Abantu Abaselula Bayabuza . . .
Ndinokuwoyisa Njani Lo Mkhwa?
“Ndaqala ukuphulula amaphambili xa ndandineminyaka esibhozo ubudala. Kamva ndafunda ngembono kaThixo ngalo mba. Ndandisiba nomvandedwa ngalo lonke ixesha ndiphulula amaphambili. Ndandidla ngokuzibuza, ‘UThixo unokumthanda njani umntu ofana nam?’ Ndandiqinisekile ukuba andisoze ndilibone ihlabathi elitsha likaThixo.”—ULuiz.a
KUSENOKWENZEKA ukuba nawe, njengoLuiz, ulikhoboka lomkhwa wokuphulula amaphambili. Uyayazi ukuba ukunganikezeli kwakho nokubonisa ukuzeyisa okusisiqhamo somoya oyingcwele kaThixo kuyamvuyisa uYehova. (Galati 5:22, 23; 2 Petros 1:5, 6) Kodwa uyanikezela ngamanye amaxesha. Ngalo lonke ixesha unikezela, ucinga ukuba unguncanyelweni yaye akukwazi ukuphila ngokuvisisana nemilinganiselo kaThixo yobulungisa.
Leyo yindlela uPedro oselula awayevakalelwa ngayo. Uthi: “Xa ndandinikezela ndandiziva ndingungantweni. Ndandicinga ukuba andinakuze ndixolelwe ngoko ndikwenzileyo. Kwakunzima ukuthandaza. Ndandidla ngokuqala ngokuthi: ‘Yehova andazi nokuba uza kuwuphulaphula kusini na lo mthandazo, kodwa . . .’” Ityendyana lomfana, uAndré wayevakalelwa ngendlela efanayo. Uthi: “Ndandiziva ndingumhanahanisi. Kwakunzima ukwehla ebhedini kusasa ukuze ndijamelane nosuku. Kwakunzima ukuya kwiintlanganiso zebandla okanye ukuya entsimini.”
Ukuba uvakalelwa njengoLuiz noPedro okanye uAndré, musa ukukhathazeka. Asinguwe wedwa ojamelene nale ngxaki kwaye akukabi nguye uncanyelweni! Abantu abaninzi abaselula—nabakhulileyo—baye balwa nalo mkhwa wokuphulula amaphambili yaye baye bawoyisa. Nawe unako.b
Ukujamelana Nokuziva Unetyala
Njengokuba sele sibonile, abo baphulula amaphambili basoloko bethuthunjiswa kukuziva benetyala. Ngokuqinisekileyo, ukuziva “ubuhlungu ngendlela yobuthixo” kuya kukukhuthaza ukuba uwoyise lo mkhwa. (2 Korinte 7:11) Kodwa ukuziva unetyala kakhulu kunokuba yingozi. Unokudimazeka uze uvakalelwe kukuba ufuna ukunikezela ngokupheleleyo.—IMizekeliso 24:10.
Khawube nembono ephangaleleyo ngalo mbandela. Ukuphulula amaphambili lolunye uhlobo lokungcola. Usenokuba ‘likhoboka leminqweno neziyolo ezahlukahlukeneyo,’ yaye oku kunempembelelo eyonakalisa ingqondo. (Tito 3:3) Kwangaxeshanye, ukuziphulula amaphambili akusiso isono esinzulu sokuziphatha kakubi ngokwesini, njengokuba neentlobano zesini. (Efese 4:19) Ngaloo ndlela, ukuba unengxaki yokuphulula amaphambili akumele ucinge ukuba wenze isono esingaxolelekiyo. Ukuze ukwazi ukuphumelela ufanele woyise umnqweno wokuphulula amaphambili uze ungaze unikezele!
Ngamanye amaxesha emva kokuba uye wanikezela, usenokudimazeka. Xa oko kusenzeka, khumbula amazwi akwiMizekeliso 24:16 athi: “Ilungisa lisenokuwa kasixhenxe, yaye ngokuqinisekileyo liya kuvuka; kodwa abangendawo baya kwenziwa bakhubeke ngentlekele.” Ukuwela esonweni akuthethi ukuba ungumntu ongendawo. Ngoko musa ukunikezela. Kunoko, zama ukufumanisa oko kubangele ukuba unikezele, uze ukuphephe oko.
Kunokuqhubeka uzigxeka ngenxa yengxaki onayo, khawuziph’ ixesha uze ucamngce ngothando nenceba kaThixo. Umdumisi uDavide, naye owayenamaxesha okuba buthathaka, wathi: “Njengoyise obenzela inceba oonyana bakhe, uYehova ubenzele inceba abo bamoyikayo. Kuba yena uyakwazi ukuyilwa kwethu, ekhumbula ukuba siluthuli.” (INdumiso 103:13, 14) Ewe, uYehova uyakwazi ukungafezeki kwethu kwaye usoloko “ekulungele ukuxolela” xa sisona. (INdumiso 86:5) Kwelinye icala, ufuna nathi senze umgudu wokuphucula.
Ziziphi izinto onokuzenza ukuze ukwazi ukoyisa lo mkhwa nokuze ungaweli kuwo kwakhona?
Ukubaluleka Kokuthetha Nomnye Umntu
Nakuba isini siyinto ethethwa esidlangalaleni kumazwe amaninzi, kwabany’ abantu kusenzima ukuthetha ngesini ngendlela enesidima. Ukuba neentloni kusenokukwenza kube nzima ukuthetha ngesini nakumntu omthembileyo. Omnye umKristu owayenengxaki yokuphulula amaphambili kangangeminyaka wathi: “Akwaba ndandiqwebe isibindi ndaza ndathetha nomnye umntu ngoxa ndandiselula! Ndakhathazwa ngumvandedwa kangangeminyaka emininzi yaye oku kuye kwachaphazela ulwalamano lwam nabanye abantu, yaye ngaphezu kwako konke, noYehova.”
Ufanele uthethe nabani? Okona kubhetele kukuthetha nomntu oqolileyo ngokomoya, ukuba kunokwenzeka, umzali. Usenokuqala ngokuthi: “Singathetha ngengxaki endikhathaza kakhulu?”
UMário, wacinga ngokuthetha noyise, owabonisa uvelwano nokuqonda. Uyise wamxelela uMario ukuba naye wakha wanengxaki efanayo xa wayeselula. UMario uthi: “Utata wayenyanisekile yaye wandikhuthaza kakhulu. Ndazixelela ukuba, ukuba naye wawoyisa lo mkhwa nam ndinako. Ndavuyiswa kakhulu sisimo sengqondo sikatata kangangokuba zathi waxa iinyembezi.”
UAndré waqweba inkalipho yokuthetha nomnye umdala yaye uvuya kakhulu kuba wenjenjalo.c Lo mdala wayezibambe ngeenkophe iinyembezi njengoko wayephulaphule. Ndakugqiba ukuthetha, wandiqinisekisa ukuba uYehova uyandithanda. Wandixelela ukuba le ngxaki yayixhaphakile. Waza wathi uza kuyijonga inkqubela endiyenzayo aze andinike nenye inkcazelo ekwiimpapasho zeBhayibhile. Ukuthetha naye kwandenza ndafuna ukulwa nalo mkhwa—nakuba ndandinikezela ngamanye amaxesha.”
NjengoMario noAndré, usenokufumana uncedo ukuze uphumelele ekoyiseni umkhwa wokuphulula amaphambili. Landela la macebiso akwibhokisi ethi, “Yilwa Nomkhwa Wokuphulula Amaphambili.” Ewe, qiniseka ukuba uza kuphumelela kweli dabi!
Amanqaku angakumbi athi “Imibuzo Yabantu Abaselula . . .” afumaneka kule Web site www.watchtower.org/ype
[Imibhalo esemazantsi]
a Amagama kweli nqaku atshintshiwe.
b Abantu abacatshulwe kweli nqaku ngabafana kodwa maninzi amabhinqa alwa nokuphulula amaphambili. Noko ke, la macebiso asebenza kuwo wonk’ umntu. Phawula ukuba eli nqaku lithetha ngomntu oziphulula ngokwakhe amaphambili. Ukwenza oku nomntu ongatshatanga naye eBhayibhileni kuguqulelwe ngokuthi luhenyuzo, isono esinzulu kakhulu kuThixo.—Funda inqaku elithi “Imibuzo Yabantu Abaselula . . . Yintoni Ephosakeleyo Ngokuba Neentlobano Zesini Ngaphambi Komtshato? kwinkupho yethu ka-Agasti 8, 2004, iphepha 12-14.
c Ibhinqa eliselula lisenokuthetha nonina okanye omnye udade oqolileyo ebandleni.
OMELE UCINGE NGAKO
◼ Kutheni kubalulekile ukwazi ukuba uYehova “ukulungele ukuxolela”?—INdumiso 86:5.
◼ Ngawaphi amanyathelo oza kuwathabatha ukuze uyeke ukuphulula amaphambili?
◼ Kutheni ungafanele ube neentloni ekuceleni uncedo?
◼ Unokuphumelela njani ekugcineni intliziyo yakho icinga ngezinto ezinyulu?
[Ibhokisi/Umfanekiso okwiphepha 19]
Ukunikezela Akuthethi Ukuthi Woyisiwe!
Kulula ukucinga ngolu hlobo: ‘Kuyafana, ndoyisiwe, nokuba ndinganikezela.’ Yilwa nomoya onjalo. Musa ukuyekelela xa uthe wanikezela okwexeshana okanye ngamathuba athile, oku akuthethi ukuba unguncanyelweni.
Masenze umzekelo: Ukuba ubukwizinyuko uze utyibilike inyathelo elinye okanye amabini, ngaba unokuthi ‘Kuza kufuneka ndiye kuqala ekuqaleni ndize ndinyuke kwakhona’? Akunjalo. Kutheni ke usebenzisa le ndlela iphosakeleyo yokucinga xa kufuneka ulwe nomkhwa ombi?
Umvandedwa ulandelwa kukudimazeka. Usenokucinga ukuba akunto yanto kwaye akomelelanga ngokwaneleyo ukuba unokulwa nalo mkhwa yaye nantoni na elungileyo ayikufanelanga. Musa ukuzivumela ucinge ngendlela yokuziva unetyala ngokugqithiseleyo ngolo hlobo. Oku, kwetha amandla ofanele uwasebenzise ekulweni nalo mkhwa. Khumbula ukuba: Oyena mntu ubalaseleyo wakha wanyathela kulo mhlaba, uYesu Kristu, weza ukuze akhulule aboni, kungekhona abantu abafezekileyo. Akukho namnye kuthi ofezekileyo okwangoku.—Le nkcazelo ifumaneka kuVukani! ka-Aprili 8, 1991, iphepha 15.
[Ibhokisi/Umfanekiso okwiphepha 20]
Yilwa Nomkhwa Wokuphulula Amaphambili!
◼ Yenza ingqondo yakho icinge ngezinye izinto.—Filipi 4:8.
◼ Ziphephe izinto eziya kuphembelela iminqweno ephosakeleyo—INdumiso 119:37.
◼ Thandazela “amandla angaphaya koko kuqhelekileyo.”—2 Korinte 4:7.
◼ Xakeka yimisebenzi yobuKristu.—1 Korinte 15:58.
[Ibhokisi/Umfanekiso okwiphepha 20]
Uncedo Olungakumbi
Inkcazelo eyongezelelekileyo enokukunceda woyise lo mkhwa wokuphulula amaphambili ikwincwadi ethi Imibuzo Yabantu Abaselula . . Impendulo Eziluncedo, epapashwe ngamaNgqina kaYehova.