Imbono YeBhayibhile
Ngaba Ukuthintela Inzala Kuphosakele?
UTHINI wena? Ngaba kuphosakele ngabantu abatshatileyo ukuthintela inzala? Impendulo yakho ixhomekeke kwiimfundiso zecawa oyihambayo. ICawa yamaKatolika ifundisa ukuba ukuthintela inzala “akufanelekanga.” Imfundiso yamaKatolika ikhuthaza ukuba kungathintelwa inzala, abantu abatshatileyo babe neentlobano zesini ngenjongo yokuba babe nabantwana. Ngoko ke, kwiCawa yamaKatolika, ukuthintela inzala “kunxamnye nemilinganiselo yokuziphatha.”
Abantu abaninzi kunzima ukuba bakwamkele oku. Inqaku lePittsburgh Post-Gazette lithi ngalo mba, “amaKatolika angaphezu kwama-75 ekhulwini eUnited States athi icawa ifanele ikuvumele ukusetyenziswa kwezinto zokuthintela inzala ezingezizo ezokwemvelo. . . . Yaye suku ngalunye amaninzi kuwo aye akubetha ngoyaba ukuyekiswa kwezinto zokuthintela inzala ezingezizo ezokwemvelo.” Omnye wawo uLinda, umama onabantwana abathathu, uyavuma ukuba kusetyenziswe izinto ezithintela inzala, kodwa uthi: “Andisikholelwa isazela sam xa sindixelela ukuba ndiyona.”
Lithini lona iLizwi likaThixo ngalo mba?
Ubomi Buxabisekile
UThixo ubujonga ubomi bomntwana ongekazalwa njengobuxabisekileyo. UKumkani uDavide wakwaSirayeli, ephefumlelwe wabhala wathi: “Wandibiyela esiswini sikama. . . . Amehlo akho andibona ndiseyimbumba, yaye zonke iinxalenye zam zazibhalwe phantsi encwadini yakho.” (INdumiso 139:13, 16) Ubomi buqala xa umntwana esakhawulwa yaye kuMthetho kaMoses wayephenduliswa umntu oye wenzakalisa umntwana ongekazalwa. IEksodus 21:22, 23 ibonisa ukuba, ukuba athe amadoda esilwa enzakalisa umfazi omithiyo okanye kwaphum’ isisu kwakufuneka lo mbandela usingathwe ngabagwebi. Kwakufuneka bahlolisise izibakala nentsusa kodwa isigwebo sasiya kuba “umphefumlo ngomphefumlo” okanye ubomi ngobomi.
Oku kuyafana nokuthintela inzala kuba ezinye iindlela zokuthintela inzala iba ngathi umntu uyaqhomfa. Ezi ndlela zokuthintela inzala azivisisani nomgaqo kaThixo wokuhlonela ubomi. Kodwa izinto ezininzi ezisetyenziswayo ukuthintela inzala aziwaphuli lo mgaqo. Kuthekani ukuba sisebenzisa ezo ndlela ukuthintela inzala?
IBhayibhile ayiwayaleli amaKristu ukuba azale. UThixo waxelela isibini sokuqala nentsapho kaNowa: “Qhamani, nande, niwuzalise umhlaba.” Kodwa amaKristu awazange awunikwe lo mthetho. (Genesis 1:28; 9:1) Ngoko ke, abantu abatshatileyo banokuzenzela isigqibo enoba baza kuba nabantwana kusini na, baza kuba bangaphi nokuba baza kuba nabo nini. Kwangaxeshanye iZibhalo azikugxeki ukuthintela inzala. Enoba indoda nomfazi bakhetha ukusebenzisa izinto zokuthintela inzala, eso sigqibo sifanele siphume kubo. Ngoko ke, kutheni iCawa yamaKatolika izigxeka izinto zokuthintela inzala?
Ubulumko Babantu NobukaThixo
INew Catholic Encyclopedia ithi kwakungenkulungwane yesibini yeXesha Eliqhelekileyo ekwathi abo bazibanga bengamaKristu bathi phithi thwanga ngumthetho wamaStoyike owawusithi ekuphela kwenjongo yokuba abantu abatshatileyo babe neentlobano zesini kukuze babe nabantwana. Oko babekukholelwa yayiyintanda-bulumko, kwakungasekelwanga eBhayibhileni. Kwakungasekelwanga kubulumko bukaThixo kodwa kubulumko babantu. Le ngcamango yahlala ikho ukutyhubela iinkulungwane yaye yongezelelwa ngabafundi bezakwalizwi bamaKatolika.a Noko ke, le mfundiso yayisele inengcamango yokuba ukuba neentlobano zesini nje ungenazinjongo zokuba nabantwana kusisono yaye kukuziphatha kakubi. Kodwa oku asikuko oko kufundiswa ziZibhalo.
Isebenzisa intetho ebumbongorha, incwadi yeBhayibhile yeMizekeliso ithi ngeentlobano zesini phakathi kwendoda nomfazi abatshatileyo: “Sela amanzi kwelakho iqula, namanzi aqukuqelayo kowakho umthombo. . . . Mawusikelelwe umthombo wakho wamanzi, ube nemihlali ngumfazi wobutsha bakho, ixhamakazi elithandekayo nebhokhwe yasezintabeni enomtsalane. Amabele akhe makakuyobe ngamaxesha onke. Uthabatheke rhoqo luthando lwakhe.”—IMizekeliso 5:15, 18, 19.
Iintlobano zesini phakathi kwendoda nomfazi abatshatileyo sisipho esivela kuThixo. Kodwa ukuba neentlobano zesini akwenzelwanga ukuba nabantwana kuphela. Kwakhona iintlobano zesini zivulela ithuba lokuba isibini esitshatileyo sibonise ulwazelelelo nothando omnye komnye. Ngoko ke, isibini esitshatileyo simele sizikhethele enoba sifuna ukuthintela inzala kusini na, yaye akufanele kubekho mntu usigwebayo ngokhetho lwaso.—Roma 14:4, 10-13.
[Umbhalo osemazantsi]
a Kwakungenkulungwane ye-13 kuphela apho uGregory IX wawisa umthetho ngoko iNew Catholic Encyclopedia ikubiza ngokuba “kukuqala kukapopu ukuwisa umthetho onxamnye nezinto zokuthintela inzala.”
NGABA WAKHA WAZIBUZA?
◼ Ngaba iyona indoda nomfazi xa besiba neentlobano zesini?—IMizekeliso 5:15, 18, 19.
◼ Yintoni amaKristu afanele ayikhumbule ukuba asebenzisa izinto ezithintela inzala?—Eksodus 21:22, 23.
◼ Abanye abantu bafanele basijonge njani isibini esitshatileyo esisebenzisa izinto zokuthintela inzala?—Roma 14:4, 10-13.
[Amagama acatshulweyo akwiphepha 11]
UThixo wachazela isibini sokuqala nentsapho kaNowa wathi: “Qhamani, nande, niwuzalise umhlaba.” Kodwa amaKristu awazange awunikwe lo mthetho