Izimvo Zabafundi BakaVukani!
Ukholo Lomntwana (Agasti 2006) Kwihlabathi elitsha elingekude ndikhangele phambili ekuboneni uDustin nolunye ulutsha oluninzi olwalufile, lubaleka yaye luxhuma-xhuma lunamandla.
UA. A., waseSri Lanka
Ndiye ndachukumiseka lukholo nendlela alukhuthazo ngayo uDustin. Okwenzeka ebomini bakhe kuye kwandinceda ndakubona ukubaluleka kwenyaniso ebomini bam nokubeka izinto zokuqala endaweni yazo. Ngoku ndiyaqonda ukuba eyona nto ifanele ibe phambili kukuba nolwalamano oluhle noYehova nokubeka izilangazelelo zoBukumkani kwindawo yokuqala.
UM.C.V., waseBrazil
Intliziyo yam yachukumiseka lukhuthazo nesimo sengqondo esihle uDustin anaso ngenyaniso. Indlela awayesenza ngayo yayibonisa ukuba wayefuna ukukholisa uYehova nokunceda abanye. NjengoDustin, nam ndifuna ‘ukulubaleka ugqatso kude kuse ekugqibeleni!’
UM. N., waseJapan
Ndineminyaka esixhenxe ubudala. Ndithi maz’ enethole kuba niye napapasha eli nqaku. Ndachukunyiswa lukholo olomeleleyo uDustin analo ngoYehova nangona wayegula kakhulu. Umzekelo wakhe uye wandikhuthaza ukuba ndimsebenzele ngakumbi uThixo.
UT. D.,waseItali
Ulungelelwano Olumangalisayo Kwizityalo (Septemba 2006) Ndiye ndalifunda kangangeyure enesiqingatha eli nqaku. Liyafundisa. Ndiye ndazizobela iidayagram ukuze ndiliqonde kakuhle. Noko ke, nceda uphawule ukuba iceba elili-13/21 alinakuchazwa njengelisondele kwisangqa kodwa kunoko lisondele kumlinganiselo oseleyo wamaqondo angama-222,5.
UL. C. waseUnited States
“UVukani!” uyaphendula: Abafundi abaninzi bathi iceba elingena gingci limalunga namaqondo angama-222,5. Kutheni inqaku lethu lithe “iengile egqibeleleyo” inamaqondo ali-137,5—kwale engile inye ilinganiswe yonke? IWeb site yeMathWorld ithi: “Iengile egqibeleleyo yahlula phakathi iengile epheleleyo [360°] ngomlinganiselo ogqibeleleyo (kodwa elinganiswa ngendlela eyahlukileyo ukuze ibe ngaphantsi kwamaqondo ali-180°).” Echaza isizathu sokuba iingcali zezibalo nezazinzulu ziyichaza ngale ndlela iengile egqibeleleyo, ingcali yezibalo yaseNgilani uGqr. Ron Knott uthi: “Sidla ngokunikel’ ingqalelo kakhulu kule engile incinane.” Nangona inxalenye ye-engile egqibeleleyo imalunga ne-13/21 (ngaphezu kwesiqingatha), iengile egqibeleleyo ngokuqhelekileyo iba ngamaqondo ali-137,5 (ngaphantsi kwesiqingatha).
“Ukuvalelwa Entolongweni Ngenxa Yokholo Lwabo” (Aprili 2006) Andililo iNgqina likaYehova, kodwa oko akundithinteli ukuba ndibe nentlonelo ngamalungu onqulo lwenu. Ndiye ndadibana namaNgqina amaninzi ngoxa bendisebenza kwintolongo yaseGross-Rosen naxa bendikwinkampu yoxinaniso yaseBuchenwald. Bebengumzekelo kwindlela ebebeziphethe ngayo yaye babezimisele ukulandela iinkolelo zabo. Ngenxa yoko baye bahlonelwa nangamanye amabanjwa. Kwanee-SS zachukumiseka. Ndiya kusoloko ndiwamkela amaNgqina kaYehova ekhayeni lam.
UP. V., waseUnited States