Abantu Abaselula Bayabuza
Ndingayichaza Njani Imbono YeBhayibhile Ngobufanasini?
Abantu abeze kwitheko batsho ngentswahla njengoko amabhinqa amabini adlala kumabonwakude encamisana! Abantu ababukeleyo bayothuka baze kamva bakuqhwabel’ izandla oku. Amafanasini akujonga njengoloyiso. Abagxeki bona bathi la mabhinqa athanda amehlo. Nokuba kungasiph’ isizathu kwezi zingasentla, eso senzo siza kuvezwa ngokuphindaphindiweyo kwiindaba zikamabonwakude nakwi-“Internet” kwiintsuku eziza kulandela.
NJENGOKO kuboniswe ngasentla, zimbalwa izinto ekuthethwa ngazo ezindabeni njengaxa umntu odumileyo esitsho phandle ukuba ulifanasini okanye wabelana ngesondo namadoda kunye nabafazi. Abanye abantu bayayincoma inkalipho enjalo; ukanti abanye bathi ngamanyala. Kukho nelinye iqela labantu abaninzi elikujonga oku njengendlela nje eyahlukileyo yokuphila. UDaniel oneminyaka engama-21 ubudala uthi: “Xa ndandisafunda, nkqu nabantwana ababengengomafanasini babesithi unekhethe yaye uyabagweba abanye xa unengxaki ngobufanasini.”a
Indlela abantu abavakalelwa ngayo ngobufanasini inokwahluka kwisizukulwana ngasinye okanye ngokwendawo. Kodwa amaKristu ‘akaphetshethwa yiyo yonke imimoya yeemfundiso.’ (Efese 4:14) Kunoko athobela oko kuthethwa yiBhayibhile.
Ithini iBhayibhile ngobufanasini? Ukuba uphila ngemigaqo yeBhayibhile, unokubaphendula njani abantu abathi unekhethe, uyagweba okanye uwathiyile amafanasini? Makhe sithethe ngendlela onokuyiphendula ngayo le mibuzo ilandelayo.
Ithini iBhayibhile ngobufanasini? IBhayibhile iyenza icace into yokuba uThixo wadala ukuba ibe yindoda nomfazi ababelana ngesini yaye ibe ngabantu abatshatileyo. (Genesis 1:27, 28; Levitikus 18:22; IMizekeliso 5:18, 19) Xa iBhayibhile igweba uhenyuzo ibhekisela kubufanasini nokwabelana ngesondo kwabantu abangatshatanga.b—Galati 5:19-21.
Ukuba umntu uyabuza: “Ubujonga njani ubufanasini?”
Usenokuphendula uthi: “Andiwacaphukeli amafanasini kodwa andivumelani nendlela aziphatha ngayo.”
✔ Khumbula: Ukuba uthobela imigaqo yeBhayibhile, leyo yindlela okhethe ukuphila ngayo yaye unelungelo lokwenjenjalo. (Yoshuwa 24:15) Ungabi neentloni ngeembono zakho.—INdumiso 119:46.
Ngaba amaKristu akafanele ahloniphe bonke abantu kuquka namafanasini? Ewe kunjalo. IBhayibhile ithi: “Hloniphani wonke umntu.” (1 Petros 2:17, iBhayibhile yesiXhosa yowe-1996) Ngoko ke, amaKristu akawacaphukeli amafanasini. Anobubele kubo bonke abantu kuquka namafanasini.—Mateyu 7:12.
Ukuba umntu uyabuza: “Ngaba indlela obujonga ngayo ubufanasini ayikhuthazi abanye ukuba bawacaphukele amafanasini?”
Usenokuphendula uthi: “Akunjalo. Eyona nto ndiyicaphukelayo bubufanasini kungekhona amafanasini.”
✔ Unokongezelela uthi: “Ngokomzekelo anditshayi. Enyanisweni ndiyalonyanya icuba. Kodwa masithi wena uyatshaya. Bendingenakukucaphukela ngenxa yokuba utshaya kanye njengokuba nawe ubungenakundicaphukela ngenxa yendlela endikujonga ngayo ukutshaya—akunjalo? Kunjalo nakwindlela mna nawe esibujonga ngayo ubufanasini.”
Ngaba uYesu akazange athi masamkelane? Ukuba kunjalo, ngaba amaKristu akafanele abamkele ubufanasini? UYesu akazange athi abalandeli bakhe bafanele bamkele zonke iindlela zokuphila. Kunoko, wafundisa ukuba “wonk’ ubani obonisa ukholo kuye” uya kusindiswa. (Yohane 3:16) Ukubonisa ukholo kuYesu kuquka ukuthobela imigaqo kaThixo yokuphila, ezigatyayo ezinye iindlela zokuphila kuquka ubufanasini.—Roma 1:26, 27.
Ukuba umntu uthi: “Abantu abakwazi kuyeka ukuba ngamafanasini kuba bazalwa benjalo.”
Usenokuphendula uthi: “IBhayibhile ayitsho ukuba yintoni ebangela ukuba umntu atyekele kubufanasini nangona ivuma ukuba ezinye izinto zendele ebantwini. (2 Korinte 10:4, 5) Enoba abanye batyekele kubufanasini, iBhayibhile ixelela amaKristu ukuba aziphephe izenzo ezinjalo.”
✔ Icebiso: Kunokuba nibe nisenyusana nisehlisana ngonobangela wenkanuko yobufanasini, gxininisa ukuba iBhayibhile iyabugweba ubufanasini. Unokwenza lo mzekelo: “Abantu abaninzi bathi abanye abantu batyekele ngokwemvelo kubundlobongela, ngenxa yoko abakwazi kubuphepha. (IMizekeliso 29:22) Masithi bekunjalo ngokwenene. Mhlawumbi uyazi ukuba iBhayibhile iyakwalela ukugqajukelwa ngumsindo. (INdumiso 37:8; Efese 4:31) Ngaba loo nto ayikho ngqiqweni ngenxa yokuba kukho abantu abatyekele kubundlobongela?”
UThixo umxelela njani umntu otyekele kubufanasini ukuba ayiphephe loo nto? Ingathi yinkohlakalo noko le. Ukuqiqa ngolo hlobo kusekelwe kwingcamango ephosakeleyo yokuba abantu abakwazi kuzibamba bangasenzi isini. IBhayibhile ithi abantu banako ukuzoyisa iimvakalelo zesini ezingafanelekanga xa befuna.—Kolose 3:5.
Ukuba umntu uthi: “Nokuba awulofanasini, ufanele uyitshintshe imbono yakho ngobufanasini.”
Usenokuphendula uthi: “Makhe sithi mna bendingakuthandi ukungcakaza ngoxa wena ukuthanda. Ngaba bekuya kuba sengqiqweni ukundinyanzela ukuba nditshintshe iimbono zam kuba abantu abaninzi bekhetha ukungcakaza?”
✔ Khumbula: Inkoliso yabantu (kuquka namafanasini) iphila ngemigaqo ethile eyenza ukuba izicaphukele izinto ezifana nokuqhatha, ukucinezela abantu okanye imfazwe. IBhayibhile iyazalela izinto ezinjalo; kwakhona iyazigatya ezinye izenzo zesini, kuquka ubufanasini.—1 Korinte 6:9-11.
IBhayibhile ayithi masenze izinto esingenakukwazi ukuzenza kwaye ayikhuthazi ikhethe. Ekutshoyo nje kukuba abo batyekele kubufanasini nabo batyekele kubantu besini esahlukileyo—bafanele ‘basabe kuhenyuzo.’—1 Korinte 6:18.
Inyaniso kukuba izigidi zabantu abatsaleleka kubantu besini esahlukileyo bayazeyisa nangona behendwa. Phakathi kwabo kukho nabanye abangenathemba lokuba baya kuze batshate nabanye abatshate namaqabane aneziphene angakwaziyo ukwabelana nabo ngesini. Bonwabile nangona bengakwazi ukuba neentlobano zesini. Abo banotyekelo lobufanasini banokwenza okufanayo ukuba bafuna ukukholisa uThixo.—Duteronomi 30:19.
Amanye amanqaku athi “Abantu Abaselula Bayabuza” afumaneka kwiWebhusayithi ethi www.watchtower.org/ype
[Imibhalo esemazantsi]
a Amagama akweli nqaku atshintshiwe.
b Igama elithi “uhenyuzo” eBhayibhileni alibhekiseli kuphela kwiintlobano zesini kodwa nakwizenzo ezinjengokuphulula ilungu lesini lomnye umntu, isini esenziwa emlonyeni okanye ezimpundu.
OZA KUCINGA NGAKO
● Kutheni uThixo ebabekela imithetho yokuziphatha abantu?
● Uzuza ntoni xa uziphatha ngokwemithetho yeBhayibhile?
[Ibhokisi ekwiphepha 24]
KUTHEKANI NGOKUBA NEENTLOBANO ZESINI NAMAKHWENKWE NAMANTOMBAZANA?
Nangona oku kusenziwa ngamakhwenkwe namantombazana, kubonakala ngathi kuxhaphake kakhulu phakathi kwamantombazana. Nazi izizathu ezimbalwa zoku.
● Ukufuna ukuhoywa
“Amakhwenkwe athi amafanasini angamantombazana anomtsalane. Amantombazana angazithembanga aya kwenza nantoni na enokwenza amakhwenkwe awathande.”—UJessica, oneminyaka eli-16 ubudala.
● Ukufun’ ukwazi
“Xa bebona kwiimovie, kumabonwakude nasemculweni kuvezwa amantombazana ancamisanayo, abantwana abakwishumi elivisayo basenokufuna ukuyenza nabo loo nto ingakumbi xa becinga ukuba akukho nto iphosakeleyo ngayo.”—ULisa, oneminyaka engama-26 ubudala.
● Ukutsaleleka
“Kwenye ipati ndadibana namantombazana amabini athandana namakhwenkwe namantombazana ndaza kamva ndeva ngomnye umhlobo wam ukuba ayendithanda. Ndaqala ukuthumela enye yawo imiyalezo yefowuni ndaza nam ndaqalisa ukutsaleleka kuyo.”—UVicky, oneminyaka eli-13 ubudala.
Ukuba ufuna ukukholis’ uThixo ufanele ungazenzi izinto ethi iBhayibhile zingcolile. (Efese 4:19; 5:11) Kodwa kuthekani ukuba nawe utsaleleka kumantombazana nakumakhwenkwe? Abantu abaninzi banokuthi yamkele into oyiyo uze uzichaze ukuba wena utsaleleka kumantombazana nakumakhwenkwe. Noko ke, ufanele wazi ukuba ukutsaleleka kubantu besini esifana nesakho iba yinto efika nje iphinde idlule. ULisette oneminyaka eli-16 ubudala wafumanisa loo nto. Uthi: “Ukuchazela abazali bam ngendlela endivakalelwa ngayo kwandenza ndaziva bhetele. Kwakhona, kwiklasi yebhayoloji esikolweni ndafunda ukuba xa ufikisa iyatshintshatshintsha indlela ovakalelwa ngayo. Ndicinga ukuba, ukuba ulutsha oluninzi beluyazi kakuhle imizimba yalo beluya kuqonda ukuba ukutsaleleka kumntu wesini esifanayo yinto nje yokwexeshana yaye belungayi kuziva lunyanzelekile ukuba lube ngamafanasini.”
Naxa ezakho iimvakalelo zendele kakhulu yaye zingade ziphele, yazi ukuba iBhayibhile ithi: Unokukhetha ukungazenzi izinto eziphosakeleyo.c
[Umbhalo osemazantsi]
c Ukuba ufuna ulwazi olungakumbi sicela ufunde isahluko 28, esinomxholo othi, “Ndinokubuphepha Njani Ubufanasini?” kwincwadi ethi Imibuzo Yabantu Abaselula—Iimpendulo Eziluncedo, Umqulu 2, epapashwe ngamaNgqina kaYehova.
[Umfanekiso okwiphepha 23]
AmaKristu akakoyiki ukungahambi nomndilili