Ukujamelana Neengxaki Zokuxinana Kweemoto Endleleni
NGUMBHALI KAVUKANI! ESPEYIN
WENZE idinga nogqirha, uphuma ekhaya ucinga ukuba unexesha elaneleyo lokuya apho. Kodwa khang’ ucinge ngokuxinana kweemoto endleleni. Njengokuba ithe chu le moto yakho nexesha lihamba uphelelwa ngumonde. Ekugqibeleni, ufika kwagqirha sele ushiywe lixesha ngesiqingatha seyure.
Enye yezona ngxaki zokuhlala ezixekweni kukuxinana kweemoto endleleni, ngakumbi xa zixinene kangangokuba zithi nca enye emva kwenye yaye kukho nongcoliso lomoya. Okulusizi kukuba le mpilo yemihla ngemihla yabahlali basezixekweni ayinamnyinyiva.
ITexas Transportation Institute inikela ingxelo ethi ngeUnited States: “Ukuxinana kweemoto endleleni kwenzeka kuzo zonke iindawo kungakhathaliseki ubungakanani bedolophu.” Le ngxelo yongezelela ngokuthi abasemagunyeni abanaso isicombululo sale ngxaki yokwanda kwabantu abahlala ezixekweni. Le meko ifana twatse kuzo zonke indawo ehlabathini. Kutshanje abemi baseTshayina babona sele kuxinene iimoto umgama oziikhilomitha ezili-100 yaye kwathabatha iintsuku eziliqela ukuze amapolisa alamle loo ngxaki. Isixeko iMexico, uthotho lweemoto ezigubungela umgama oziikhilomitha ezingama-20 kumbindi wesixeko, uthatha iiyure ezine—nomntu ohamba ngeenyawo angakhawuleza kunezo moto.
Sicacile isizathu sokuba iimoto zezixeko zibe kule ngxaki. Izixeko ziqhubeka zikhula ibe ngoku isiqingatha sabemi behlabathi sihlala ezidolophini. Njengokuba izixeko zikhula, neemoto ziyanda. Omnye umbhali uyichaza ngolu hlobo le ngxaki: “Ngabantu abaninzi yaye baneemoto ezininzi ibe bonke bafuna ukuziqhuba ngemini enye kwiindlela ezixineneyo.”
Kutheni Kunzima Ukucombulula Le Ngxaki
Ukuxhomekeka kwabantu ezimotweni kuthetha ukuba izixeko kufanele zikwazi ukuthwala inani elandayo leemoto. Isixeko saseUnited States, eLos Angeles, sinabemi abazizigidi ezine, kodwa ngoku esi sixeko sineemoto ezingaphezulu kwabemi balapho! Kusenokwenzeka ukuba ezinye izixeko azikafikeleli kweli nqanaba okwangoku, kodwa zimbalwa izixeko ezinokuthwala iimoto zazo. Umongameli weMadrid’s Urban Commission, uCarlos Guzmán uthi: “Izixeko azilungiselelwanga ukuba zibe neemoto.” Izixeko zakudala ezineendlela ezimxinwa zezona zithwaxwa kanobom yile ngxaki, phofu nakwezona zixeko zikhulu zala maxesha, iindlela ezinkulu zixinana kungabikho nendawo yokunyathela, ngakumbi kusasa nasekutshoneni kwelanga. UGqr. Jean-Paul Rodrigue, kwingxelo yakhe ethi “Iingxaki Zothutho Ezidolophini” uthi: “Izixeko ezikhulu ngoku zixinana nangaliphi na ixesha ebudeni bemini, yaye ukuxinana kweemoto kuya kusanda.”
Ekubeni iimoto zithengiswa ngokukhawuleza kunokuba urhulumente ekwazi ukwenza iindlela ezintsha, ukwanda kwenani leemoto konakalisa nezona ndlela zintle. Incwadi ethi Stuck in Traffic—Coping With Peak-Hour Traffic Congestion, ithi: “Isiphetho nesigqibo kukuba, nokuba kwenziwa iindlela ezintsha oko akuyi kunciphisa uxinezeleko lokuxinana kweemoto ezindleleni, ngakumbi ngexesha lokuya nokubuya kwabantu emisebenzini.”
Ukunqaba kweendawo zokupaka iimoto nako kunegalelo kule ngxaki. Nanini na, ezixekweni kukho iimoto ezinyuka zisehla zifuna iindawo zokupaka. Kuqikelelwa ukuba ukungcoliswa komoya okwenziwa ziimoto—ngakumbi ezixekweni—kubulala abantu abangama-400 000 nyaka ngamnye. Ngokutsho kwenye ingxelo, ndlela le ungcole ngayo umoya waseMilan, eItali, ukuphefumla nje umoya wakhona kangangosuku olunye kufana nokutshaya iisigarethi ezili-15.
Enye ilahleko yokuxinana kweemoto ziiyure ezichithwa ngabantu abahleli kwezo moto noxinezeleko abaphantsi kwalo. Kunzima ukucingela indlela abamele bavakalelwa ngayo abantu abahleli kwiimoto ezixinene endleleni, kodwa kolunye uhlolisiso lwaseUnited States, kuye kwaqikelelwa ukuba ukuxinana kweemoto kumazwe angama-75 anezixeko ezikhulu kubalelwa kumawaka ezigidi ezingama-70 zeedola (amawaka ezigidi ezingama-500 eerandi) ngonyaka. Ngaba kukho into enokwenziwa ukuze kubekho umnyinyiva?
Ezinye Iindlela Zokucombulula Le Ngxaki
Ezinye izixeko sele zithabath’ unyawo ekucombululeni le ngxaki. ESingapore, yenye yezona ndawo zineemoto ezininzi emhlabeni, ngenxa yoko, kukho umlinganiselo weemoto ezinokuthengwa ngumntu ngamnye. Kwizixeko zembali ezifana neMilan neBologna eItali, azifunwa nokubonwa iimoto ebudeni bemini kumbindi wesixeko.
Enye indlela esetyenziswa zezinye izixeko “kukurhafela imoto,” abaqhubi kufuneka bakuhlawulele ukungena kumbindi wesixeko. ELondon oku kuye kwasebenza kangangokuba kuye kwanciphisa ukuxinana kweemoto kangangama-30 ekhulwini yaye ezinye izixeko kubonakala ngathi ziza kusebenzisa le ndlela. Kwizixeko ezifana neMexico City, eMexico neSeoul kwiRiphabliki yaseKorea, iimoto zivumelekile ukuba zingene kumbindi wesixeko kuphela ngeentsuku ezithile kuxhomekeka kwindawo esuka kuyo imoto.
Abasemagunyeni bezixeko baye bachitha intywenka yemali ekuphuculeni izithuthi zikawonke-wonke noohola beendlela. Iimoto zalathiswa yinkqubo yekhompyutha elawula iirobhothi yaye ukuba kukho indawo eneemoto ezixineneyo kwaziswa amapolisa ngokukhawuleza. Kwakhona ezindleleni kubakho iindawo ezihamba iibhasi kuphela nezinye iindawo ezitshintsha iimoto ukuba zihambe kwelinye icala xa zixinana. Kodwa ukuphumelela kwezi ndlela zonke kuxhomekeke ekubeni abantu bayasebenzisana kusini na nala matiletile.
Yintoni Wena Onokuyenza?
UYesu wathi: “Zonke izinto, ngoko, enifuna abantu bazenze kuni, yenzani ngokunjalo nani kubo.” (Mateyu 7:12) Elo cebiso lobulumko linokuba luncedo ekunciphiseni ezona ngxaki zinzima zokuxinana kweemoto. Noko ke, kwelinye icala, ukuba abantu bayazingca, nezona meko ziphuculiweyo zinokupatyalaka. Nanga amanye amacebiso aya kukunceda ujamelane lula nokuxinana kweemoto endleleni.
Kwimigama emifutshane ukuhamba nokusebenzisa ibhayisekile kokona kubhetele. Kwimeko ezininzi nayiphi na kwezi inokuba yeyona ikhawulezayo, ilula kwaye isempilweni. Kwimigama emide, ukusebenzisa isithuthi sikawonke-wonke kunokuba lukhetho oluhle. Izixeko ezininzi zizama ukuphucula iibhasi noololiwe ukuze abantu bayeke ukusebenzisa iimoto zabo. Ukusebenzisa ezi ndlela zothutho kunokonga nemali. Nakuba ngamanye amaxesha kusenokufuneka usebenzise imoto yakho kodwa ukuba uza kuya kumbindi wesixeko unokusebenzisa isithuthi sikawonke-wonke.
Ukuba niliqela yaye kufuneka nisebenzise iimoto nisiya calanye, kutheni ningasebenzisi ibe nye ngexesha? Le yenye indlela yokunciphisa iimoto ngexesha elixakekileyo. EUnited States, malunga nama-88 ekhulwini abantu abasebenza kumbindi wesixeko basebenzisa iimoto yaye ababini kwabathathu bahamba bodwa ezimotweni. Incwadi ethi Stuck in Traffic ithi, ukweyisela abantu abaninzi ekubeni baye emsebenzini ngemoto enye “kunokunciphisa kakhulu ukulibaziseka okwenziwa kukuxinana kweemoto ngexesha lekhefu emsebenzini.” Ngaphezu koko, kumazwe amaninzi kukho iindlela ezinendawo ezikhethekileyo apho imoto enabantu ababini okanye ngaphezu inokuhamba khona. Imoto enomntu omnye ayivumelekanga ukuba isebenzise ezo ndawo.
Ukuba uyakwazi ukuhamba nangaliphi na ixesha, zama ukuphepha ukuhamba ngexesha elixakekileyo. Oku kuya kukwenzela lula wena nabanye abaqhubi. Ukuba upaka kakuhle kwiindawo zokupaka iimoto, imoto yakho ayisayi kuba ngumqobo phambi kwezinye iimoto. Kakade ke, nokuba sele ucebe kakuhle kangakanani na, akukho siqinisekiso sokuba akunakubanjezelwa kukuxinana kweemoto. Ngamanye amaxesha, ukuba nesimo sengqondo esihle kunokwenza lukhulu ukuze unciphise uxinezeleko kwabanye.—Funda ibhokisi.
Ngeliphandle, ukuba uhlala kwisixeko esikhulu, imoto ziseza kuxinana. Nokuba kunjalo, ukuba sonke senza okusemandleni ethu yaye sibonisa ububele nomonde kwabanye abaqhubi sinokujamelana lula neengxaki zokuxinana kweemoto.
[Ibhokisi/Umfanekiso okwiphepha 23]
Zola Xa Kuvela Ingxaki Endleleni
UJaime, uqhuba iiteksi zaseMadrid eSpeyin, sele eneminyaka engama-30 ngoku enyamezele ukuxinana kweemoto endleleni. Nantsi indlela enza ngayo ukuze azole xa kuvela ingxaki:
◼ Ndinencwadi endisoloko ndiyifunda. Ngoko xa iimoto zixinene kakhulu, andizikhathazi nganto.
◼ Xa iimoto zithe chu, ndiphulaphula iindaba kunomathotholo okanye iBhayibhile erekhodiweyo. Ngaloo ndlela ndicinga ngenye into kunokuba ndicinge ngokuxinana kweemoto.
◼ Ngokuqhelekileyo, andilikhalisi ixilongo lemoto, ngenxa yokuba liphazamisa abanye yaye kulilize ukwenza oko. Ngokubonisa ububele kwabanye, andixinezelekanga yaye ndinceda nabanye benze okufanayo.
◼ Ndiyazola xa ndidibana nabaqhubi abaneengcwangu yaye ndibapha umtyhi. Ayikho into eyodlula ukuba nomonde.
◼ Nakuba ndizama ukufumana ezinye iindlela eziya kwindawo endiya kuyo, ndixelela abantu abakwiteksi yam ukuba kusenokwenzeka balibaziseke ngenxa yokuxinana kweemoto. Ukuqhuba kwizixeko kwenza kube nzima ukugcina ixesha.