Imbono YeBhayibhile

Ngaba Ubomi Bakho Bamiselwa Kwangaphambili

Ngenye intsasa amadoda amabini ayeqhuba ilori, esiya emsebenzini. Agqiba ekubeni ahambe ngendlela emfutshane edlula kwindlu yomnye wawo. Njengokuba ayehamba abona amadangatye omlilo ephuma ngeefestile kweny’ indlu. Amisa ilori aza asebenzisa ileli ayenayo ukuze ahlangule umama nabantwana abahlanu. Iphephandaba lanikela le ngxelo ngoko kwenzekayo: “Mhlawumbi oku kwenzekayo kwakumiselwe kwangaphambili.”

ABANTU abaninzi bakholelwa ukuba nantoni na eyenzekayo kubo, enoba intle okanye imbi, imiselwe kwangaphambili ngamandla angaphaya kwawomntu. Ngokomzekelo, uMhlaziyi uJohn Calvin wenkulungwane ye-16 wabhala: “Ukumiselwa kusengaphambili sikuchaza njengento eyacetywa nguThixo kwasephakadeni, awagqiba ngoko afuna ukukwenza ngomntu ngamnye. Kuba akabadalanga ngokufanayo bonke, kodwa bambi ubamisela kusengaphambili ukuba bafumane ubomi obungunaphakade yaye abanye ukuba baya kugwetywa ngonaphakade.”

Ngaba ngokwenene uThixo uzimisela kwangaphambili izenzo zethu nalapho siza kuphelela khona ebomini? Ithini iBhayibhile?

Indlela “Abakuqiqa” Ngayo Ukumiselwa Kwekamva Kwangaphambili

Abanye abantu bacinga ukuba ikamva limiselwa kwangaphambili ngale ndlela: UThixo wazi zonke izinto. Wazi kwanezinto eziza kwenzeka kwixesha elizayo. UThixo uyakwazi okuza kwenziwa ngumntu ngamnye ebomini yaye sele elazi ixesha nendlela aza kufa ngayo. Ngoko ke, ngokwendlela abacinga ngayo, xa kufika ixesha lokuba ubani enze isigqibo, ukhetho lwakhe lumele luhambisane nendlela uThixo amisele ngayo; ukuba akunjalo, uThixo uya kuba akazazi zonke izinto. Ngaba isengqiqweni le ndlela bacinga ngayo? Makhe siqwalasele imiphumo yoko.

Ukuba amandla athile sele elimisele kwangaphambili ikamva lakho, ngoko ke ukuzama ukuzikhusela kusenokungancedi nto. Ukukhetha ukutshaya nokungatshayi bekungayi kwenza mahluko kwimpilo yakho okanye eyabantwana bakho. Ukunxiba ibhanti ngoxa ukhwele imoto kusenokungathethi nto. Kodwa ikho into ephosakeleyo kwindlela abaqiqa ngayo. Amanani abonisa ukuba bambalwa abantu abafayo xa baye bazikhusela engozini. Ukungakhathali kusenokuphumela kwingozi.

Makhe siqiqe ngale ndlela. Ukuba uThixo ukhethe ukwazi yonke into, loo nto ithetha ukuba kwangaphambi kokuba adale uAdam noEva, kufanele ukuba wayesazi ukuba babengasayi kumthobela. UThixo waxelela uAdam ukuba makangatyi ‘kumthi wokwazi okulungileyo nokubi’ kungenjalo wayeza kufa. Ngaba uThixo wayesazi ukuba uAdam wayeza kutya kuwo? (Genesis 2:16, 17) Xa uThixo wathi kuAdam noEva: “Qhamani, nande, niwuzalise umhlaba nize niwoyise, nibe nobukhosi kwiintlanzi zolwandle nakwizidalwa eziphaphazelayo emazulwini nakuzo zonke izidalwa eziphilayo ezinambuzelayo emhlabeni,” ngaba wayesazi ukuba ithemba labo lobomi obungunaphakade eparadesi lalingasayi kufezeka? Ngokuqinisekileyo akunjalo.—Genesis 1:28.

Imbono yokuba uThixo uzazi kwangaphambili izigqibo zonke ithetha ukuba nguye ongunobangela wezinto zonke ezenzekayo—kuquka iimfazwe, ukungabikho kokusesikweni nokubandezeleka. Ngaba inokwenzeka loo nto? Impendulo ecacileyo siyifumana koko uThixo akuthethayo ngaye.

“Ufanele Ukhethe”

IZibhalo zithi “uThixo uluthando” yaye “ngumthandi wokusesikweni.” Usoloko ebongoza abantu bakhe esithi: “Thiyani okubi, nithande okulungileyo.” (1 Yohane 4:8; INdumiso 37:28; Amosi 5:15) Kangangezihlando ezininzi wakhuthaza abantu bakhe ukuba bakhethe indlela efanelekileyo yokuphila. Ngokomzekelo, xa uYehova wenza umnqophiso nesizwe sikaSirayeli samandulo wathi kuso, ngoMoses: “Ndimisela amazulu nehlabathi namhlanje njengamangqina am okuba, ndibeke phambi kwakho ubomi nokufa, intsikelelo nesiqalekiso; nyula ke ubomi ukuze uphile, wena nenzala yakho.” (Duteronomi 30:19) Ngaba uThixo wamisela kwangaphambili ukhetho olwaluza kwenziwa ngabo bantu? Ngokuqinisekileyo akunjalo.

UYoshuwa, inkokeli yabantu bakaThixo kumaxesha amandulo, wabongoza abantu bakowabo esithi: “Zikhetheleni namhlanje ukuba ngubani na eniya kumkhonza . . . Mna nendlu yam, siya kukhonza uYehova.” (Yoshuwa 24:15) Kwakhona, umprofeti kaThixo uYeremiya wathi: “Nceda, uthobele ilizwi likaYehova koko ndikuthethayo kuwe, yaye uya kulungelwa, nomphefumlo wakho uya kuqhubeka uphila.” (Yeremiya 38:20) Ngaba uThixo osesikweni nonothando angakhuthaza abantu ukuba benze okuhle benethemba lokuba baza kufumana umvuzo ukuba ebesazi ukuba ubamisele ukuba bangaphumeleli? Akunjalo. Olo ibiya kuba luhanahaniso.

Ngoko ke, xa kusenzeka izinto ezintle okanye ezimbi ebomini bakho, asikuko ukuba zamiselwa kwangaphambili. Ngamaxesha amaninzi izinto ‘ezingenakubonwa kwangaphambili’ yimiphumo yokhetho olwenziwe ngabanye abantu—enoba zizigqibo zobulumko okanye akunjalo. (INtshumayeli 9:11) Ikamva lakho alimiselwanga kwangaphambili yaye izigqibo ozenzayo zizo ezigqiba ukuba ikamva lakho liya kuba njani.

UCINGA NTONI?

◼ Ngaba uThixo wagqiba kwangaphambili ukuba uAdam noEva babeza kona?—Genesis 1:28; 2:16, 17.

◼ Ziziphi iimpawu uThixo anazo ezibonisa ukuba akalimiseli kwangaphambili ikamva?—INdumiso 37:28; 1 Yohane 4:8.

◼ Yiyiphi imbopheleleko onayo?—Yoshuwa 24:15.

[Amagama acatshulweyo akwiphepha 13]

Amanani abonisa ukuba bambalwa abantu abafayo xa baye bazikhusela engozini