Ngaba Ikamva Lethu Limiselwe Kwangaphambili?
UMKRISTU, umSilamsi, umYuda, umHindu okanye ikholwa nje elikolunye unqulo—abantu bazo zonke iinkonzo kuyabaxhalabisa kuze kubenze buhlungu oku.
Ngokomzekelo, ngoDisemba 6, 1997, kwehla intlekele enkulu kwisixeko saseSiberia eIrkutsk. Inqwelo-moya enkulu eyi-AN-124 yayisandul’ ukuncothuka ngethuba iinjini zayo ezimbini zinikezela. Le nqwelo-moya, yayizele ntli yipetroli, yawela emizini. Izindlu eziliqela zazingamadangatye nje, nto leyo eyabulala yaza yenzakalisa abantu abaninzi abahlala apho ababengenakuzinceda nabantwana abancinane abamsulwa.
Kule ndawo yayinale ngozi eSiberia, kukho abantu abaneembono ezahlukahlukeneyo zonqulo. Bambi basenokubonakala ngathi bayakholelwa kubuKristu, sekunjalo bacinge ukuba le ntlekele yayimiselwe kusengaphambili. Bona nabanye basenokuvakalelwa kukuba, ‘Kwakuthande uThixo, ibe ukuba abo bafayo babengazange bafe ngale ndlela, babenokukufa nangenye indlela—yaba lilishwa labo.’
Ukucinga ngolo hlobo, enoba kuvakala kwindlela umntu athetha ngayo okanye akunjalo, kubonisa ingcamango ekuninzi lweenkonzo ezisehlabathini lonke—ilishwa. Abantu abaninzi bakholelwa ekubeni ikamva lethu limiselwe kusengaphambili, ukususela mhla sazalwa de kube yimini esifa ngayo.
Zininzi iindlela zokukholelwa kwilishwa, nto leyo ebangela ukuba ungazi nokuba ungaqala ngaphi ukuzichaza. Eneneni ukukholelwa kwilishwa kunikela ingcamango yokuba yonke into eyenzekayo, senzo ngasinye, nasiganeko ngasinye—enoba sihle okanye sibi—asinakuphepheka; simele sibekho ngenxa yokuba simiselwe kusengaphambili ngamandla aphakamileyo angenakulawulwa ngumntu. Loo ngcamango injalo inokufumaneka ekuvumiseni ngeenkwenkwezi, kwikarma yamaHindu neyamaBhuda, nakwimfundiso yeNgqobhoko yokumiselwa kusengaphambili. Emva phayaa kwiBhabheli yamandulo, abantu babekholelwa ukuba oothixo babelazi ilishwa nekamva ngokukhangela kuxwebhu oluthile olubhaliweyo. Ukuba oku kwakuyinyaniso, nasiphi na isithixo esilawula “la macwecwe abhalwe ikamva” sisenokugqiba ngekamva labantu, elezikumkani, kwanelezithixo ngokwazo.
Amakholwa amaninzi akholelwa kwelokuba ngokomthetho kaThixo obakho ngaphambi kokuzalwa kwabantu*, uThixo wazi konke okuya kwehlela umntu ngamnye, kuquka ubude bobomi bakhe, enoba uya kuba yindoda okanye ibhinqa, isityebi okanye ihlwempu, enoba uya konwaba okanye akayi konwaba. Kuthiwa yonke le nto kusengqondweni kaThixo okanye ibhalwe encwadini ethile ngaphambi kokuba kwenzeke. Ngenxa yoko kuyinto eqhelekileyo ukuba ikholwa xa lisehlelwa yintlekele lithi, “mektoub,”—ibhaliwe! Abantu baqiqa ngelithi ekubeni uThixo esazi yonke into kusengaphambili, kwakhona umele amazi umntu oya kumthobela nongayi kumthobela. Ngaloo ndlela amakholwa amaninzi akholelwa ukuba kwanaphambi kokuba umntu azalwe, uThixo uyazi enoba uya kufumana ubomi obungenasiphelo nobuvuyisayo eParadesi okanye uya kutshabalala ngonaphakade.
Usenokuvakalelwa kukuba oku kufana nqwa nemfundiso yokumiselwa kusengaphambili efundiswa kwezinye iicawa zeNgqobhoko. Umseki ophambili ongumProtestanti wale mfundiso yokumiselwa kusengaphambili yayinguMlweli woHlaziyo waseFransi wenkulungwane ye-16 uJohn Calvin. Wachaza ukumiselwa kusengaphambili “njengomthetho kaThixo ohlala uhleli, apho aye agqibe ngoko afuna ukukwenza ngomntu ngamnye. Abantu abadalwanga bakwimeko efanayo bonke, kodwa abathile bamiselwe ukuphila okungunaphakade abanye bamiselwa intshabalalo engunaphakade.” Kwakhona uCalvin wathi: “UThixo akazange abone nje isiphelo sendoda yokuqala, kwanokonakaliswa kwenzala yayo; kodwa naye wakuvuyela ukwenza oko kusengaphambili.”
Sekunjalo, asingawo onke amalungu eenkonzo ezifundisa ukumiselwa kusengaphambili okanye ukukholelwa kwilishwa akukholelwayo oko. Befanele abanye bathi iincwadi zonqulo zithi abantu banelungelo lokuzikhethela. Eneneni, kukhe kwaphikiswana ngezinto ezenziwa ngabantu, enoba zibangelwa kukuba bezikhethela okanye zimiselwe kusengaphambili nguThixo. Ngokomzekelo, abanye baye bema ngelithi umntu umele akhethe aze enze nantoni na ngokukhululekileyo, ekubeni uThixo osesikweni, emphendulisa umntu ngezenzo zakhe. Abanye baye bathi uThixo uyaziyila izinto ezenziwa ngumntu kodwa ngandlel’ ithile loo mntu “uyazenza” aze aphenduliswe ngazo. Noko ke, ngeliphandle, abantu abaninzi bakholelwa kwelokuba siganeko ngasinye esenzeka kubomi bethu bemihla ngemihla, sibalulekile okanye singabalulekanga, simiselwe nguThixo.
Wena ukholelwa entwenini? Ngaba uThixo sele elimisele ikamva lakho? Ngaba ngokwenene abantu banenkululeko yokuzikhethela, bekwazi ukwenza ukhetho olululo ngekamva labo? Ikamva lethu lixhomekeke kangakanani koko sikwenzayo? Inqaku elilandelayo liya kuzama ukusiphendulela le mibuzo.
[Umfanekiso okwiphepha 3]
SEL/Sipa Press