IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • g 8/06 iphe. 26-27
  • Ukholo Lomntwana

No video available for this selection.

Sorry, there was an error loading the video.

  • Ukholo Lomntwana
  • Vukani!—2006
  • Amanqaku Afanayo
  • Bazinikela Ngokuvumayo EMexico
    IMboniselo Evakalisa UBukumkani BukaYehova 2013
  • Izimvo Zabafundi BakaVukani!
    Vukani!—2007
  • Indlela IBhayibhile Enokubanceda Ngayo Abantu Abanesifo Seswekile
    Vukani!—2003
  • Kutheni Ndigula Kangaka Nje?
    Imibuzo Yabantu Abaselula—Iimpendulo Eziluncedo, Umqulu 2
Khangela Okunye
Vukani!—2006
g 8/06 iphe. 26-27

Ukholo Lomntwana

UDUSTIN wayesibakho maxa wambi xa unina eqhutyelwa isifundo seBhayibhile ngamaNgqina kaYehova. Nangona wayeneminyaka eli-11 kuphela ubudala, wayezikisa ukucinga yaye ebuza imibuzo ebhadlileyo. Kungekudala, wazicelela ukuba afundelwe iBhayibhile ngudade owayekade engumvangeli wasemazweni owayefundela unina. Kwakhona waqalisa ukuthetha nabantwana afunda nabo ngezinto azifundileyo.

UDustin waqalisa ukuya kwiintlanganiso kwiHolo yoBukumkani yasekuhlaleni yaye wayephendula xa abaphulaphuli becelwa ukuba benjenjalo. Xa yena noodade wabo ababini nomntakwabo batyelela uyise, uyise wabanyanzelisa ukuba bonke baye ecaweni. UDustin wamchazela isizathu sokuba ekhetha ukuya kwiHolo yoBukumkani. Uyise wamvumela ukuba aye.

Ngobunye ubusuku emva kokuphuma kweentlanganiso, unina wamkhangela wamncama. Engakhange amxelele, waya kuthetha nomveleli weSikolo Sobulungiseleli Sobuthixo yaye wambuza enoba angabhalisa na esikolweni. Unina wavuma ukuba abhaliswe. Evuya, wayejonge phambili kwintetho yakhe yokuqala. Noko ke, kwangeli xesha, waqalisa ukuqaqanjelwa lihleza yaye wasiwa koogqirha abahlukahlukeneyo ukuze bamxilonge. Ekugqibeleni, bafika ubusuku uDustin awayeza kuqala ngabo ukunikela intetho. Ngelo xesha, wayesele ehamba ngeentonga. Nangona kwakubonakala ukuba uyaqaqanjelwa, wahamba ngaphandle kweentonga ukuya eqongeni.

Kungekudala emva koko, kwafunyaniswa ukuba uDustin uneEwing’s sarcoma, uhlobo olunqabileyo lomhlaza wamathambo. Wachitha ixesha elininzi kunyaka owalandelayo kwisibhedlele sabantwana eSan Diego, eKhalifoniya. Ukusetyenziswa kwamachiza okunyanga umhlaza, imitha, kanti ekugqibeleni ukunqunyulwa komlenze wakhe wasekunene nethambo lehleza, zonke ezo zinto azizange zilunciphise ukholo lwakhe olomeleleyo nothando lwakhe ngoYehova. Xa wayebuthathaka engakwazi nokufunda, unina owayesoloko ekunye naye emfundela.

Nangona imeko kaDustin yayisiba mandundu, akazange akhalaze. Wayesoloko exakekile, ehamba ngesitulo sakhe esiqhutywayo ekhuthaza ezinye izigulana nabazali bazo, kuquka nesigulana esiliNgqina. Abo basebenza esibhedlele babebona ukuba uDustin nesigulana esasiliNgqina babehlukile—ukholo lwabo lwalubomeleza.

UDustin wayefuna ukubhaptizwa. Ngoko ke, ngoxa wayelele esofeni, ebuthathaka ukuba angahlala, abadala baqwalasela kunye naye imibuzo ebuzwa abo baza kubhaptizwa ukuze babe ngamaNgqina kaYehova. Ngo-Oktobha 16, 2004, uDustin wabhaptizwa kwindibano yesiphaluka, eneminyaka eli-12 ubudala.

Njengokuba intetho yobhaptizo yayiza kuqalisa, uDustin waqhutywa ngesitulo wasiwa apho nabanye ababeza kubhaptizwa babehleli khona. Xa bacelwa ukuba baphakame, uDustin waphakama ngaloo mlenze wakhe mnye, enxibe engayiwayo isuti, ebambelele esitulweni sakhe. Wayiphendula loo mibuzo yabantu abaza kubhaptizwa ngokuvakalayo. Yonke intsapho yakuloDustin yayikho, kuquka uyise nomama womtshato wesibini. Abo basebenza esibhedlele nabazali babantwana nabo abanomhlaza besi sibhedlele nabo babekho.

Usuku nje emva kokuba uDustin ebhaptiziwe, waphinda wabuyela esibhedlele. Umhlaza wawusele uwatyhutyhe onke amathambo asemzimbeni wakhe. Njengokuba wayesiya esiba buthathaka yaye eziva ukuba uza kufa, wabuza unina enoba wayeza kufa kusini na. Unina waphendula: “Kutheni ubuza nje? Ngaba uyakoyika ukufa?”

Wathi: “Akunjalo. Ndiza kuvala nje amehlo yaye xa ndiwavula eluvukweni, kuya kuba ngathi ndiye ndawavala nje umzuzwana. Andisayi kuphinda ndiqaqanjelwe.” Ngoko wathi, “ndibuhlungu nje ngentsapho yasekhaya.”

UDustin wafa kwinyanga elandelayo. Kumngcwabo wakhe kwakukho oogqirha, abongikazi, iintsapho zabo basebenza esibhedlele, ootitshala, abamelwane, intsapho yakuloDustin engamaNgqina kaYehova naleyo ingengawo. UDustin wacela ukuba abo beze emngcwabeni wakhe bachazelwe ngoko akukholelwayo. Umveleli weSikolo Sobulungiseleli Sobuthixo, nowayemabele intetho yakhe yokuqala neyokugqibela, wakwazi ukunikela intetho eyayisomelez’ ukholo kwiHolo eyayizele ime ngembambo.

Imibhalo emibini eyayithandwa nguDustin yashicilelwa kwaza kwanikwa abantu ababeze emngcwabeni—Mateyu 24:14 noweyesi-2 kuTimoti 4:7. Ukholo lwakhe olomeleleyo nengqibelelo awayenayo yakhuthaza bonke abantu ababemazi. Sijonge phambili xa siyakumamkela eluvukweni.—Kubalisa iNgqina elalifunda noDustin.

[Amagama acatshulweyo akwiphepha 27]

“Ndiwulwile umlo omhle, ugqatso ndilubaleke kwada kwesa ekugqibeleni, ukholo ndilugcinile.”—2 Timoti 4:7

[Umfanekiso okwiphepha 26]

Ngasentla: UDustin, ngoxa wayesesempilweni

[Umfanekiso okwiphepha 26]

Ngezantsi: UDustin wayebhaptizwa eneminyaka eli-12 enesiqingatha ubudala

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share