Okwenzeka Ehlabathini
◼ Ngokutsho kolunye uhlolisiso, “abantu abathetha kwicellphone ngoxa beqhuba, enoba basebenzisa izixhobo ‘zokuthetha bengayibambanga’ bayafana nje nomntu oqhuba enxilile.”—REUTERS NEWS SERVICE, EUNITED STATES.
◼ Kwiinyanga ezintlanu zokuqala kunyaka wama-2006 kwaphangwa abantu abanokuba ngama-30 200 kwiibhasi zikawonke-wonke zesiXeko saseGauatemala. Abaqhubi beebhasi abali-14 okanye abancedisi babo nabantu ababekhwele abali-10 babulawa.—PRENSA LIBRE, EGUATEMALA.
◼ Kumazwe ali-124 awayenenxaxheba kuphando lweWHO ngendlela eliqokelelwa ngayo igazi nendlela yokulixilonga, kwafunyaniswa ukuba amazwe angama-56 “ayengalixilongi igazi labo bonke abantu ukukhangela enoba linentsholongwane iHIV, ihepatitis B ne-C negcushuwa.”—WORLD HEALTH ORGANIZATION, ESWITZERLAND.
◼ EOstreliya abantu abahlalisanayo ngaphambi komtshato banda besusela kwisi-5 ekhulwini ngeminyaka yee-1960 baya kutsho kwabangaphezulu nje kancinane kwama-70 ekhulwini ngowama-2003.—IYUNIVESITHI YASEMELBOURNE, EOSTRELIYA.
Isifo Seswekile—Ubhubhani Wehlabathi Liphela
IThe New York Times ithi ingxelo evela kwi-International Diabetes Federation ibonisa ukuba kwiminyaka engama-20 edluleyo, inani labantu ababenesifo seswekile liye lantinga lisusela kubantu abazizigidi ezingama-30 ukusa kwizigidi ezingama-230. Kumazwe alishumi anabona bantu baninzi abanesi sifo, asixhenxe ngamazwe asakhasayo. Kwenye ingxelo kuthiwa uGqr. Martin Silink, oyintsumpa yalo mbutho wathi: “Isifo seswekile sesinye sezona zifo zibulala abantu abaninzi ehlabathini. Kwamanye amazwe ahlwempuzekileyo, abantu abanesi sifo bafa ngequbuliso.”
Esona Siporo Siphakamileyo Ehlabathini
Esona siporo siphakamileyo ehlabathini, sanikezelwa ngoJulayi 2006, sidibanisa iBeijing nekomkhulu laseTibet, iLhasa, umgama oziikhilomitha ezinokuba ngama-4 000. IThe New York Times ithi: “Esi siporo sisemagqabini yaye sakhiwe phezu kwentaba yekhephu yaye sikwiimitha ezingama-4 800 ngaphezu kolwandle.” Omnye wemiqobo ababefanele bawoyise oonjineli, kukugcina iintsika zesi siporo zingumkhenkce unyaka wonke ukuze sihlale sizinzile. Ngenxa yokuphakama kwaso, kufanele kumpontshelwe umoya kumakhareji kaloliwe, yaye ikhareji ngalinye lineoksijini ukuze umntu ngamnye akwazi ukuphefumla.
“Abafundi Abangekhoyo”
Iphephandaba iLe Figaro lithi abafundi abaqalayo abali-10 ukusa kwabangama-20 ekhulwini ababhalise kwizifundo zolwimi kwenye iyunivesithi yaseFransi “abezi kwizifundo zabo.” Abanye baxhamla inkxaso yemali evela kurhulumente nokuhliselwa amaxabiso kwiinqwelo-moya, kwiihotele, kwizithuthi zikawonke-wonke nakwimiboniso-bhanyabhanya. Ukuze baxhamle kweli cham, aba “bafundi bangekhoyo” babhalisa kwizifundo ezinabantu abambalwa njengesiBelarusia, isiFinnish okanye isiSwahili. Abantu abaninzi bazibhalisa ngobuqhophololo kuba akuqinisekiswa ngobukho babo. Kule ngxelo kuthiwa, “abafundi” bazibhalisa ngekhompyutha baze bafumane amakhadi abafundi kwiintsuku nje ezimbalwa.
‘Wawuvalekile’
IThe Jerusalem Post ithi izazinzulu zakwaSirayeli zikholelwa kwelokuba zifumene izilwanyana ezitsha ezisibhozo ezingenalo ithambo lomqolo kumqolomba “owawuvalekile” kangangeenkulungwane. Abembi bafumana umngxuma omncinane owawukhokelela kumqolomba osezantsi owawuziikhilomitha ezimbini ezinesiqingatha ubude nowawuphumela echibini. Ezi zizilwanyana zitsha zifunyenweyo ezinye zazo ezinjengonomadudwane, ziquka ezibini zaselwandle nezinye ezibini ezihlala emilanjeni kunye nezine ezihlala kumhlaba owomileyo.