Abantu Abaselula Bayabuza . . .

Kutheni Ndisoloko Ndithelekiswa Nabanye?

“Iyandicaphukisa into yokuthelekiswa nabanye ngabazali nootitshala bam.”—UMia.a

“Xa ndithelekiswa nabanye ndisuka ndizive ndingento yanto, kakade ndiyafuna ukufana nalo mntu ndithelekiswa naye.”—UApril.

ESIKOLWENI utitshala wakho uyakugxolisa kuba wena ungafani nomnye ofunda naye kwizibalo. Kowenu, umzali wakho akakuyeki kuba izinto akuziqoqoshi njengodade wenu. Mhlawumbi abanye banokuphosa amazwi ahlabayo afana nokuthi, “Umama wakho wayeyinzwakazi emanz’ andonga xa wayengangawe!” Ngokungathi wena ungxathu. Mhlawumbi uyazibuza “Abantu ababoni na ukuba ndahlukile?” “Kutheni ndisoloko ndithelekiswa nomnye umntu?”

Kutheni ukuthelekiswa nomnye umntu kubuhlungu kangaka? Ngaba kukho into onokuyizuza ngokuthelekiswa nabany’ abantu? Unokujamelana njani nokuthelekiswa nabanye?

Kutheni Ukuthelekiswa Nabanye Kubuhlungu Kangaka?

Isizathu esenza ukuba ukuthelekiswa nomnye umntu kube buhlungu kukuba kuyamnyukutyha. Ngamanye amaxesha, oko abantu bakuthethayo koko kanye ukucingayo ngawe. Ngokomzekelo, uBecky uthi: “Ndikhe ndaqwalasela abantwana abathandwayo esikolweni yaye ndizive sele ndisithi, ‘Akwaba bendinokufana nabo, bendinokuthandwa ngabantu abaninzi.’”

Yintoni le yenza ukuba ungazithembi? Khawucinge ngezinto ezenzeka kuwe emzimbeni, ngokweemvakalelo nasengqondweni. Umzimba wakho utshintshatshintsha lonke ixesha. Ulwalamano lwakho nabazali bakho luya tshintsha. Isimo sakho sengqondo ngabesini esahlukileyo naso asimanga ndawonye. Ngoko ke usenokuzibuza, ‘Ngaba ndikhula ngendlela eqhelekileyo?’

Kusenokwenzeka ukuba ucinga ukuba ekuphela kwendlela onokukwazi ngayo oko kukuzithelekisa nabanye abasebatsha abakutshintsho olufanayo. Ngumgibe ke lowo! Ukuba babonakala ngathi bamelana nolo tshintsho bhetele kunawe, uziva uphelelwa kukuzithemba. Kufike ke ngoku umntu omdala athi ‘Kutheni ungazami ukufana noNozipeqengeshe?’ emva koko uvakalelwe kukuba eyona nto ubuyicinga iyinyaniso—ikho le nto ingalunganga ngendlela okhula ngayo!

UApril uchaza esinye isizathu esenza ukuthelekiswa nabanye kube buhlungu, uthi: “Xa abantu bekuthelekisa nabanye, ngakumbi umntu osondelelene naye, uba nomona nengqumbo.” UMia uyakwazi ukuba kunjani oku. Abazali notitshala wakhe babedla ngokumthelekisa nodade wabo omkhulu. Uthi: “Bandixelela izinto yena awayezenza ngexesha wayelingana nam.” Kumenza azive njani oko? Uthi: “Kundenza ndizive ngathi ndikhuphisana nodade wethu. Ngamanye amaxesha ndifukama ingqumbo xa ndicinga ngaye.”

Ukuthelekiswa kunokuba nemiphumo eyincindi yekhala. Khawucinge ngento eyenzeka kubahlobo abasenyongweni bakaYesu. Ngobusuku bokugqibela ngaphambi kokufa kwakhe, abapostile bakaYesu baba “nempikiswano eshushu.” Kwakonakele phi? Eneneni babethelekisana omnye nomnye bebangisana ngokuba “nguwuphi na kubo obonakala engoyena mkhulu.” (Luka 22:24) Ngaphandle kwamathandabuzo, ezinye iindlela zokuzithelekisa zinokuba yingozi. Kodwa ngaba zonke iindlela zokuzithelekisa ziphosakele?

Indlela Okunokuba Luncedo Ngayo Ukuthelekiswa Nabanye

Khawucinge ngoDaniyeli xa wayengumfana, yena namaqabane akhe amathathu ekuthethwa ngabo eBhayibhileni. Olu lutsha aluzange luvume ukuzenzela ekutyeni kukakumkani waseBhabhiloni okwakusalelwa ngumthetho kaThixo. (Levitikus 11:4-8) Ukuze umngcini walo abancede ekwenzeni oku, uDaniyeli wacela ukuba kwenziwe uvavanyo. Wacela ukuba kangangeentsuku ezilishumi besitya ukutya okwamkelekileyo kumthetho kaThixo, lo mgcini wabo wayefanele athelekise aba bafana bamaHebhere nolunye ulutsha olwalusebhotwe. Waba yintoni umphumo?

IBhayibhile icacisa ngokuthi: “Ekupheleni kweentsuku ezilishumi babekhangeleka bebahle yaye bondlekile kunabo bonke abantwana ababesitya ukutya okuluncuthu kokumkani.” (Daniyeli 1:6-16) Phawula ukuba owona mphumo mhle asikuba uDaniyeli namaqabane akhe babebonakala bezizigantsontso kunabanye abantwana. Kunoko, kukuba olu lutsha lwamaHebhere lwakhetha ukuthobela imithetho kaThixo awayeyinike abantu bakhe.

Ngaba nawe uzibona ukwimeko efanayo nala maHebhere aselula? Ukuba uphila ngokuvisisana nemilinganiselo yeBhayibhile, uya kubonakala wahlukile kolunye ulutsha. Abanye abantu ababona loo mahluko basenokudideka baze ‘bahambe bekutshabhisa.’ (1 Petros 4:3, 4) Noko ke, abanye basenokubona imiphumo yehambo entle baze bafune ukufunda ngoYehova. (1 Petros 2:12) Kwiimeko ezinjalo, ukuthelekiswa nabanye kunokuba yinto entle.

Ikho nenye indlela ukuthelekiswa nabanye ekunokuba yingenelo ngayo. Ngokomzekelo, usenokucinga ukuba wena unikwa umsebenzi omninzi kowenu—xa uthelekiswa nabantwana bakowenu. Abazali bakho basenokucinga ngenye indlela. Ukuze balungise indlela yakho yokucinga, basenokusebenzisa umzekelo oseBhayibhileni baze bathi thelekisa isimo sakho sengqondo nesaloo mntu kuthethwa ngaye eBhayibhileni.

Ngokomzekelo, basenokukukhumbuza ukuba nakuba uYesu wayebizwa ngokuba yiNkosi noMfundisi, ngokuzithandela wazihlamba iinyawo zabafundi bakhe. (Yohane 13:12-15) Basenokukukhuthaza ukuba uxelise umzekelo kaYesu wokuthobeka nesimo sengqondo sokusebenza nzima. Eneneni, iBhayibhile ikhuthaza onke amaKristu, amadala namancinane, ukuba azithelekise noKristu aze azame ‘ukulandela amanyathelo akhe ngokusondeleyo.’ (1 Petros 2:21) Le ndlela yokuzithelekisa isinceda sihlakulele ubuntu obamkelekileyo kuYehova.

Ukujamelana Nokuthelekiswa Kakubi Nabanye

Kuyinyaniso ukuba inokucaphukisa ize idimaze into yokuthelekiswa nabantwana bakowenu okanye abanye oontanga bakho. Unokujamelana njani nale ngxaki? UKumkani uSolomon wathi: “Ingqiqo yomntu ngokuqinisekileyo imenza azeke kade umsindo.” (IMizekeliso 19:11) Ingqiqo inokukunceda njani? Kunganzima ukuba uyiqonde le nto, kodwa umntu okuthelekisa nomnye, umzali okanye utitshala wakho, kunokwenzeka ukuba ufuna ukukunceda. UCathy uthi: “Xa umntu endithelekisa nabanye ndizibuza oku ‘Yintoni le nto kufuneka ndincedwe kuyo?’” UCathy ucinga ukuba, xa efuna indlela anokuzuza ngayo kwindlela athelekiswa ngayo nabanye, akadimazeki okanye acaphuke.

Kuthekani ke ukuba usoloko ulixhoba lokuthelekiswa nabanye? Ngokomzekelo, umzali usenokukuthelekisa nabantwana bakowenu ngendlela noko engathandekiyo. Usenokucela ukuthetha nomzali wakho, ngentlonelo ucacise indlela ovakalelwa ngayo ngokuthelekiswa nabanye. Kusenokwenzeka ukuba umzali wakho akayazi indlela ekuchaphazela ngayo le nto.

Kodwa khumbula ukuba, “kukho ixesha lokuthetha” kanti “kukho ixesha lokuthi cwaka.” (INtshumayeli 3:7) Endaweni yokuba ugqajukelwe ngumsindo xa uthelekiswa nomnye, linda de uthomalale uze uthethe nomzali wakho okanye naloo mntu uye wakuthelekisa nomnye. Ukuba wenza oko, amazwi akho aya kuba yinzuzo nangakumbi.—IMizekeliso 16:23.

Ngamanye amaxesha unokunciphisa indlela oku okunokukwenza buhlungu ngayo ngokukhangela izinto okwaziyo ukuzenza kakuhle. Umpostile uPawulos waxelela uTimoti oku: “Makungabikho mntu ubujongela phantsi ubutsha bakho.” (1 Timoti 4:12) UTimoti wayeselula xa wamiselwa njengomdala. Kusenokwenzeka ukuba abanye babethelekisa uTimoti namanye amadoda amakhulu awayesele enamava. Kodwa ukumthelekisa ngaloo ndlela kwakungenasihlahla. Nakuba wayeselula, uTimoti wafunda lukhulu ngokuhamba noPawulos. UTimoti wayekwazi ukusebenzisa iLizwi likaThixo ngendlela ephumelelayo. Enye into, wayebakhathalele abazalwana noodade bokomoya.—1 Korinte 4:17; Filipi 2:19, 20.

Ngoko ke, xa uphinda uthelekiswa ngendlela engekho sikweni nabanye, zibuze ‘Ngaba oku kugxekwa kuyathetheleleka?’ Ukuba kukho inyani koko kuthethwayo, zama indlela yokufunda kuko. Kodwa ke, ukuba oko kuthelekiswa yintetho nje equkayo—efana nokuthi “Kutheni ungakhe ufane nomntakwenu nje?—zama ukucingisisa nzulu ngaloo mazwi. Zama konke okusemandleni akho ubone oko unokukufunda kwindlela abantu abakuthelekisa ngayo nabanye.

UYehova uThixo akakuthelekisi nomnye umntu. (Galati 6:4) Ukhangela okungaphaya koko kubonakala ngamehlo yaye uyamqonda umntu onguye entliziyweni. (1 Samuweli 16:7) Ewe, uYehova akaboni nje oko ukuko kodwa noko uzama ukuba kuko. (Hebhere 4:12, 13) Uyazi ukuba siyasilela ngamanye amaxesha yaye usoloko ekhangela okuhle esikwenzayo. (INdumiso 130:3, 4) Ukwazi nje ezi zinto kunokukunceda ujamelane nokuthelekiswa nabanye.

Ukuze ufumane amanye amanqaku athi “Imibuzo Yabantu Abaselula . . . ” khangela kwiWeb site ethi www.watchtower.org/ype

[Umbhalo osemazantsi]

OMELE UCINGE NGAKO

◼ Yiyiphi indlela othelekiswa ngayo ongayithandiyo?

◼ Ukuba abazali bakho bakuthelekisa nabanye, unokuyilungisa njani loo ngxaki?

[Amagama acatshulweyo akwiphepha 12]

“Bekunokuba bhetele ukuba umntu ondilulekayo angandixeleli ngegama lomnye umntu athi ‘Kufuneka ufane noZipeqengeshe’ kodwa, abalaselise iimpawu zam ezintle kuqala aze ngendlela efanayo andincede ndibone apho ndinokuphucula khona.”—UNatalie.

[Umfanekiso okwiphepha 13]

Usenokufuna ukuchaza indlela ovakalelwa ngayo xa uthelekiswa nabanye