Into Enenzuzo Ngaphezu Kobugcisa
Kubalisa uRakel Koivisto
Ngowe-1950 icebiso lam lokwenziwa kwelitye lesikhumbuzo lokuzukisa abo babefe ngeMfazwe Yehlabathi II laphuma phambili kukhuphiswano lwaseFinland. Kunyaka kamva, xa kwakutyhilwa elo litye likhulu lenyengane ndandilenzile kumsitho owawuseTuusula, eFinland, ndandingekho. Mandikubalisele into eyenzekayo ukuze ndingabikho.
NDAZALWA ngowe-1917, ndandinguntondo kwintsapho yabantwana abasibhozo eyayihlal’ emaphandleni kumazantsi eFinland. Nangona sasingamahlwempu, ndandonwabile yaye ndikhuselekile. Abazali bam babengabantu abazinzileyo yaye bemhlonela uThixo, yaye basifundisa ukuba sizixabise izinto zokomoya. IBhayibhile eyayithengwe ngutata yayixatyiswe gqitha ekhaya.
Ngoxa ndandingumntwana, ndandidla ngokukrola imifanekiso emthini. Izizalwane zethu zazicinga ukuba ndandisenza izinto ezintle gqitha, ngoko ke zandikhuthaza ukuba ndifundele ubugcisa. Kungekudala, ndamkelwa kwiYunivesithi Yobugcisa yaseHelsinki. Esi sikolo seengcungcu, esasiliziko lobugcisa baseFinland, sasiyindawo entle gqitha kwintombazana ekhulele emaphandleni, yaye ndasithanda gqitha esi sikolo. Xa ndagqiba ukufunda ngowe-1947, ndacinga ukuba kukho ilifa endandinokulishiya kweli hlabathi.
Izinto Zatshintsha
Ngequbuliso izinto zatshintsha. Ngeny’ imini udadewethu uAune weza kum evuya esithi: “Ndiyifumene inyaniso!” Wayefumene incwadi ethi “UThixo Makabe Nenyaniso,” eyayipapashwe ngamaNgqina kaYehova. Ndandingayithandi le ncwadi. Kungekudala emva koko, ndaphawula ukuba enye intombazana endandifunda nayo eyunivesithi nayo yayinale ncwadi. Xa ndandizam’ ukuhlekisa ngayo, le ntombazana yandingxolisa isithi: “Akukho nt’ uyihlekayo! Le ncwadi iza kukunceda waz’ iBhayibhile.” Ndayifumana le ncwadi ndaza ndayifunda phantse yonke ndingakhange ndiyibeke phantsi. Enyanisweni, ndayek’ ukuhlekisa ngayo, yaye ndandiqinisekile ukuba amaNgqina atheth’ inyaniso. Kwakhona ndaqonda ukuba uYehova uThixo undibonise into endandingenakuyifumana kubugcisa—ubomi obungunaphakade.
Ukuqala kwam ukudibana namaNgqina, akazange andimeme kwiintlanganiso zawo. Ngoko ke ndacinga ukuba ngamaNgqina kuphela ayayo. Ngoko ndazibuzela enoba ndingeza kusini na. Ndavuya gqitha ndakuva ukuba kwiintlanganiso zamaKristu kuya nabani na. Ukuya ezintlanganisweni kwalomeleza ukholo lwam, yaye ndenza isigqibo sokwahlulela ubomi bam kuYehova. Esi sigqibo ndasenza saziwa nguwonke-wonke ngoNovemba 19, 1950, xa mna nodadewethu sabhaptizwa. Into eyasivuyisayo kukuba ekugqibeleni, oodadewethu abane nabazali bethu baba ngamaNgqina.
Yintoni Endandiza Kuziphilisa Ngayo?
Ngoxa ndandifunda iBhayibhile namaNgqina, ndandisenza inkqubela kwizifundo zobugcisa. Emva kokuba ndigqibile kwisikolo sobugcisa, ndasebenza njengomncedisi kanjingalwazi wokukrola. Kanye njengokuba nditshilo ekuqaleni, icebiso lam lokuba kwenziwe isikhumbuzo sabo bafa kwiMfazwe Yehlabathi II laphuma phambili. Ndacebisa ukuba kuso kubhalwe amazwi athi “Kuf’ Ayayo,” amazwi awayevakalisa imbono yam etshintshileyo ngemfazwe. (Isaya 2:4; Mateyu 26:52) Xa lo mfanekiso—oziimitha ezi-5 ubude—wawutyhilwa, ndandingekho kuba kuloo mbhiyozo kwakukhuthazwa ukuthand’ ilizwe nto leyo eyayingqubana neenkolelo zam ezisekelwe eBhayibhileni.
Njengoko ndandisiya ndisaziwa ngakumbi njengegcisa, ndaduma baza abantu abangakumbi bafuna ukundinika umsebenzi owawuza kundihlawula imali eninzi. Kodwa, ndandiqinisekile ngezinto eziza kuqala. Nangona ndandiwuthanda umsebenzi endandiwenza, ndandikunqwenela gqitha ukunceda abanye ngokomoya. Ngoko ke ngowe-1953, ndaqalisa ukuba nguvulindlela, umshumayeli wexesha elizeleyo wamaNgqina kaYehova.
Maxa wambi abantu babesithi ndidlala ngesiphiwo endinaso. Kodwa ndandisazi ukuba nantoni na endiyenzayo yobugcisa yayingasayi kuhlala ngonaphakade. Amatye ezikhumbuzo enziwe ngelitye lenyengane ekugqibeleni ayaqhekeka aphele. Noko ke, njengovulindlela, ndandinokusebenzisa phantse lonk’ ixesha lam ndinceda abanye ukuze babe nethuba lokufumana ubomi obungunaphakade! (Yohane 17:3) Phofu ke, andizange ndiyeke ukwenza imifanekiso eqingqiweyo. Ngamaxesha athile, ndandisenza imifanekiso emincinane kuba nje ndiwuthanda lo msebenzi yaye ndandiyithengisa ukuze ndizixhase.
Ukufudukela Kwam Emaphandleni
Ngowe-1957, emva kweminyaka emine ndinguvulindlela eHelsinki, iofisi yaseFinland yamaNgqina kaYehova yandithumela eJalasjärvi, kummandla osemaphandleni waseSouthern Ostrobothnia. Apho ndandiza kusebenza noAnja Keto, owayemncinane kum ngeminyaka eli-17 ubudala. Nangona ndandingamazi uAnja, ndasivuyela esi sabelo ndaza ndaya kusebenza naye. Kwakungekho maNgqina kuloo ngingqi ngaphandle kwethu, ngoko ke, phantse sasisoloko sishumayela sobabini. Kungekudala saba ngumtya nethunga.
Ukufudukela eJalasjärvi kwakuthetha ukubuyela kwiimeko zasemaphandleni, njengendawo endandihlala kuyo ngaphambi kokuba ndenze umsebenzi wobugcisa kwisixeko esilikomkhulu kwiminyaka engama-20 ngaphambilana. Kwakubanda gqitha ebusika, yaye maxa wambi kwakufuneka sihambe kwikhephu elalifika esinqeni. Sasihlala kwigunjana lamaplanga elalingenazo izinto eziphucukileyo. Amanzi sasiwakha kwiqula elikufuphi, yaye ngamany’ amaxesha amanzi ayeqina abe ngumkhenkce ebusuku. Kodwa sasingaswele nto. (1 Timoti 6:8) Elo yayilixesha elimnandi nelixakekileyo.
Ukuxakeka Kumsebenzi Onomvuzo
Noko ke, ekuqaleni kwakubonakala ngathi akukho nto siyenzayo kuba abantu basekuhlaleni babengasithandi. Ukuze sibancede bawuqonde umsebenzi wethu, salungiselela ukubonisa iifilimu ezaziveliswe ngamaNgqina kaYehova, njengethi The New World Society in Action nethi The Happiness of the New World Society. Ezi filimu zabenza basazi thina kunye nentlangano yethu, nto leyo eyabanceda babona ukubaluleka komsebenzi wethu ehlabathini lonke. Abantu abaninzi beza kuzibona ezi filimu.
Ngesinye isihlandlo uEero Muurainen, umveleli ohambahambayo wamaNgqina kaYehova, wabonisa ifilimu eyayisithi The New World Society in Action kwiholo yasekuhlaleni. Kwakuzele kangangokuba ndandingenayo nendawo le yokuma. Kwakufuneka ndime ngomlenze omnye ndingqiyame ngodonga, ekubeni kwakungekho nendawo yokubeka umlenze wesibini. Emva kokuba loo filimu iphelile, abantu abaninzi basimema ukuba sibatyelele.
Kwakhona sasebenzisa iteyiphu enkulu ukuze sidlale iintshumayelo zeBhayibhile ezifama. Ngeny’ imini sathembisa ukudlala enye intetho ngentsimbi yesixhenxe ngokuhlwa emzini weny’ intsapho, yaye sasimeme bonke abantu baloo dolophana. Ekuseni ngolo suku, sahamba ngeebhayisekile sisiya kushumayela kwidolophana ekwiikhilomitha ezinokuba ngama-25 mgama, sicinga ukuba siza kubuya ngaphambi kokuba kurhatyele. Noko ke, ngaphambi kokuba sihambe kwaqalisa ukuna yaye indlela yayiludaka nje.
Ekugqibeleni, amavili eebhayisekile zethu ayezele udaka kangangokuba zazingasakwazi nokuhamba, ngoko ke kwafuneka sizithwale ukugoduka. Ngenxa yoku asizange sikwazi ukuhamba ngexesha ukuya kule ntlanganiso de kwasebusuku. Sayithwala loo teyiphu yethu inzima saza saya kufika ngentsimbi yeshumi ebusuku. Sasicinga ukuba siza kufika bonke abantu sebehambile. Kaloku, akuyazi indlela esothuka ngayo, indlu yayizele ithe qhu, abantu besasilindile! Yakuba ipheleli intetho, sancokola kamnandi. Sagoduka ekuseni ngosuku olulandelayo sidinwe siyimfe, kodwa sivuya ngokwenene!
Iidolophana zazithe qelele kangangokuba amaNgqina alapha asincedisa ukuba sithenge imoto—imoto endala yohlobo lwaseRashiya. Oku kwakwenza kwalula ngakumbi ukushumayela. Kamva, le moto yayisaziwa, kangangokuba ubhishophu waxelela amarhamente akhe ukuba angasamkeli emakhayeni awo. Wawalumkisa ngamanenekazi amabini emoto eluhlaza. Ngoko nangoko, esi silumkiso sabenza abantu banomdla. Babefuna ukuwazi la manenekazi mabini nale nto iwenza abe yingozi kangaka! Lo mdla wavula amathuba amaninzi namnandi okuncokola ngeBhayibhile. Ayinyaniso amazwi kaIsaya athi: “Nasiphi na isixhobo esiya kuyilwa nxamnye nawe asiyi kuphumelela.”—Isaya 54:17.
Kungekudala, umsebenzi wethu wavelisa iziqhamo. Saqalisa ukuqhuba iintlanganiso veki nganye neqela elincinane labantu abanomdla. Ekugqibeleni eli qela landa, yaye ngowe-1962 kwamiselwa ibandla lamaNgqina ali-18, inkoliso ingamabhinqa. Kwiminyaka emibini kamva, mna noAnja safuduselwa eYlistaro, kwakuloo mmandla.
Indawo Ebangel’ Umdla
Sabuvuyela ubuhle nenzolo yasemaphandleni kwesi sabelo sethu sitsha, kodwa sasibavuyela nangakumbi abantu balapha. Inkoliso yabo yayinobubele. Liyinyaniso elokuba, abaninzi kubo babeluthanda gqitha unqulo nelizwe labo, yaye ngamany’ amaxesha babesigxotha kakubi, kodwa abanye babeyihlonela gqitha iBhayibhile. Ngamaxesha amaninzi xa sasikhuph’ iBhayibhile, abafazi babenqumama kwimisebenzi yabo baphulaphule yaye amadoda ayekhulula iminqwazi—iminqwazi eyayisoloko isentloko. Ngamany’ amaxesha xa sifunda iBhayibhile, intsapho yonke, kuquka nabamelwane babedla ngokuza kweso sifundo.
Abantu abanyanisekileyo endadibana nabo entsimini bandivuselela kumsebenzi wam wobugcisa. Xa ndinexesha, ndandidla ngokuthabath’ udongwe ndize ndiqalise ukwenza umfanekiso othile. Ekubeni ndandisoloko ndizithanda izinto ezihlekisayo ebantwini, phantse yonke imifanekiso endandiyenza yayiyeyabantu. Emininzi yayo yayiyeyamabhinqa esenza imisetyenzana yawo yasekhaya. Elinye iphephancwadi lathi ngemifanekiso yam: “Ibonakalisa ukufudumala komhlaba noxolo, ukunyamezela nenzolo . . . Ikwabonisa nothando ngabantu nobuchule begcisa.” Noko ke ndandisoloko ndikulumkele ukuxakeka gqitha yile mifanekiso yobugcisa. Ndabambelela nkqi kwisigqibo sam sokukhonza uYehova ixesha elizeleyo.
Ngowe-1973, ndafumana umsebenzi endandingenakuwala. Ndacelwa ukuba ndenze umfanekiso omkhulu wodongwe, owawuza kubekwa ekungeneni kwiofisi yesebe yamaNgqina kaYehova, eVantaa, eFinland. Kwakhethwa INdumiso 96:11-13 njengomxholo walo mfanekiso. Hayi indlela endandivuya ngayo kukusebenzisa ubuchule bam ekuzukiseni uYehova!
Ekubeni ndandenze izinto zobugcisa ubukhulu becala kuba nje ndizithanda ngexesha ndandinguvulindlela, ndothuka xa ngasekupheleni kweminyaka yee-1970, ndafumana umhlala-phantsi ofunyanwa ngamagcisa. Phofu ke, ndayivuyela loo nkxaso yemali, kodwa ndizicingela ndathi, ‘Ngaba le kuphela kwento ebendiza kubonisa ngayo ukuba ndichithe bonke ubomi bam ndisenza izinto zobugcisa? Imadlana nje yokundixhasa yomhlala-phantsi?’ Hayi indlela eyayincinane ngayo loo mali xa ithelekiswa nomvuzo wobomi obungunaphakade!—1 Timoti 6:12.
Ukubuyela Edolophini
Ngowe-1974 izinto zatshintsha kanobom ekuphileni nakumsebenzi wethu wokushumayela. Safuduselwa eTurku, isixeko esikhulu. Ngelo xesha, apha kwakusakhiwa izindlu ezininzi, yaye ukuthontelana kwabantu kwabangela kwakho imfuneko engakumbi yabavakalisi boBukumkani. Ekuqaleni, sasingasithandi esi sabelo sethu sitsha sasedolophini. Kwabonakala kunzima ukushumayela kubantu basezidolophini, ekubeni abaninzi babo babengenamdla. Kodwa ngokuthe ngcembe saqhelana nale ntsimi yethu intsha, yaye safumana abantu abaninzi ababezixabisa iimfundiso zeBhayibhile.
Ekuhambeni kweminyaka, mna noAnja sibe nelungelo lokunceda abantu abangaphezu kwama-40 ukuba bahlulele ubomi babo kuYehova. Sivuya gqitha xa sicinga ngaba bantwana bokomoya! (3 Yohane 4) Mvanje ndikhathazwa yimpilo, kodwa uYehova uye wandixhasa, uthando lwebandla luye ‘lwandomeleza’ neqabane lam elinguvulindlela, uAnja, liye landomeleza gqitha. (Kolose 4:11; INdumiso 55:22) Xa ndadibana noAnja phantse kwiminyaka engama-50 eyadlulayo, akukho namnye kuthi owayecinga ukuba siya kuba ngoovulindlela sobabini ixesha elide kangaka.
Kukho intetho ethi, “Ubomi bufutshane kodwa izinto zobugcisa zihlala ixesha elide.” Noko ke, mna andivumelani naloo mazwi. Ndivumelana namazwi athethwa ngumpostile uPawulos akweyesi-2 kwabaseKorinte 4:18 athi: “Izinto ezibonwayo zezokwexeshana, kodwa izinto ezingabonwayo zingunaphakade.” Zonke izinto ezindonwabisileyo njengegcisa—“izinto ezibonwayo”—ziye zaba zezokwexeshana. Ngokuqinisekileyo azinakuthelekiswa novuyo endiye ndanalo enkonzweni kaYehova, yaye azinamvuzo wobomi obungunaphakade. Ndivuya gqitha kuba ndiye ndanikela ubomi bam ‘kwizinto ezingabonwayo,’ izinto ezihlala zikho kunezinto zobugcisa!
[Umfanekiso okwiphepha 19]
Ngoxa ndandisenza umfanekiso welitye lenyengane
[Umfanekiso okwiphepha 21]
NdinoAnja (ngasekhohlo), ngowe-1957
[Umfanekiso okwiphepha 22]
NdinoAnja (ngasekunene) namhlanje