Abantu Abaselula Bayabuza . . .

Ubufanasini—Ndinokubuphepha Njani?

“Xa ndandineminyaka eli-12 ubudala, ndatsaleleka kwenye intombazana esikolweni. Ndandididekile yaye ndandicinga ukuba ndandilifanasini.”—UAnna.a

“Xa ndandikwiminyaka yeshumi elivisayo nakuba ndandingafuni ndanditsaleleka kwabanye abafana. Ndandisazi ukuba indlela endandivakalelwa ngayo yayingaqhelekanga.”—UOlef.

“Ndakha ndaphuzana kwakanye okanye kwakabini nomhlobo wam oyintombazana. Ndandibathanda nabafana, ndandisoloko ndizibuza enoba ndandithanda abafana neentombi kusini na.”—USarah.

NAMHLANJE isimo sengqondo sikavula-zibhuqe siye sakhokelela ulutsha oluninzi ukuba lube ngamafanasini. UBecky, oneminyaka eli-15 ubudala uthi: “Amantombazana amaninzi endifunda nawo acinga ukuba angamafanasini, okanye athanda zonke iintlobo zesini mhlawumbi anomdla kulo naluphi uhlobo lwesini.” UChrista, uneminyaka eli-18 ubudala, kwisikolo afunda kuso izinto ziyafana, uthi: “Kukho amantombazana amabini eklasini yam aye azibika kum. Enye yandibhalela indibuza enoba andifuni ukwazi ukuba kunjani na ukuba neentlobano zesini nenye intombazana.”

Ngenxa yokuba ubufanasini buyinto ebonakaliswa ngokuphandle, mhlawumbi usenokuzibuza: ‘Ngaba ngokwenene kukho into ephosakeleyo ngobufanasini? Kuthekani ukuba nditsaleleke kumntu wesini esifanayo nam? Ngaba oko kuthetha ukuba ndilifanasini?’

Yiyiphi Imbono kaThixo Ngobufanasini?

Namhlanje, abantu abaninzi—nkqu nabefundisi beecawa—bawujonga njengento engenamsebenzi umbandela wobufanasini. Noko ke, iBhayibhile ayisishiyi kwesinomhlwa. Isixelela ukuba uYehova uThixo wenza indoda nebhinqa yaye ulungiselele ukuba iminqweno yesini yaneliswe yindoda nomfazi abatshatileyo kuphela. (Genesis 1:27, 28; 2:24) Akothusi ke ngoko ukwazi ukuba iBhayibhile iyabugatya ubufanasini.—Roma 1:26, 27.

Yinyaniso into yokuba abantu abaninzi basenokuthi iBhayibhile yincwadi eyaphelelwa lixesha. Ngokomzekelo, uMegan oneminyaka eli-14 ubudala ucinga ukuba, “Izinto eziseBhayibhileni azisenanto yakwenza nobomi esibuphila ngoku.” Kodwa kutheni kulula ngabanye ukuthetha ngolo hlobo? Amaxesha amaninzi, kungenxa yokuba imbono yeBhayibhile yahlukile kweyabo. Bayibetha ngoyaba iBhayibhile kuba ingakufundisi oko bafuna ukukukholelwa. Le mbono ibonisa ukungaphangalali, yaye iBhayibhile isikhuthaza ukuba sicinge bhetele kunoko! Enyanisweni, kwiLizwi lakhe, uYehova uThixo usibongoza ukuba siqonde ukubaluleka kwemithetho yakhe nendlela eluncedo ngayo kuthi. (Isaya 48:17, 18) Isengqiqweni ke loo nto. Ngaphezu koko, ngubani oyazi bhetele indlela esenziwe ngayo ngaphezu koMdali wethu?

Njengomntu oselula, kusenokwenzeka ukuba uba neemvakalelo ezahlukeneyo. Kuthekani ukuba unomtsalane kubantu besini esifana nawe? Ngaba oko kuthetha ukuba ulifanasini? Akunjalo. Khumbula ukuba, ‘usentlahleni’ yaye eli lixesha apho iimvakalelo zesini zisenza unothanda. (1 Korinte 7:36) Kangangexesha elithile, ingqondo yakho inokuthabatheka ngabantu besini esifanayo. Kodwa ukuba nalo mtsalane akuthethi ukuba ulifanasini. Xa sitheth’ inyaniso, uhlolisiso lubonisa ukuba ekuhambeni kwexesha ezo mvakalelo ziyaphela. Phofu usenokuzibuza, ‘Ziqala njani ezi mvakalelo?’

Abanye bathi ubufanasini buyimfuza. Abanye bathi ngumkhuba nje oqhelekayo. Kodwa kweli nqaku asifuni ukwenza mpikiswano phakathi “kwendalo nokuzenza.” Inyaniso ikukuba, ibiya kuba kukuzithatha lula izinto ukuba besinokuthi ubufanasini bubangelwa yinto enye. Ubufanasini—njengawo nawuphi na umkhwa—bubonakala buyinto enzima kunawo.

Kungakhathaliseki ukuba bubangelwa yintoni, okubalulekileyo kukuba iBhayibhile iyabugweba ubufanasini. Ngoko ke, umntu onengxaki yokutsaleleka kwisini esifanayo umele azenzele usukelo olunokufikeleleka—umele akhethe ukuyishenxisa loo minqweno. Ngokomzekelo: Kusenokwenzeka ukuba umntu ‘utyekele emsindweni.’ (IMizekeliso 29:22) Kusenokwenzeka ukuba ngaphambili ebedubuleka ngumsindo nanini na. Emva kokufunda iBhayibhile, ufumanise ukuba umele afunde ukuzeyisa. Ngaba oko kuthetha ukuba akanakuze abe nomsindo ebomini bakhe? Ayinakwenzeka loo nto. Noko ke, ngenxa yokuba ekwazi oko kuthethwa yiBhayibhile ngokulawula umsindo, uyazicinezela iimvakalelo zakhe. Kuyafana ke nangomntu otsaleleka ebantwini besini esifana nesakhe, kodwa ngoku ufunde oko iBhayibhile ikutshoyo ngobufanasini. Ngamany’ amaxesha, iimvakalelo ezingafanelekanga zisenokuvela. Kodwa ngokuthobela isiluleko seBhayibhile, loo mntu unokwenza okwahlukileyo kumnqweno wakhe.

Kuyinyaniso ukuba iimvakalelo zobufanasini zinokuba nzulu. Qiniseka ukuba nezona mvakalelo zendele nzulu zinokoyiswa. (1 Korinte 9:27; Efese 4:22-24) Ekugqibeleni nguwe omele alawule ubomi bakho. (Mateyu 7:13, 14; Roma 12:1, 2) Nakuba abanye bekuphikisa oko, unako ukufunda indlela yokoyisa le mikhwa—okanye ubuncinane ungayanelisi le minqweno.

Yikhabe Ngawo Omane Imikhuba Emibi

Unokuziphepha njani izenzo zobufanasini?

◼ Okokuqala Lahlela lonke ixhala lakho kuYehova ngomthandazo, yaye qiniseka ukuba ‘ukukhathalele.’ (1 Petros 5:7; INdumiso 55:22) UYehova uya kukuxhasa ngoxolo “olungaphaya kokuqonda.” Oku kuya ‘kulinda intliziyo yakho namandla akho engqondo’ kuze kukunike “amandla angaphaya koko kuqhelekileyo” ukuze ucezele kude kwiminqweno emibi. (Filipi 4:7; 2 Korinte 4:7) USarah, owayesoloko ekhathazwa kukucinga ukuba uthanda iintombi nabafana, uthi: “Xa kufika ezo ngcinga ndiyathandaza; yaye uYehova uyandixhasa. Ngaphandle kwamandla akhe andinakukwazi ukujamelana nale ngxaki. Umthandazo uluncedo olungummangaliso!”—INdumiso 94:18, 19; Efese 3:20.

◼ Okwesibini Ngenisa ulwazi lweZibhalo engqondweni yakho. (Filipi 4:8) Funda iBhayibhile suku ngalunye. Ungaze uyijongele phantsi indlela enokubumba ngayo ingqondo yakho ize ilole nentliziyo yakho ekwenzeni okulungileyo. (Hebhere 4:12) Umfana ogama linguJason uthi: “IBhayibhile—ingakumbi iZibhalo ezifana neyoku-1 yabaseKorinte 6:9, 10 neyabase-Efese 5:3—zezona zisebenza ngamandla kum. Ndifunda le mibhalo nanini na kuvela iimvakalelo eziphosakeleyo.”

◼ Okwesithathu Cezela kude kwimifanekiso engamanyala neendlela zokuzithethelela zamafanasini, kuba oku kuya kuphembelela iingcamango eziphosakeleyo.b (INdumiso 119:37; Kolose 3:5, 6) Ezinye iifilimu kunye neenkqubo zikamabonwakude zinyanzelisa abantu ukuba bakholelwe kwelokuba ubufanasini yenye indlela yokuphila. UAnna uthi: “Indlela egqwethekileyo yehlabathi yokucinga yachaphazela ingqondo yam kwaye yafika ngexesha endandididekile ngokwesini.” Wongezelela ngokuthi: “Ngoku ndihambela kude kuye nabani na okanye nantoni na ekhuthaza ubufanasini.”—IMizekeliso 13:20.

◼ Okwesine Thetha nomntu omthembileyo uze umchazele indlela ovakalelwa ngayo. (IMizekeliso 23:26; 31:26; 2 Timoti 1:1, 2; 3:10) UOlef owafuna uncedo komnye umdala, uthi: “Icebiso lakhe landinceda kakhulu. Akwaba ndandithethe naye kwangaphambili.”

Unganikezeli!

Eneneni abanye banokuthi konke oku kulilize, yaye umele ulandele oko intliziyo yakho ithi kwenze. Kodwa iBhayibhile ithi unokwenza okubhetele kunoko! Isixelela ukuba amaKristu okuqala awayengamafanasini atshintsha. (1 Korinte 6:9-11) Unokoyisa kweli dabi—nakuba okwangoku usilwa nentliziyo yakho.

Ukuba le minqweno ithabath’ unyawo, unganikezeli okanye ucinge ukuba akunakuncedakala. (Hebhere 12:12, 13) Sonke silwa notyekelo oluphosakeleyo ngamaxesha athile. (Roma 3:23; 7:21-23) Ukuba uyikhaba ngawo omane le minqweno, ekuhambeni kwexesha iya kuthomalala. (Kolose 3:5-8) Ngaphezu koko, kholosa ngoYehova ukuze akunceda. Uyakuthanda yaye uyakwazi oko kukulungeleyo. (Isaya 41:10) Ewe, “kholosa ngoYehova wenze okulungileyo . . . , yaye uya kukunika izicelo zentliziyo yakho.”—INdumiso 37:3, 4.

Amanqaku angakumbi athi “Abantu Abaselula Bayabuza . . .” afumaneka kwiWeb site ethi: www.watchtower.org/ype

[Imibhalo esemazantsi]

OZA KUCINGE NGAKO

◼ Kutheni uThixo ebugweba ubufanasini?

◼ Yintoni omele uyenze ukuze ulwe nomnqweno wobufanasini?

◼ Ngubani onokuzityand’ igila kuye ukuba ufuna ukwahlukana neminqweno yobufanasini?

[Umfanekiso okwiphepha 30]

Cela uncedo kumKristu oqolileyo