Ndandinqwenela Ukusebenza Esekisi
Kubalisa uZoya Dimitrova
Xa ndandineminyaka eli-15 ubudala, izinto zazindihambela kakuhle—ndisebenza kwisekisi ndihamba emazweni. Kwandula ngoSeptemba 4, 1970, yehl’ intlekele. Njengoko ndandisenz’ uqulukubhode emoyeni, kwathi kusenjalo ndaya kunkaleka phantsi.
NDAZALWA ngoDisemba 16, 1952, ndahlala nabazali bam nodadewethu eSofia, eBulgaria. Ngelo xesha, iBulgaria yayililizwe elilawulwa ngobuKomanisi, unqulo lwalukhona kodwa lungathandwa. Abantu abaninzi babengakholelwa kuThixo, nabo bakholelwayo babezifihla. Nangona intsapho yakowethu yayisithi ingamaOthodoki, andizange ndikhuliswe ngonqulo, ngenxa yoko ndandingacingi nokucinga ngoThixo.
Kwandiselula, kwahla kwacaca ukuba ndiyazithanda ezemidlalo ngokukodwa umthambo. Xa ndandineminyaka eli-13 ubudala, kwafika ndoda ithile esikolweni ikhangela intombazana eza kuqeqeshelwa isekisi. Ndanconyelwa ngutitshala wam womthambo. Kwakumnandi ngokwenene ukuhamba ngemoto yodidi oluphambili, ndiye kukwenza udliwano-ndlebe novavanyo. Ndavuya gqitha ndakukhethwa. Oku yayikukuqalisa kokuzilolonga okungqongqo yaye kwathatha iminyaka engaphezu kwemibini. Ndagqiba uqeqesho lwam xa ndandineminyaka eli-15 ubudala ndaza ndaqalisa ubomi bokukhenketha nesekisi. Ilizwe lokuqala endaya kulo yayiyiBulgaria ndaza ndaya nakwamanye amazwe ayephantsi kweSoviet Union naseAlgeria, eHungary, nakwilizwe elalisakuba yiYugoslavia.
Kangangeminyaka emithathu, ndabona iphupha lam lizaliseka. Intlekele endithethe ngayo ngasentla yehla xa ndandiseTitov Veles, eMacedonia. Ndandisenza uqulukubhode emoyeni. Ugxa wam wayedla ngokundiphosa emoyeni, aze aphinde andibambe xa ndisehla. Saphosana, yaza nebhanti yam yaqhawuka ndaya kunkaleka phantsi ndisuka kumgama weemitha ezintandathu. Ndabalekiselwa esibhedlele kwaza kwafunyaniswa ukuba ndophuke ingalo, iimbambo nomqolo. Ndaf’ isiqaqa iintsuku eziliqela ndingakwazi ukukhumbula ukuba kwenzeke ntoni. Kodwa ndathi ndakuchacha ndafumanisa into yokuba ndife amazantsi. Ekubeni ndandiselula, ndandinethemba lokuba xa ndenziwe utyando, ndinokuphinda ndikwazi ukuhamba ndide ndibuyele nakwisekisi.
Kwiminyaka emibini enesiqingatha eyalandelayo, ndandinyangwa kwisibhedlele sabantu abenzakale kakhulu, ndisenethemba lokuba ndiza kuphinda ndikwazi ukuhamba. Ekugqibeleni kwafuneka ndiyamkele into yokuba andinakuphinda ndikwazi ukuhamba. Ngoku kwafuneka ndiqhele ukuhamba ngesitulo esinamavili—ubomi obahluke ngokupheleleyo kobo ndandibufuna.
Ukuqalisa Ubomi Obutsha
Ndandiqhele ukuhamba nesekisi, ndandingatsho ukuba ndiya kuze ndiyiqhele le ndlela ndiphila ngayo. Ekubeni ndandiphelelwe lithemba, ndadandatheka. Kwathi ngowe-1977, kwankqonkqoza umfana ogama linguStoyan endlwini yam. Ndathi ndakufumanisa ukuba wayengumntakwe bogxa wam, ndamngenisa ngaphakathi. Njengoko sasincokola, wandibuza ukuba likhona na ithemba lokuba ndiya kuphinda ndikwazi ukuhamba. Ekubeni ndandiphelelwe lithemba, ndathi alikho. Wathi esakundixelela ukuba nguThixo kuphela onokundinceda, ndamphendula rhabaxa ndathi: “Ukuba uThixo ukho, kutheni ndikule ngxaki?”
UStoyan, owayesandul’ ukuba liNgqina likaYehova xa wayesebenza kwisekisi eUnited States, ngobubele wandixelela ngezithembiso zeBhayibhile ngekamva. Ndavuya gqitha ndakuva ukuba umhlaba uza kuba yiparadesi. Ndachukunyiswa sisithembiso sokuba ‘akuzukuba kho kufa, kungabi sabakho kuzila nakukhala nantlungu.’ (ISityhilelo 21:4) Ndandikulangazelela ngokwenene ukubuyela empilweni! Ndavuma ngoko nangoko ukuqhutyelwa isifundo seBhayibhile. Baqala ngolo hlobo ubomi bam obutsha. Ekugqibeleni, ndandilifumene ithemba lokwenene!
Ndandihlala ndikhangele phambili kwisifundo sam seBhayibhile veki nganye. Kuqala ndandifunda noStoyan kamva ndafunda noTotka owayeliNgqina elinobubele. Wandinceda ndaba nolwazi olungakumbi lweBhayibhile, ndaza ndazahlulela kuYehova uThixo. Ngelo xesha, kwakungekho mzalwana ufanelekileyo ukundibhaptiza eSofia, kwafuneka ndilinde omnye umzalwana owayeza kutyelela eMacedonia. NgoSeptemba 11, 1978, ndabhaptizwa kwam ebhafini malunga nasemva konyaka ndiqalise ukufunda iBhayibhile. Ukubhaptizwa kwam njengeNgqina likaYehova kwandivuyisa kakhulu, nobomi bam baba nenjongo.
Inyaniso yeBhayibhile endandiyifundile yayivutha njengomlilo kum. Nabani na oze kundityelela ndandimxelela ngezinto endizifundileyo. Ngelishwa akakho umntu owayenikela ingqalelo kwizinto endandizithetha, mhlawumbi ngenxa yokulimala kwam babecinga ukuba ndiyabhuda.
Impazamo Enzulu
Ngelo xesha umsebenzi wamaNgqina kaYehova wawuvaliwe eBulgaria kwaye ayembalwa amaNgqina. Ndandingakwazi ukuya ezintlanganisweni yaye kwakunzima ukunxulumana namanye amaNgqina. Ukungabikho kweentlanganiso nokungayiqondi kwam ingozi yokunxulumana nabantu abangaphili ngokuvisisana neBhayibhile, kwabangela ukuba ndenze isono esinzulu.
Ndaba nomvandedwa, ndaziva ndohlukene noYehova uThixo. Ndandityumkile ndibuhlungu, ndaphalaza imbilini yam kuYehova, ndamcela ukuba andixolele. Kamva ngokuncedwa ngabadala abangamaKristu, ndachacha ngokomoya, ndakwazi nokukhonza uYehova ngovuyo kwakhona. Ndilixabisa ngokwenene ilungelo lokukhonza uYehova ngesazela esicocekileyo nokunxulumana nentlangano yakhe ecocekileyo.
Ndonwabile Nangona Ndineziphene
Ukwenzakala kwam kwiminyaka engama-40 eyadlulayo kwalicima iphupha lam lokuhamba nesekisi kwaza kwandenza ndahlala kwisitulo esinamavili. Nakuba kunjalo, andidimazekanga ngokungathi ndiye ndasilela ebomini. Inyaniso yeBhayibhile iye yandinceda ndabona ukuba iphupha lam lokufumana ulonwabo nolwaneliseko kwisekisi lalisekelwe kwizinto ezingenaxabiso. Ndiye ndabona indlela abantu endandisebenza nabo kwisekisi abaye baphoxeka ngayo ebomini. Kwelinye icala, ndiye ndafumana obona buncwane, ukuba nolwalamano noMdali wam uYehova uThixo. Ndiye ndonwaba kakhulu kunokuba bekuya kuba njalo ukuba ndandisasebenza kwisekisi.
Ngaphezu koko, ndiye ndavuyiswa kukubona abantu abaninzi befumana ulwazi ngenyaniso yeBhayibhile baza bazahlulela kuThixo wethu onothando, uYehova. Ukuqalisa kwam ukufunda iBhayibhile ngowe-1977, ayelibathwana amaNgqina kaYehova eBulgaria. Nkqu nangowe-1991, xa amaNgqina ayeqalisa ukubhaliswa emva kokuwa kobuKomanisi, ayengekho ngaphezu kwekhulu amaNgqina kweli lizwe. Kuye kwandivuyisa ngokwenene ukubona abavakalisi boBukumkani besiya besanda ngenani besiba malunga ne-1 800!
Usemninzi umsebenzi ofuna ukwenziwa eBulgaria. Baninzi abantu abafuna ukwazi iLizwi likaThixo. Oku kubonakala kwinani labantu ababeze kwiSikhumbuzo sokufa kukaKristu ngowama-2010 elingama-3 914. Iyandichwayitisa indlela uYehova aye wawusikelela ngayo umsebenzi eBulgaria. Ndiye ndazibonela “omncinane” esiba “luhlanga olunamandla,” ngokutsho kukaIsaya 60:22.
Enye into eye yandivuyisa kakhulu kukukhululwa kweNguqulelo Yehlabathi Elitsha YeZibhalo Ezingcwele ngesiBulgaria. Le nto yenzeka ngoAgasti 2009 kwiNdibano Yesithili eyayiseSofia enomxholo othi “Hlalani Nilindile!” Ukukhululwa kwale Bhayibhile ngolwimi lam yaba kukuzaliseka kwephupha lam! Ngokungathandabuzekiyo iza kusinceda sincede abantu abangakumbi ukuba bazi inyaniso yeBhayibhile ngesiBulgaria.
Nangona ndingakwazi ukushumayela iindaba ezilungileyo zoBukumkani bukaThixo kangangoko ndifuna ngenxa yeziphene endinazo, kuyandivuyisa ukuthetha ngenyaniso yeBhayibhile nabamelwane bam naye nabani na ondityelelayo. Ngesinye isihlandlo ndandiseverandeni, ndabiza ummelwane owayedlula ngendlela. Weza yaye emva kokuba ndithethe naye ngeBhayibhile, wasamkela isifundo seBhayibhile. Ndavuya gqitha esakubhaptizwa waza waba ngudadewethu wokomoya. Ndiye ndanceda abantu abane ukuba bazahlulele kuYehova.
Eyona nto indonwabisayo nendikhuthazayo kukuya kwiintlanganiso zamaKristu kunye nabazalwana noodade abangaphezu kwekhulu, abanjengentsapho kum. Ekubeni kwilizwe lethu zingekho izithuthi zikawonkewonke ezenzelwe abalupheleyo nabaneziphene, kuba nzima ukuya kwiintlanganiso zebandla. Kodwa kukho umzalwana oselula ondincedayo. Kwintlanganiso nganye uyandilanda aphinde andibuyise. Ndiyambulela uYehova ngokuba ndililungu lentsapho yokomoya ethandana kangaka.
Xa ndikhangela ngasemva, ndiyabona ukuba izinto azihambanga ngendlela endandiyilindele. Ukukhonza uYehova kuye kwandinika uvuyo nekamva eliqaqambileyo. Siyandivuyisa isithembiso sikaThixo sokuba kumhlaba oyiparadesi, “isiqhwala siya kutsiba njengexhama.” (Isaya 35:6) Ndikhangele phambili kumhla apho ndiya kuphakama kwisitulo samavili nditsiba tsibe, ndingumqabaqaba ongabikwa nowempumlo.
[Amagama acatshulweyo akwiphepha 30]
“Eyona nto indonwabisayo nendikhuthazayo kukuya kwiintlanganiso zamaKristu”
[Amagama acatshulweyo akwiphepha 31]
“Enye into eye yandivuyisa kakhulu kukukhululwa kweNguqulelo Yehlabathi Elitsha YeZibhalo Ezingcwele ngesiBulgaria”
[Umfanekiso okwiphepha 29]
Ndaqalisa ukusebenza kwisekisi ndineminyaka eli-15 ubudala