Ukuphulul’ Usana?

UMBHALI KAVUKANI! ESPEYIN

UANITA, umama oselula waseNigeria uhlamba usana lwakhe aze aluphulule ngobunono. Yena nosana lwakhe bonwabile. UAnita uthi: “Le yinto eyenziwa ngoomama baseNigeria kwiintsana zabo. Umama wayedla ngokusiphulula mna nabantakwethu. Ukuphulula yeyona ndlela ibalaseleyo yokomeleza izihlunu zosana luze luzive luhlaziyekile. Ngoxa ndiluphulula ndiyaluculela ndize ndithethe nalo yaye nalo luyancuma. Ukuphululwa kukwenza uvuye!”

Ukuphululwa kweentsana yinto eqhelekileyo kumazwe amaninzi yaye ixhaphakile kumazwe aseNtshona. Ngokutsho kweSpanish Association for Infant Massage, ukuphulula usana yindlela engangqalanga, umzali ancokola ngayo nosana lwakhe nendlela abonisa ngayo iimvakalelo zakhe. Oku kuquka ukuphulula iinyawo nemilenze yosana kwanomqolo, isifuba, isisu, iingalo nobuso.

Ukuphululwa kulunceda ngantoni usana? Ngaphezu kwako konke, usana luziva luthandwa yaye luthantanyiswa. Usana olusandul’ ukuzalwa alufuni nje kuphela ukondliwa kodwa lufuna uthando lwabazali. Ekubeni usana lusiva xa luphathwa, ukuphululwa ngobunono ngumama okanye utata kudlulisela olo thando. Inkcazelo eninzi inokudluliselwa elusaneni ngokuthetha nalo nangeemvakalelo. Ukuphulula usana kunokubangela umanyano lothando phakathi kosana nomzali ukususela nje ekuzalweni kwalo.

Ngaphandle kokubonisa uthando, ukuphulula usana kulwenza lulale kakuhle luze lungaxinezeleki. Kwakhona ukuphulula usana komeleza izihlunu zalo, igazi lihambe kakuhle, kuphucule inkqubo yokwetyisa kuze kuluncede luphefumle kakuhle. Abanye abantu bathi oku kuphucula nenkqubo yokuzikhusela komzimba wosana kwizifo. Ngenxa yokuba isivamvo—sokuchukumisa, esokubona nesokuva zivuseleleka, ukuphulula usana kusenokulwenza luzikhumbule izinto yaye lukuthande nokufunda.

Ezinye izibhedlele ziye zakuhlolisisa ukubaluleka kokuphululwa kweentsana. Ngokomzekelo, kolunye uhlolisiso kuye kwafunyaniswa ukuba iintsana ezizelwe ngaphambi kwexesha eziye zaphululwa zinokuphuma esibhedlele kwiintsuku ezisixhenxe ngaphambili kunezo zingakhange ziphululwe yaye ubunzima bazo banda ngama-47 ekhulwini kunezo zingakhange ziphululwe.

Kuyabonakala ukuba asingobantu badala kuphela abancedakalayo ngokuphululwa komzimba wabo! Kakade ke, ukuphulula usana kungaphezulu kunokolula izihlunu. Zizandla ezinothando neminwe ephatha ngobunono, kuquka noncumo olukhulu.