmaNgqina KaYehova Nokwala Ukwenza Okuthile Ngenxa Yesazela.”
Oonjingalwazi Bakhupha Imbilini Yabo
Intetho enomxholo othi “Ukungavumi Ukwenza Okuthile Ngenxa Yesazela Nomthetho Wehlabathi Lonke,” eyanikelwa nguGqr. Javier Martínez Torrón, unjingalwazi weGranada University of Law, eSpeyin, yabonisa ukuba inkululeko yesazela nelungelo lokungavumi ukulandela imithetho okanye iimbopheleleko ezithile ngenxa yesazela sele isaziwa ehlabathini lonke. Wakhankanya imeko yamaNgqina kaYehova njengawala ukwenza okuthile ngenxa yesazela eSpeyin netyala likaKokkinakis eGrisi.a
UGqr. José Luis Soberanes Fernández, ongunjingalwazi weInstitute of Legal Investigations yeUNAM, wathetha phantsi komxholo othi “Amava EMexico Kulo Mbandela.” “Malicace elokuba iMexican Law of Religious Associations and Public Worship iyakwalela ukungavumi ukwenza okuthile ngenxa yesazela,” watsho, xa wayebhekisela kwiGatya Lokuqala elithi: “Iinkolelo zonqulo azimkhuphi nangayiphi na indlela umntu ekuthobeleni imithetho yeli lizwe. Akukho mntu uza kubambelela ngezizathu zonqulo ukuze aphephe iimbopheleleko nemisebenzi ebekwe ngumthetho.” Xa equkumbela, uGqr. Soberanes wathi: “Sicinga ukuba kungxamisekile ukuba siwise umthetho ngokuphathelele ukungavumi ukwenza okuthile ngenxa yesazela eMexico.”
Wabhekisela kwisibakala sokuba nyaka ngamnye amakhulukhulu abantwana bamaNgqina eMexico baba neengxaki ngokuphathelele imfundo yabo ngenxa yokwala kwabo ukukhahlela indwe okusuka eBhayibhileni. Bambi babantwana bamaNgqina abavunyelwa nkqu ukuba babhalise esikolweni. Noko ke, ngenxa yokubhenela kwabo kwiKomishoni Yamalungelo Abantu, uninzi lwabo luye lwanikwa ilungelo labo lokufunda. Amanye amagosa emfundo aye athabatha amanyathelo okukhusela abantwana bangagxothwa ezikolweni, kodwa abanye abafundisi-ntsapho baye abayisa so loo migudu. Amanye aye akunyamezela ukuma kwamaNgqina kodwa akukho mgaqo umiselweyo unokulandelwa zizikolo zaseMexico.
Kwakhona kolu ngcelele kwagutyungelwa ukungavumi ukwenza okuthile ngenxa yesazela okwaveliswa zezinye iicawa, njengokunyanzelwa ukuba zisebenze ngeentsuku ezivakalelwa kukuba zingcwele, nemfuneko yokunxiba ngendlela engavisisaniyo neenkolelo zazo zonqulo emisebenzini, njalo njalo. Kwathethwa nangokungavumi ukuphumeza inkonzo yasemkhosini nokungamkeli ezinye iindlela zonyango.
AmaNgqina KaYehova NoKesare
Elinye ilungu leofisi yesebe yamaNgqina kaYehova yaseMexico lenza ushwankathelo lweenkolelo zawo ezisisiseko. Lachaza ukubambelela kwawo kwimigaqo yeBhayibhile enjengalowo ukuLuka 20:25, oxelela amaKristu ukuba ‘abuyisele izinto zikaKesare kuKesare.’ Kwakhona labhekisela kwabaseRoma 13:1, athi amaKristu amele ahlonele amagunya kumazwe ahlala kuwo. Labethelela ingongoma yokuba amaNgqina kaYehova ngabemi abaqhelekileyo abathobela umthetho abazabalazela ukuhlawula iirhafu, ukuphila ubomi obulungeleleneyo, abagcina amakhaya abo ecocekile nabathumela abantwana babo esikolweni.
Kwakhona labalaselisa isizathu esisekelwe eZibhalweni sokuba abantwana abangamaNgqina bangavumi ukukhahlela indwe esinokufunyanwa kwiMithetho Elishumi, ekwiEksodus 20:3-5: “Uze ungabi nathixo bambi ngokuchasene nam. Uze ungazenzeli umfanekiso oqingqiweyo okanye imbonakalo yayo nantoni na esemazulwini phezulu okanye esemhlabeni phantsi okanye esemanzini phantsi komhlaba. Uze ungaqubudi kuzo okanye uqhutyelwe ekuzikhonzeni.”
AmaNgqina kaYehova anqula uThixo kuphela, yaye akaze anqule umfanekiso oqingqiweyo. Noko ke, akasayi kuze abonise ukungawuhloneli umfuziselo okanye awunyelise.
Ukuze kubethelelwe imbono yamaNgqina kaYehova kulo mbandela, kwaboniswa ividiyo ethi Purple Triangles. Le vidiyo ibonisa ukuma ngokuqinileyo kwamaNgqina kaYehova kwiJamani yamaNazi (1933-45). Ibalisa ngabakwaKusserow, intsapho eyabambelela ngokuqinileyo kwiinkolelo zayo ebudeni bolawulo lwamaNazi.b
Kwachazwa isizathu esingokweZibhalo sokuba amaNgqina kaYehova angavumi ukutofela igazi. (Genesis 9:3, 4; IZenzo 15:28, 29) Kwachazwa ilungiselelo leeKomiti Zokunxibelelana Nezibhedlele ehlabathini lonke. Ukongezelela, kwabalaseliswa indlela abaphumelela ngayo oogqirha abanentsebenziswano ekutyandeni amaNgqina kaYehova ngaphandle kwegazi.
Suku ngalunye abantu abamalunga ne-100 babesiza kolu ngcelele lweentetho, uninzi lwabo lwalungamagqwetha. Kwakukho nabameli beOfisi Yemibandela Yonqulo eMexico. Bonke ababekho baphulaphula imbono yeengcali ngokuphathelele ukuhlonelwa kokungavumi ukwenza okuthile ngenxa yesazela. Le ngcamango isentsha kwabo bajongene nokuwisa imithetho eMexico, nangona yamkelwe ngokubanzi kumazwe alawula ngedemokhrasi njengeFransi, iPortugal, iSpeyin neUnited States, kwakunye nakwamanye amazwe awayesakuba ngawobuKomanisi njengeCzechia neSlovakia.
[Imibhalo esemazantsi]
a Bona inqaku elithi “INkundla Ephakamileyo YaseYurophu Inikela Ilungelo Lokushumayela EGrisi” nelithi “Ukuzikhusela Ngokusemthethweni Iindaba Ezilungileyo,” kwinkupho yeMboniselo kaSeptemba 1, 1993 nekaDisemba 1, 1998.
b Bona IMboniselo kaSeptemba 1, 1985, phantsi komxholo othi, “Ukuthandwa KukaThixo Yintsapho Yam Phezu Kwako Nje Ukubanjwa Nokufa.” Bona kwanenkupho kaJanuwari 15, 1994, iphepha 5.
[Umfanekiso okwiphepha 13]
AmaNgqina kaYehova eMexico ayayixabisa inkululeko yawo yokushumayela