Isizathu Sokuba Ndiyeke Kwisekisi

Kubalisa uMarcelo Neím

NDAZALELWA eMontevideo, eUruguay. Nangona abazali bam babehlonel’ uThixo, babengahambi cawa. Umama wafa kwingozi yemoto xa ndandineminyaka enokuba mine ubudala, ndaza ndakhuliswa zizalamane ezazama ukundiqeqesha. Xa ndandineminyaka engama-20 ubudala, ndagqiba kwelokuba ndikhenkethe ukuze ndazi amany’ amazwe neendlela ezahlukeneyo zokuphila.

Ndaqalisa ukusebenza eKholombiya njengomncedisi kwiisekisi. Ndabukel’ indlela ababevuya ngayo abadlali xa beqhwatyelw’ izandla, yaye nam ndandifun’ ukuba ngumdlali. Ngoko ke ndaqalisa ukuziqeqesha kumdlalo webhayisikile, yaye ekuhambeni kwexesha ndandiqhuba iibhayisikile ezincinane yaye ndagqibela sendikwazi nokuqhuba ibhayisikile eziisentimitha ezili-12 ubude—enye yezona bhayisikile zincinane ehlabathini. Le bhayisikile ingena iphelele kwintende yesandla sam. Ndaba ngumntu odumileyo phantse kulo lonke elaseMzantsi Merika. Xa ndandineminyaka engama-25 ubudala, ndafudukela eMexico yaye ndasebenza kwiisekisi ezahlukahlukeneyo.

Ubomi Bam Butshintsha Ngokuphawulekayo

Ndandibuthanda ubomi basesekisini. Kaloku sasihamb’ amazwe, sihlala kwiihotele eziphambili yaye sisitya kwiivenkile zokutya ezibalaseleyo. Kodwa kum, ubomi babungenanjongo yaye ndandingaqinisekanga ngekamva. Ngoluny’ usuku emva kwemini, izinto zatshintsha. Indoda eyayisamkel’ iindwendwe esekisini yandinik’ incwadi eyayiyifumene, eyayisithi ISityhilelo—Incopho Yaso Ezukileyo Isondele!a Emva komdlalo ndayifunda kwade kwasekuseni. Nangona kwakungelul’ ukuyiqonda, ndachukunyiswa yinkcazelo yerhamncwa elingqombela nehenyukazi leSityhilelo. (ISityhilelo 17:3–18:8) Ngeny’ imini, xa ndandicoca ikharavan endandiyithengile, ndafumana enye incwadi epapashwe kwindawo enye, ethi Unokuphila Ngonaphakade KwiParadisi Esemhlabeni.b Yona le ncwadi kwakulula ukuyiqonda, yaye ngoko nangoko ndaqonda ukuba ndimele ndishumayele. Ndingaphozisanga maseko ndaqalisa ukuthetha ngezinto endizifundileyo nabo bonke abantu endandidibana nabo.

Ekuhambeni kwexesha, ndabona kufanelekile ukuba ndiqhagamshelane namaNgqina kaYehova. Inombolo yefowuni yentombazana eliNgqina eyayishiyele umhlobo wam incwadi ethi ISityhilelo yayibhaliwe kule ncwadi. Ndayitsalel’ umnxeba, yaye uyise wandimemela endibanweni yamaNgqina kaYehova eTijuana, eMexico. Ndachukunyiswa yindlela endaphathwa ngayo ngothando yaye ndeyiseka kukuba olu lunqulo lokwenyaniso. Kuzo zonke iindawo isekisi eyayisiya kuzo, ndandisiya kwiHolo yoBukumkani ekufuphi ndize ndizithabathel’ iincwadi endandiza kushumayela ngazo xa kuvel’ ithuba.

Kwenzek’ into eyandiqinisekisa ukuba ngokwenene ndiyifumene indlela efanelekileyo. AmaNgqina andimemela kwiSikhumbuzo sokufa kukaKristu yaye andichazela indlela ekubaluleke ngayo ukuba amaKristu aye. Kodwa olu yayilusuku lokuqala lwesekisi, yaye ndacinga ukuba andinakukwazi ukuya. Ndathandaza ngokuzingisileyo kuYehova, yaye kwenzeka into engalindelekanga. Kwiiyure ezimbini ngaphambi kokuqalisa kwesekisi, umbane wacima! Ngenxa yoko, ndakwazi ukuya eSikhumbuzweni yaye ukubuya kwam, ndaya esekisini. Kubonakala ukuba uYehova wawuphendula umthandazo wam.

Ngeny’ imini ndandihambisa amaphecana kubantu endandime nabo ebhankini. Omnye umdala ongumKristu wandincoma ngenzondelelo endandinayo. Wandikhuthaza ukuba ndishumayele ngendlela ecwangcisiweyo, ndihambe nebandla. Ngothando wandichazela utshintsho endimele ndilwenze ebomini bam ukuze ndikwazi ukwenjenjalo. Kanye xa ndandicinga ngokwenza olo tshintsho, ndathenjiswa ngomsebenzi ohlawulayo kwisekisi yaseUnited States. Ndandingaqinisekanga ngento emandiyenze. Ndandikufuna ukuya eUnited States, kodwa ndandingaqinisekanga enoba ukuya kwam kwakuza kundinik’ ithuba lokunamathela kwindlela endandiqalisa ukuphila ngayo. Olu yayiluvavanyo lwam lokuqala, yaye ndandingafuni ukumdanisa uYehova. Nakuba abany’ abadlali babengakholwa, ndayishiya isekisi, ndaza ndaqalisa ukuba lilungu lebandla. Ndacheba iinwele zam ezinde, ndenza nezinye iinguqulelo ebomini bam ukuze ndikwazi ukukhonza uYehova.

Ubomi Obumnandi Nendingazisoliyo Ngabo

Ngowe-1997, kanye ngaphambi kokuba ndibhaptizwe njengeNgqina likaYehova, ndajamelana novavanyo lwesibini—ndafumana elinye ithuba lokuya eUnited States, ngoku ndandiza kudlala kwinkqubo kamabonwakude eMiami yaye ndandiza kuhlawulelwa zonk’ iindleko. Kodwa ndandifuna ukubhaptizwa ndize ndiphile ubomi bokuzahlulela kuYehova. Ngoko ke andizange ndisamkele eso simemo, yaye bothuka gqitha abameli bakamabonwakude.

Abanye abantu baye bandibuza enoba andizisoli kusini na ngokuyeka ukudlala kwisekisi. Ndibaphendula ngokuthi andinakuze nanini na ndinanise ngobuhlobo nothando lukaYehova ngobomi endandibuphila ngaphambili. Nangona ndingaqhwatyelw’ izandla ngomsebenzi wam omtsha wokuba ngumshumayeli ongumKristu wexesha elizeleyo, ndingafumani udumo okanye ubutyebi beli hlabathi, ngoku ubomi bam bunenjongo. Ndivuyiswa lithemba elizukileyo lokuphila kumhlaba oyiparadesi nokwamkela umama eluvukweni.—Yohane 5:28, 29.

[Imibhalo esemazantsi]