Ndiyakuvuyela “Ukuhamba Enye Imayile”
KUBALISA UCLAIRE VAVY
ISIQITHI saseMadagascar, esimalunga neekhilomitha ezingama-400 ukusuka kwilizwe elikwiMpuma Afrika iMozambique, lilizwe elineentaba namahlathi ashinyeneyo. Ndazalelwa ngakwimpuma yesi siqithi kwidolophana ekuthiwa yiBetoko II. Ngowe-1987, xa ndandineminyaka eli-15 ubudala ndafudukela eMahanoro, idolophu eselunxwemeni apho ndandifunda khona.
EMahanoro ndandihlala nobhuti, uCelestin, owayeqalise ukufunda iBhayibhile namaNgqina kaYehova. Kwiminyaka emibini kamva ndaba liNgqina. Ndandizimisele ukukhonza uYehova uThixo ngokuzeleyo kangangoko ndandinako.
Iinzame Zokufikelela Usukelo Lwam
Usukelo lwam lokuqala lwalukukunceda izalamane zam eBetoko II, yaye ndandisoloko ndikuthandazela oku kuYehova. Phofu ke, kuphela ndandikwazi ukugoduka ebudeni beeholide zesikolo. Olu yayiluhambo olungelula lweekhilomitha ezili-100. Iikhilomitha zokuqala ezingama-40 zazinokuhanjwa ngemoto, kodwa eziseleyo ezingama-60 ndandizihamba ngeenyawo kwiindledlana ezisezintabeni.
Ndandifanele ndinyuke iinduli ezininzi, kwaye ezinye iindledlana zazicuthene gqitha. Ngokuqhelekileyo ukuba ndiqale ukuhamba kwakusasa de kube ngorhatya, ndandihamba iikhilomitha ezinokuba ngama-40. Ndandithwal’ imithwalo engaphezu kweekhilogram ezili-15—ezinye bendizithwala, ezinye ndizibeleke, yaye ezishiyekileyo bendiziphatha. Ubukhulu becala ndandiphatha iincwadi zeBhayibhile, endandidla ngokuzabela izalamane zam kuquka nabanye abanomdla. Kule ndlela igodukayo ndandisaziwa “njengalowo unempahla eninzi.”
Phezu kwayo nje inzondelelo endandinayo, ekuqaleni izalamane zam azizange ziziphulaphule iinkolelo zam ezintsha. Kodwa kungekudala zatshintsha kwaye zazibuza imibuzo emininzi maxa wambi eyayibangela ukuba silale ngentsimbi yesibini ekuseni.
Utyelelo Olungalibalekiyo
NgoDisemba 24, 1990, ndafika ekhaya eBetoko II ndize eholideyini. Izalamane zam zakuvuyela ukundibona, zicinga ukuba ndize eKrismesini. Zadana gqitha xa ndazichazela isizathu sokuba ndingasayi kuba nanxaxheba kwimibhiyozo yeKrismesi. Zaziva zineentloni ukuchazela abanye ekuhlaleni, ekubeni abantu bale dolophana babesondelelene yaye benomdla kwintlalo-ntle yabanye. Ngoko ke, ndacinga ukuba mandibaxelele ngokwam abantu bale dolophana ngeenkolelo zam ezintsha. Kodwa ndandiza kukwenza njani oko?
Ndandingaqinisekanga, ekubeni noko ndandisemtsha. Andazi nokuba kwakufanelekile na ukubachazela oko ndikukholelwayo xa besecaweni ngemini elandelayo. Ndaqhubeka ndithandaza kuYehova, ndicela ulwalathiso lwakhe. Emva koko ndabuza ubhuti, uPaul, owayengumfundisi wecawa ndisithi: “Ngaba ucinga ukuba kufanelekile ukuba ndiye kuchazela abo baza kube bekho ecaweni ngomso isizathu sokuba ndingayibhiyozeli iKrismesi?” Wabuza kwabanye, kwaye basamkela isicelo sam.
Ngemini elandelayo emva kokuba icawa iphumile ndabizwa. Ndaphinda ndathandaza kuYehova, ndaza emva koko ndathabatha iincwadi zeBhayibhile eziliqela ndaza ndahamba nazo. Emva kwentshayelelo, ndababulela bonke ababekho ngokundinceda ndiyihlonele iBhayibhile. Ndabachazela ukuba bendiqhubeka ndiyifunda iBhayibhile nasemva kokufudukela kwam edolophini. Ndathi ndiye ndafumanisa ukuba zininzi iinyaniso eziseBhayibhileni esingazange sizifundiswe ngaphambili.
Ndasebenzisa eli thuba ukubacacisela ngethemba eliseBhayibhileni lokuphila ngonaphakade kumhlaba oyiparadesi (INdumiso 37:29; ISityhilelo 21:3, 4), isizathu sokuba bembalwa abantu abathembekileyo emhlabeni abathatyathelwa ezulwini (Yohane 14:2, 3; ISityhilelo 5:9, 10; 14:1, 3), kwanemfundiso yeBhayibhile yokuba abantu abafileyo abazi nto konke konke, balele kwaye akukho zintlungu bazivayo (INtshumayeli 9:5, 10; Yohane 11:11-14, 38-44). Ndababonisa nokuba amaKristu okuqala akazange ayibhiyozele iKrismesi yaye lowo yayingumbhiyozo wabahedeni.
Emva kokuqukumbela, inkoliso yabo babekho bavuma ukuba oko ndandikuthetha kwakuyinyaniso. Abanye bade babuza eminye imibuzo. Emva koko ndababonisa iimpapasho endandiziphethe ndaza ndabacacisela ukuba ezi ncwadi zishicilelwa ngamaNgqina kaYehova kwaye ziluncedo ekufundeni iBhayibhile. Ndathi ndikulungele ukunceda nabani na ongathanda ukufunda iBhayibhile. Uninzi lwazamkela iincwadi zokufunda iBhayibhile.
Ukufumanisa Okuthile Ndingalindelanga
Ibhinqa elithile endandiqala ukulibona lasondela kum laza lathi: “Udadewethu, ohlala kwenye idolophana uhamba kule cawa yenu.” Ndimangalisiwe, ndabuza, “Uthi uhlala phi?”
Laphendula lathi: “EAndranomafana.” Loo dolophana ikumgama oziikhilomitha ezinokuba ngama-30 ukusuka eBetoko II.
Ndalixelela eli bhinqa ukuba mhlawumbi udadewabo uhamba kwenye inkonzo ekubeni onke amaNgqina akulo ngingqi esazana. Eli bhinqa lathi udadewabo wayedla ngokulifundisa kanye ezi zinto bendizithetha ecaweni. Ndacela kweli bhinqa igama nedilesi kadadewabo, yaye ndandikungxamele ukuya apho ngoko nangoko. Noko ke, umama wandibongoza ukuba ndingahambi kwangolo suku ekubeni olo yayiluhambo olude ngeenyawo. Kwiintsuku ezimbini kamva ndaya eAndranomafana ndihamba nobhuti, uCharles.
Ukufika nje kwethu kule dolophana sabuza kubantu balapho, “Ngaba akho amaNgqina kaYehova apha?” Ndadana xa bathi: “Kukho kuphela amaKatolika, amalungu eeCawa Zomoya, namalungu ezinye iinkonzo ezikhoyo kule dolophana.”
Elinye ibhinqa ladanduluka lathi, “Ukuba nikhangela amaNgqina kaYehova, mhlawumbi nguMarceline nentsapho yakhe lo nimfunayo.” Lo yayingumntu kanye endandixelelwe ngaye!
Omnye kubo waya kubiza uMarceline. Wakhawuleza wafika kodwa ebonakala esoyika. Bonke abantu bale dolophana baqokelelana, kuba becinga ukuba singamagosa karhulumente aze kuncina uMarceline. Kamva ndafumanisa ukuba yena nentsapho yakhe babetshutshiswa kule dolophana kuba ‘bekunqulo olungaziwayo.’
UMarceline wasibizela bucala apho sasinokuthetha ngokukhululekileyo. Xa ndambuza enoba uliNgqina likaYehova kusini na, wavuma. Emva koko, wahamba waza wabuya nencwadi ethi Inyaniso Ekhokelela Kubomi Obungunaphakade eyayisetyenziswa ngaphambili ngamaNgqina kaYehova xa eqhuba izifundo zeBhayibhile, kwakunye neenkupho ezindala zeMboniselo. Zonke zazidlakadlaka. Ndabuza: “Nifunde liphi iphephancwadi kwiCawa ephelileyo?”
Waphendula wathi: “Ezi kuphela kweenkupho esinazo yaye sizifunda ngokuphindaphindiweyo.” Emva koko ndaqala ndamxelela uMarceline ukuba nam ndiliNgqina. Wavuya kakhulu! Xa ndathi ndingathanda ukudibana nomzalwana oqhuba iintlanganiso, wandichazela ukuba wayehlala kwenye indawo, mgama.
Okunye Okuvuyisayo Endakufumanisayo
Ngemini elandelayo mna noMarceline sahamba saya kukhangela lo mntu. Wayemangalisiwe ukufika kwethu, kwangaxeshanye evuya. Enyanisweni, ekugqibeleni safumanisa ukuba le ndoda yayiliNgqina elalisuka kwidolophu engaselunxwemeni, iToamasina, kwiikhilomitha ezingaphezu kwama-200 kumntla-mpuma. Le ndoda nentsapho yayo kwanyanzeleka ukuba babuyele apha emva kokuphelelwa kwayo ngumsebenzi ngesiquphe. Ekubuyeni kwayo, yaqalisa ukushumayela, iqhuba izifundo zeBhayibhile neentlanganiso.
Eli Ngqina nentsapho yalo bavuya gqitha bakubona iiMboniselo ezintsha endandize nazo. Kwakhona ndababonisa nencwadi ethi Unokuphila Ngonaphakade KwiParadisi Esemhlabeni, esasiyisebenzisa ngelo xesha ukuqhuba izifundo zeBhayibhile. Yayiqala ukuyibona le ncwadi. NgeCawa elandelayo ndabuyela eAndranomafana ndize kwiintlanganiso. Ndabakhuthaza ukuba baqhagamshelane neofisi yesebe yamaNgqina kwidolophu elikomkhulu iAntananarivo, ekubeni eofisini kwakungaziwa ukuba kukho eli qela lincinane kule ndawo.
Ukususela ngoJanuwari 1991, phantse nyanga nganye ndandisuka eMahanoro ndiye eAndranomafana, ndiphathele aba bazalwana iinkupho ezintsha zeMboniselo nezinye iincwadi. Olu yayiluhambo lweekhilomitha ezinokuba li-130 ukuya, yaye ndandihamba ngeenyawo iikhilomitha ezingaphezu kwezingama-85—ndinyuka ndisehla amaxethuka, ndinqumla emahlathini ashinyeneyo yaye xa kusina, ndandigxampuza emigxobhozweni.
Umthwalo wam wawusiya usiba nzima ekubeni lalisanda inani labantu ababefuna iincwadi namaphephancwadi. Nakuba ndandidinwa kuze kube buhlungu umzimba ekupheleni kohambo ngalunye, ndandiye ndizive ndivuya yaye ndanelisekile koko ndikwenzileyo. Hayi indlela ekwakundonwabisa ngayo ukubona indlela abazalwana ababevuya ngayo xa befumana impapasho entsha nendlela ababesabela ngayo kwiinyaniso zeBhayibhile!
Ukuqalisa Inkonzo Yexesha Elizeleyo
NgoSeptemba 1, 1992, ndamiselwa njengovulindlela othe ngxi, njengoko amaNgqina ebabiza ngolo hlobo abo bakwinkonzo yexesha elizeleyo. Ndandinguvulindlela eMahanoro kodwa ndandiqhamshelana nezalamane zam eziseBetoko II ngokuzibhalela. Ndaqalisa ukufunda nazo iBhayibhile ngeleta, kwaye ekuhambeni kwexesha zandibuza enoba ndandingenakugoduka kusini na ukuze ndize kuzinceda. Ndandikulungele ukwenjenjalo, kodwa kuqala ndandifuna ukuqiniseka ukuba zizimisele kusini na ukufunda iBhayibhile zize zenze inkqubela ngokomoya. Ngoko ke okwexeshana, ndahlala eMahanoro ndinguvulindlela.
Ngasekupheleni kowe-1993, ndaba nelungelo lokumenywa kwisikolo soovulindlela seeveki ezimbini esasiseAntananarivo. Emva koko, ndakhuthazwa ukuba ndifake isicelo sokuba nguvulindlela okhethekileyo, nto leyo eyayithetha ukwabelwa naphi na kweli lizwe. Noko ke, andizange ndisamkele esi simemo ekubeni ndandifuna ukunceda izalamane zam eziseBetoko II, nezazihlala kude nebandla. Ngoko ke ndabuyela esabelweni sam eMahanoro.
Ekugqibeleni, xa umveleli ohambahambayo wamaNgqina kaYehova wayetyelele, ndambuza ngamathuba okubuyela ekhaya ndiye kunceda izalamane zam ngokomoya. Wandicebisa ukuba ndingagoduka kuba ngelo xesha kwakusele kukho ibandla eAndranomafana, yaye ndandiza kuba kwelo bandla ndize ndishumayele eBetoko II. NgoSeptemba 1, 1994 ndaqalisa ukushumayela apho. Kwangaloo nyanga ndaya endibanweni yesithili kunye nobhuti, uPaul owayengumfundisi. Kungekudala eAndranomafana abantu abangama-30 babeshumayela yaye ngeeCawa kwakubakho abantu abanokuba ngama-65 ezintlanganisweni zethu.
Andizange Ndiyeke Ukuhamba
Ngethutyana nje ndibuyele eBetoko II, izalamane zam ezine zakufanelekela ukushumayela njengamaNgqina kaYehova yaye kungekudala zabhaptizwa. Emva kokuba ndibuyele eBetoko II ndandihamba rhoqo ukuya eAnosibe An’ala ukuya kuphuthuma iincwadi namaphephancwadi, uhambo lweekhilomitha ezinokuba ngama-50 ukuya. Nangona olu yayiluhambo oludinisayo, ndandivuya ndakubona indlela abantu balapha ababehambela phambili ngayo ngokomoya kangangokuba ndandiqonda ukuba oku kuwufanele umgudu.
Namhlanje kukho ibandla elikhulayo eBetoko II, yaye kwiintlanganiso zangeCawa kuza abantu abanokuba ngama-45. Ngoku bonke abantu basekhaya abakuloo mmandla bangamaNgqina, yaye inkoliso yabo ngoovulindlela abathe ngxi. Umntakwethu omncinane unguvulindlela okhethekileyo. NgoNovemba 1, 2001, nam ndamiselwa njengovulindlela okhethekileyo, yaye ndathunyelwa kwidolophana iAntanambao-Manampotsy. Kodwa ndayishiya iBetoko II ndonwabile.
Xa ndandiqalisa ukufunda iinyaniso zeBhayibhile ngowe-1987, amaNgqina ayengaphantsi kwama-3 000 eMadagascar. Ngoku angaphezu kwama-14 000. Ndiyalibulela ilungelo endibe nalo lokukwazi ukuwasebenzisa amandla am ukuze ‘ndihambe enye imayile’ ndisiya kunceda abanye. Ndiyambulela uYehova kuba eye wayisikelela imigudu yam.
[Imifanekiso ekwiphepha 24, 25]
Bendidla ngokuthwala impahla enokuba ziikhilogram ezili-15 ndize ndihambe iikhilomitha ezingama-60 ndigoduka
[Umfanekiso okwiphepha 25]
Ubhuti wam uPaul
[Umfanekiso okwiphepha 26]
Ubhuti wam uCharles
[Umfanekiso okwiphepha 26]
Ndikunye nezalamane zam. Zonke ngoku zingamaNgqina kaYehova