Iimopane Esona Sidlo Simnandi

UMBHALI KAVUKANI! EZAMBIA

ABANYE abantu abazithandi iimopane. Kodwa abanye abaninzi yeyona nto bayithandayo. Kwezinye iindawo zaseAfrika, okona kutya kuthandwayo ziimopane, i-Imbrasia belina. Eli gama zalifumana ngenxa yomthi ezithanda ukuhlala kuwo, umthi wemopane. Zithi zingekakulungeli ukudliwa babe abantu abaninzi basezilalini sebezifuna. UKeith Leggett weKalahari Conservation Society uthi: “Ufumana iprotini kwiimopane.” Kwakhona iimopane zinokulichumisa ihlathi ebelingenamveliso.

Njengokuba iimvula zehlobo zisina ekuqaleni kukaNovemba kumazantsi eAfrika, umhlaba uba nemveliso. Amaphuphu amaninzi aba ziimopane. Ngeeveki nje ezintlanu ukusa kwezintandathu, amaqanda amancinane ayajika abe yimibungu yaye emva koko abe “ziimopane.”

Kwiindawo ekutyiwa kuzo iicassava nombona, iimopane zimnandi xa uzidibanisa noku kutya. Nangona abantu abaninzi bengazithandi, kuba zineprotini engaphezu kwama-60 ekhulwini oku kuzenza zixabise kakhulu, ngokukodwa xa iiprotini zibiza imali eninzi okanye zinqabile. Ezincinane nje ziba luncuthu mazangwa xa zityiwa nentlanzi, yaye umntu omdala ufumana phantse zonke iiprotini, iivitamin nezondlo ezifunekayo emzimbeni ngosuku. Eneneni, iimopane zimuncis’ iintupha!

Abantu abatya iimopane abasazi isizathu sokuba amafama achithe imali eninzi kangaka ethenga imichiza yokubulala iimopane ezimnandi kangaka. Njengokuba ezi zinambuzane zisitya, zijika amagqabi ayityhefu abe kukutya okunempilo. Konke oko kwenzeka ngaphandle kokusebenzisa amakhuba abiza imali eninzi nemali kagqirha wezilwanyana. Iimopane zibuthwa ngezandla yaye zifumaneka lula.

Iimopane ziluncedo kakhulu ekwenzeni umgquba emahlathini. Nangona iindlovu zaseAfrika zizithanda izisu zazo, kodwa inkqubo yazo yokwetyisa ayithathi nto kweyeemopane. Nangona ziphila nje iiveki ezintandathu, inyambalala yeemopane itya utyani obuphindwe kalishumi ize ivelise ubulongwe obuphindwe kane kunobendlovu. Yiyo loo nto ubunzima bemopane buphindaphindeka izihlandlo ezingama-4 000! Noko ke, akumangalisi ukuba iimopane zichumisa umhlaba.

Zifumaneka njani iimopane? Ngexesha lemvula, amabhinqa asemaphandleni ayadibana kabini ngonyaka ukuze aqokelele iimopane. Kangangeeveki eziliqela la mabhinqa aqokelela iimopane, akhuphe inyama yangaphakathi, azibilise aze azomise. Noko ke, ukuqokelela nokupheka ezinye iimopane kungumsebenzi. Kwezinye iimopane kususwa uboya. Kwakhona kufuneka ulumke xa uza kupheka iimopane kuba ezinye zitya izityalo eziyityhefu ebantwini. Zakuba ziphekiwe, zaza zomiswa, iimopane zinokutyiwa, nangona ngokuqhelekileyo zibiliswa okanye ziqhotswe netumato netswele.

Usenokuxuxuzelelwa sisisu xa ucinga ngokutya iimopane. Usenokukhetha ukungakutyi ukutya okungaqhelekanga. Kodwa khumbula ukuba iimopane zineprotini yaye iintsapho ezininzi zaseAfrika zifumana imali ngayo.

[Umfanekiso okwiphepha 26]

Iimopane zixabisekile ngenxa yeeprotini ezifumaneka kuzo

[Umfanekiso okwiphepha 27]

Ngeeveki nje ezintandathu ziphila, ubunzima beemopane buphindaphindeka izihlandlo ezingama-4 000