Ulutsha Lusemoyeni!

Khawube nomfanekiso-ngqondweni womntwana wakho oneminyaka elishumi ubudala, enyuk’ esehla ezitratweni ehamba yedwa jwi ezinzulwini zobusuku.

Khawufan’ ucinge nje ngomntwana wakho ofikisayo elungiselela isihikahika setheko emzini wakho, wena ungazi nto tu ngalo nto.

Khawucinge nje ngonyana wakho okanye intombazana, isenza ezinye izitshixo zendlu yakho yaye ezo zitshixo zisenzelwa umntu ongazange wambona nasemdudweni.

UKUBA umntwana wakho uyakwazi ukusebenzisa i-Internet, angazenza lula ezi zinto zingentla. Iphephancwadi iScience News lithi: “Zininzi iindlela abantu abanokudibana ngazo kwi-Internet, ngemiyalezo emide nemifutshane nangeendlela zokuncokola.”

Sekuyinto eqhelekileyo kulutsha ukusebenzisa i-Internet. Ngowama-2004, phantse abantu abasi-9 kwabali-10 eUnited States abaphakathi kweminyaka eli-12 neli-17 ubudala bebesebenzisa i-Internet yaye ifumaneka phantse naphi na ehlabathini.

Yimbinana yabantu enokukuphika ukubaluleka kweInternet. Kodwa ke, ukucinga ukuba ayinabungozi kukuziqaba ngentshongo emehlweni. Ngokomzekelo, ulutsha oluninzi luthe phithi thwanga lufun’ into olungayaziyo kwi-Internet ngaphandle kweliso labazali yaye olunye luzenzela abahlobo ongenakuze wena—nkqu naloo mntwana wakho—nibamemele ekhayeni lenu.

Luqhutywa bubuntwana, olunye ulutsha luthumela iinkcukacha zobuqu neefoto, lubhala iingcinga zalo kwi-Internet. Ngokutsho kukaNjingalwazi uZheng Yan, weState University of New York, ulutsha “alunalo nofifi lokuba bangaphi abantu ababona le nkcazelo, phakathi kwabo bantu kukho nabaxhaphaza abantwana ngokwesini.”

Makhe sinikel’ ingqalelo koko kwenziwa lulutsha kwi-Internet. Oku kunokusenza sizazi iingxaki ezinokwenzeka, sazi izinto ezifunwa ngabantwana bethu size sibone nendlela esinokubanceda ngayo banelise iimfuno zabo. Oku kuya kunceda namaKristu aselula ajamelane nomqobo wokuhlala ethembekile kuThixo ebudeni bale mihla yokugqibela.—2 Timoti 3:1-5.