Inyathelo 7
Fundisa ngomzekelo
Kutheni eli ilinyathelo elibalulekileyo? Kufundwa ngokubona yaye ukuthetha asikokwenza. Ngokomzekelo, abazali basenokuxelela abantwana babo ukuba babe nentlonelo baze bathethe inyaniso. Noko ke, ukuba abazali bayangxolisana okanye bayabangxolisa abantwana baze baxoke xa bafun’ ukuzikhupha engxakini, bafundisa abantwana ukuba abantu abadala bafanele baphile ngaloo ndlela. Umbhali uGqr. Sal Severe uthi, ukuxelisa abazali “yenye yezona ndlela zinamandla abantwana abafunda ngazo.”
Ingxaki: Abazali abafezekanga. Umpostile uPawulos wabhala: “Bonke bonile baza basilela kuzuko lukaThixo.” (Roma 3:23) Esikhuthaza ukuba sikulumkele esikuthethayo, umfundi uYakobi wathi: “Ulwimi, akukho namnye kuluntu onako ukulwenza mbuna.” (Yakobi 3:8) Ukongezelela, abantwana badla ngokubacaphukisa abazali babo. ULarry onabantwana ababini nodla ngokukwazi ukuhlala ezolile nokuzibamba, uthi: “Kuyamangalisa ukubona indlela ekulula ngayo ukuba abantwana bam bandicaphukise ndize ndiphelelwe ngumonde.”
Isicombululo: Zamani ukuba ngabazali abalungileyo—ingengabo abafezekileyo. Yaye sebenzisa iimpazamo ozenzayo ukubafundisa isifundo esithile. UChris onabantwana ababini uthi: “Ukuba abantwana bandicaphukisile ndaza ndanomsindo okanye ukuba ndibenzele isigqibo zaza izinto azahamba kakuhle, ndidla ngokuyivuma loo mpazamo ndize ndicel’ uxolo. Oku kwabafundisa abantwana bam ukuba abazali nabo bayazenza iimpazamo yaye sonke sifanele senze umzamo wokuphucula indlela esiziphatha ngayo.” UKostas, ekuthethwe ngayo ngaphambilana, uthi: “Ndifumanise ukuba ekubeni ndicela uxolo xa ndigqajukelwe ngumsindo, nabo abantwana bam abangamantombazana bafunde ukucel’ uxolo xa ingabo abenze iimpazamo.”
UYehova uThixo uthi: “Musani ukubacaphukisa abantwana benu, kodwa qhubekani nibakhulisela kwingqeqesho nasekweyiselweni kwengqondo kuYehova.” (Efese 6:4) Xa umntu onegunya ethetha enye into aze enze enye into, oku kubacaphukisa ngendlela efanayo abantwana nabantu abadala okanye kubacaphukise nangakumbi abantwana. Ngoko ke, kutheni ungazibuzi le mibuzo ilandelayo ekupheleni kosuku ngalunye: Ukuba ndinokuthi cwaka imini yonke, yintoni abanokuyifunda abantwana bam kwizenzo zam? Ngaba le yinto endizama ukubafundisa yona ngamazwi?
[Amagama acatshulweyo akwiphepha 9]
“Ngaba, . . . wena ufundisa uthile ongomnye, akuzifundisi?”—Roma 2:21
[Imifanekiso ekwiphepha 9]
Xa umzali ecela uxolo, nomntwana ufunda ukwenjenjalo