Izinambuzane Ezityiwayo—Isidlo Esingasoze Sisilibale
ABAHLOBO abaliqela baye basimema nenkosikazi ukuba siye kutya nabo kwindawo enocwangco eBangui, ikomkhulu leRiphabliki YoMbindi Afrika.
Sathi sifika sabe sigangwa ngamazwi athi: “Ngenani! Nimele ukuba nilambile!” Kwangaphambi kokuba singene, sabethwa livumba elimnandi lamatswele, ikonofile, nezinye iziqholo babe nabahlobo bethu bexokozela. UElla esasimenywe nguye, wasixelela ngento esiza kuyitya.
Wathi: “Izinambuzane ngowona mthombo weeproteni kuninzi kwabantu boMbindi Afrika. Asizityi nje kuba sinyanzelekile, kodwa kungenxa yencasa yazo. Namhlanje siza kutya amakongo—imibungu.”
Kwakungamele kusothuse oko. Nakuba ingenguye wonke ubani onokuthanda ukutya izinambuzane, kumazwe angaphezu kwekhulu ezinye izinambuzane zigqalwa njengeyona nto imnandi.
Isidlo Ehlathini
Ziliqela izinambuzane ezidliwayo kwiRiphabliki ekuMbindi weAfrika. Ngexesha leemvula, iintubi ekuthiwa ziibobo ziba yinyambalala ecaleni kweziduli okanye ezidolophini phantsi kwezibane zombane. Emva kwesaqhwithi sangokuhlwa, abantwana bayaziqokelela ngeengobozi—lonke elo xesha bachwayitile njengoko beman’ ukuziphosa nasemlonyeni. Iintubi zinokuqwayitwa elangeni, zigcadwe ngetyuwa, yaye zinongwe ngepepile eqhwethayo, okanye zifakwe kwisityu okanye amadombolo.
IiKindagozo ziinkumbi [iintethe] ezifika kuloo mmandla xa kubalele. Abantu balapho bayazigcada ezi nkumbi okanye bazintyontyise ngamanzi emva kokususa imilenze neempiko yazo.
Ziliqela iintlobo zemibungu etyiwa kwelizwe. Samenywa ukuze size kutya umbungu ekuthiwa yiImbrasia. Ibhabhathane elikhulu elimbala umdaka lizalela amaqanda alo kumthi ekuthiwa yisapelli. Emva kokuba le mibungu iqanduselwe, abantu balapho bayayiqokelela baze bayihlambe. Emva koko, igalelwa kwitumato, itswele nezinye izinongo zokupheka kuxhomekeka kwintsapho leyo. Eminye iyomiswa okanye irhawulwe ukuze ingaboli. Inokugcinwa ize isetyenziswe nasemva kweenyanga ezintathu.
Zikhuselekile, Zilungele Ukutyiwa
Nakuba ingezizo zonke izinambuzane ezinokutyiwa, ezininzi zikhuselekile xa ziqokelelwa kwiindawo ezingenayo imichiza yezibulala-zinambuzane negwane zize zilungiswe kakuhle. Kakade ke, abo bagulayo xa betye izinto zaselwandle, ezifana nonokrwece abamele bazitye izinambuzane kuba ziyafana. Ngokwahlukileyo kwinkoliso yoonokrwece abatya izinto ezibolayo, inkoliso yezinambuzane ezityiwayo itya amagqabi acocekileyo kuphela nezinye izityalo ekunzima ukuba zicolwe yimizimba yabantu.
Nakuba imibungu imincinane, inezondlo ezininzi. Ngokutsho kweNtlangano Yokutya Nezolimo yeZizwe Ezimanyeneyo, imibungu eqwayitiweyo inezondlo eziphindwe kabini kunezo zenyama yenkomo. Iingcali zokutya zifumanisa ukuba izinambuzane zingumthombo wesondlo kumazwe asakhasayo.
Kuxhomekeka kuhlobo lombungu otyiwayo, iigram ezili-100 nje kuphela zinokuba nomlinganiselo owanele imini yonke weeminerali ezibalulekileyo njengecalcium, i-iron, imagnesium, iphosphorus, ipotassium, nezinc, kuquka nezinye iivithamini. Ukongezelela, umgubo owenziwa ngemibungu efumaneka emhlabeni unokuxutywa nokutya kwabantwana abangondlekanga.
Ngaphandle kwezondlo ezinazo, zikho nezinye iingenelo zokutya izinambuzane. Ukutya izinambuzane kuyingenelo kwemekobume. Abantu abazityayo basebenzisa amanzi amancinane yaye akungcolisi moya. Ukongezelela koko, ukuqokelela izinambuzane zize zityiwe yindlela efanelekileyo yokunciphisa ezo zonakalisayo.
Isizathu Esiyintloko
Njengoko sasilindele oko kutya, sakhumbula ukuba umnqophiso woMthetho owanikwa uhlanga lwamaSirayeli owawusithi iinkumbi zihlambulukile. Abakhonzi boThixo oyinyaniso, abafana noYohane uMbhaptizi babezitya. (Levitikus 11:22; Mateyu 3:4; Marko 1:6) Sekunjalo, sisenokuba madolw’ anzima ukutya into esingayiqhelanga.
UElla waphuma ekhitshini, ephethe into eyayivuyelwa ngumntu wonke. Apho sasihleli nabanye abasibhozo balapho kuMbindi Afrika besitsho ngoncumo olugoso kwabe phambi kwethu kukho izitya ezibini ezikhulu zemibungu. Njengeendwendwe, safumana ilungelo lokuphakelwa kuqala.
Ekuphela kwento esinokuyithetha kukuba: “Xa unokufumana elo lungelo lokunandipha oko kutya kwexabiso elifikelelekayo, okumnandi, nokunesondlo, ungaze ube madolw’ anzima ukulixhakamfula! Sisidlo ongasoze usilibale.”
[Umfanekiso okwiphepha 27]
Imibungu engekaphekwa “amakongo”
[Umfanekiso okwiphepha 27]
Iinkumbi ezilungisiweyo “iikindagozo”