“Hlalani Ninombulelo”

◼ Izihlandlo eziliqela, iBhayibhile ikhuthaza abanquli bakaThixo ukuba babe nombulelo. INdumiso 92:1 ithi: “Kulungile ukubulela kuYehova.” Nompostile uPawulos wabongoza amaKolose wathi: “Hlalani ninombulelo.”—Kolose 3:15.

Kukho izizathu ezivakalayo zokuba sibe nombulelo. Unjingalwazi uRobert Emmons weYunivesithi yaseKhalifoniya eseDavis, uthi: “Iingcaphephe eziphengulula lo mbandela zithi xa abantu bebulelwa ngaloo nto bayenzayo batsho bakwazi ukuhlangabezana neengxaki, ezinjengoxinezeleko baze bazixabise.”

Iphephancwadi iTime likhankanya amanye amaqithiqithi: “Abantu abanombulelo . . . baphila ixesha elide, bahlala bechwayitile, abafane baxinezeleke kwaye abadandatheki njengabanye abantu.”

Noko ke, okulusizi kukuba iBhayibhile yaxela kwangaphambili ukuba “ngemihla yokugqibela,” abantu abaninzi baya kuba “ngabathandi beziqu zabo” (IBhayibhile yesiXhosa yowe-1996) ‘bangabi nambulelo.’ (2 Timoti 3:1-5) AmaKristu okwenyaniso angazikhwebula njani kulo moya? UMbhali weBhayibhile uthi: “Mna, Yehova, ndinguThixo wakho, Lowo ukufundisa okuyingenelo kuwe, Lowo ukubangela unyathele endleleni ofanele uhambe ngayo.” (Isaya 48:17) Ukuba sithobela imithetho kaThixo, sakusinda kwiintlungu ezibangelwa kukwenza ukuthanda kwethu. Ukongezelela koko, sinokuqiniseka ukuba uYehova uyayibona imigudu yethu kwaye uya kusivava. (Hebhere 6:10) Loo maqithiqithi asenza ‘simbulele uYehova.’—INdumiso 107:8.