Abantu Abaselula Bayabuza . . .
Ndifanele Ndenze Ntoni Ngobomi Bam?
“Ekuqaleni, ndandingazikhathazi ngekamva lam. Kodwa njengokuba ndandiza kugqiba esikolweni, kwakuza kufuneka ndijamelane nobomi, ndisebenze. Kwakhona, kwakuza kufuneka ndijamelane neendleko zokuphila.”—UAlex, oneminyaka eli-17 ubudala.
XA WAWUNGUMNTWANA, ngaba wawuphupha ngokuba uza kuba yintoni xa umdala? Uvakalelwa njani ngoku ngaloo mabhongo wawunawo? Ngaba akukayazi indlela oza kuzixhasa ngayo xa sele umdala? Ukuba kunjalo, akuwedwa. Incwadi iCareer Coaching Your Kids ithi: “Umsebenzi ubani aza kuziphilisa ngawo xa emdala yenye yeengxaki ulutsha olujamelene nazo.”
Kwelinye icala, usenokuba akucingi nokucinga ngomsebenzi. Mhlawumbi eyona nto ucinga ngayo lulonwabo. Akukho nto iphosakeleyo ngokuzonwabisa, kuba iBhayibhile ithi, “yonwaba ngethuba lobutsha bakho!” (INtshumayeli 11:9, IBhayibhile yesiXhosa yowe-1996.) Noko ke, ngoku lixesha elifanelekileyo lokuba uqalise ukucinga ngoko uza kukwenza ngobomi bakho. IMizekeliso 14:15 ithi: “Onobuqili uyawaqwalasela amanyathelo akhe.” Unokuwaqwalasela njani awakho?
‘Qiqa Phambi Kokubeka Unyawo Lwakho Endleleni’
Masithi uceba ukuthabath’ uhambo olude. Mhlawumbi uya kujonga imaphu ukuze uqiniseke ngendlela eya kuloo ndawo. Oku kuyafana nokucebela ikamva. UMichael oselula osebenza kwelinye lamasebe amaNgqina kaYehova, uthi: “Zininzi izinto onokukhetha kuzo.” Yintoni oyikhethayo? UMichael uthi: “Oku kubandakanya usukelo lwakho.”
Cinga ngosukelo njengendawo oya kuyo. Akunakufika apho uya khona ngokuzulazula nje. Kunokuba bhetele ukuba, ngokungathi kunjalo, usebenzise imaphu ukuze uqiniseke ngendawo oya kuyo. Ngaloo ndlela, uya kube ulandela isibongozo esikwiMizekeliso 4:26 esithi: “Wugudise umkhondo wonyawo lwakho.” IBhayibhile yesiXhosa yowe-1996 iyiguqulela ngale ndlela le ndinyana: “Qiqa phambi kokuba ubeke unyawo lwakho endleleni.”
Kwiminyaka ezayo, uza kwenza izigqibo ezininzi ezibalulekileyo njengonqulo, umsebenzi, ukutshata, ukuba nentsapho nezinye izinto ezibalulekileyo. Kuya kuba lula ukwenza ukhetho lobulumko ukuba kuqala uyazi apho usingise khona. Yaye njengokuba uceba ngobomi bakho, kukho inkalo ongamele uyibethe ngoyaba.
“Khumbula uMdali Wakho”
Ukuba ngokwenene ufuna ukonwaba, ufanele uthobele amazwi kaKumkani uSolomon osisilumko athi: “Uze umkhumbule uMdali wakho ngemihla yobutsha bakho.” (INtshumayeli 12:1, IBhayibhile yesiXhosa) Indlela oyikhethileyo ebomini ifanele iphenjelelwe ngumnqweno wokukholisa uThixo.
Kutheni oko kubalulekile? KwiSityhilelo 4:11 iBhayibhile ithi: “Ufanele, Yehova, Thixo wethu, ukwamkela uzuko nembeko namandla, ngenxa yokuba wadala zonke izinto, nangenxa yokuthanda kwakho zabakho yaye zadalwa.” Ewe, zonke izidalwa eziphilayo ezulwini nasemhlabeni zinesizathu sokumbulela uMdali. Ngaba uyambulela ngenxa yokuba ekunike “ubomi nempefumlo nezinto zonke”? (IZenzo 17:25) Ngaba uziva unyanzelekile ukuba unikele ngokuthile kuYehova uThixo ukubonisa uxabiso ngezinto zonke akwenzele zona?
Lukhumbula uMdali walo, ulutsha oluninzi olungamaNgqina kaYehova luye lwakhetha ukuba kwinkonzo yexesha elizeleyo. Isibakala esingenakukhanyelwa sesokuba, ukuba kwinkonzo yexesha elizeleyo lusukelo oluhle yaye luneentsikelelo ezininzi. (Malaki 3:10) Kodwa kufuneka ucebe kwangaphambili. Ngokomzekelo, zibuze, ‘Bubuphi ubuchule nobugcisa endinabo endinokubusebenzisa ukuze ndizixhase xa ndikwinkonzo yexesha elizeleyo?’
UKelly ngoku oneminyaka engama-27 ubudala waqalisa ukuceba xa wayeselula. Wayezimisele ukuba kwinkonzo yexesha elizeleyo. Kwiminyaka yakhe yokugqibela ekwishumi elivisayo, uKelly waqalisa ukucinga ngomsebenzi awayeza kuwenza. Uthi: “Wakhetha umsebenzi owawuza kumnceda akwazi ukuzixhasa xa ekwinkonzo yexesha elizeleyo.”
UKelly waqeqeshelwa ukuba abe ngumncedisi kagqirha wamazinyo ngoxa wayesesikolweni samabanga aphakamileyo. Waphuma phambili nakukhuphiswano olwalwenziwe ngurhulumente. Kodwa oko akuzange kumenze alulibale usukelo lwakhe. UKelly uthi: “Eyona nto ndiyifunayo kukuba kwinkonzo yexesha elizeleyo. Yonke enye into iyalandela.” UKelly usakuvuyela ukuba kwinkonzo yexesha elizeleyo. Uthi: “Ndivakalelwa kukuba isigqibo endasenzayo sesona sifanelekileyo kwendakha ndazenza.”
Cela Amacebiso
Ukuba ukwindawo ongayiqhelanga, ubuya kucela ukwalathiswa—kwanokuba unayo imaphu. Unokwenza okufanayo xa uceba ikamva lakho. Cela amacebiso kwabanye abantu. IMizekeliso 20:18 ithi: “Amacebo ayamiselwa ngokuqinileyo ngengcebiswano.” Kakade ke, abazali bakho ngabona banokukunceda. Kwakhona unokulifuna icebiso kumaKristu aqolileyo, ubomi babo obubonisa ubulumko bobuthixo. URoberto ucebisa esithi: “Jonga abantu abadala abayimizekelo emihle kwibandla okulo okanye kwiingingqi ezikufutshane. Basenokukuxelela izinto ongakhange uzicinge.”
Ngaphezu kwakhe nabani na, uYehova uThixo ufuna ukukunceda wenze izigqibo ebomini eziya kukwenza wonwabe. Ngoko ke, mcele akuncede ‘uqhubeke ukuqonda into okuyiyo ukuthanda kwakhe’ xa uceba ikamva. (Efese 5:17) Ukuba uthembela kuYehova ngentliziyo yakho yonke, “uya kuwenza uthi tye umendo wakho.”—IMizekeliso 3:5, 6.
Amanye amanqaku athi “Abantu Abaselula Bayabuza . . .” anokufunyanwa kwiWeb site ethi www.watchtower.org/ypa
OFANELE UCINGE NGAKO
◼ Bubuphi ubuchule nobugcisa onabo?
◼ Ngaba ungacinga ngendlela ubugcisa onabo onokubusebenzisa ngayo ukuze udumise uYehova?
◼ Yiyiphi inkonzo yexesha elizeleyo kwezikhankanywe kweli nqaku ebangel’ umdla kuwe?
[Ibhokisi ekwiphepha 23]
AMAGINGXIGINGXI
IBhayibhile ithi: “Abo bazimisele ukuba zizityebi beyela ekuhendweni nasemgibeni, nakwiminqweno emininzi engekho ngqiqweni neyenzakalisayo, ekhokelela entshabalalweni nasekonakaleni.” Ukufuna ukuba sisityebi kunamagingxigingxi! Ekugqibeleni, kunokukukhokelela ekubeni ube namatyala, amaxhala nokuba buthathaka ngokomoya.—1 Timoti 6:9, 10.
[Ibhokisi/Imifanekiso ekwiphepha 24, 25]
UBUVULINDLELA
Uvulindlela ngumKristu obhaptiziweyo ongumzekelo osebenza iiyure ezingama-70 nyanga nganye eshumayela iindaba ezilungileyo zoBukumkani bukaThixo. Ngenxa yoqeqesho namava, oovulindlela baba nobuchule njengabafundisi beBhayibhile.
INKONZO YASEBHETELI
Amalungu entsapho yaseBheteli asebenza kwiiofisi zamasebe zamaNgqina kaYehova apho ancedisa ukulungisa, ukuvelisa nokuthumela uncwadi lweBhayibhile. Wonke umsebenzi eBheteli ulilungelo lenkonzo elingcwele.
UKUSHUMAYELA APHO KUFUNEKA ABAVAKALISI BOBUKUMKANI ABANGAKUMBI
Abanye oovulindlela bafudukela kwimimandla ekufuneka kuyo abavakalisi boBukumkani abangakumbi. Abanye bafunda ulwimi lwasemzini baze babe kwibandla lasekuhlaleni elithetha olo lwimi okanye baye kwelinye ilizwe.
ABAKHONZI BAMAZWE NGAMAZWE
Aba bakhonzi bamazwe ngamazwe baya kumazwe asemzini besiya kuncedisa ekwakhiweni kwamasebe neeHolo zoBukumkani. Le yinkonzo engcwele efanayo naleyo yayisenziwa ngabo babesakha itempile kaSolomon.—1 Kumkani 8:13-18.
ISIKOLO SOKUQEQESHA ABALUNGISELELI
Kangangeeveki ezisibhozo abadala abangatshatanga nezicaka zolungiselelo ezifanelekayo, baqeqeshelwa ukulungelelanisa izinto nokuthetha esidlangalaleni. Abanye abaphumeleleyo kwesi sikolo babelwa kumazwe abo, abanye babelwa kwamanye amazwe.
INKONZO YOBUVANGELI BASEMAZWENI
Oovulindlela abafanelekayo abaphile qete nabayilungeleyo le nkonzo baqeqeshelwa ukuya kumazwe asemzini. Abavangeli basemazweni baphila ubomi obuchulumancisayo nobanelisayo.
[Ibhokisi/Umfanekiso okwiphepha 24]
WHAT WILL I DO WITH MY LIFE?
Kule vidiyo, eshicilelwe ngamaNgqina kaYehova, kwenziwe udliwano-ndlebe olunyanisekileyo nolutsha olusuka eBrazil, eBritani, eJamani naseUnited States. Kungekudala, le vidiyo iza kufumaneka ngeelwimi eziliqela.
[Umfanekiso okwiphepha 23]
“Kufuneka ube nosukelo.”—UMichael, ilungu lentsapho yaseBheteli
[Umfanekiso okwiphepha 24]
“Esi sisigqibo esifanelekileyo kwendakha ndazenza.”—UKelly, obe nguvulindlela othe ngxi kangangeminyaka emithandathu
[Umfanekiso okwiphepha 25]
“Jonga abo bayimizekelo emihle.”—URoberto, ilungu lentsapho yaseBheteli