“Zibonakaliseni Ninombulelo”
1 Inkoliso yethu yaqeqeshwa kwasebuntwaneni ukuthi “ndiyacela” nokuthi “ndiyabulela” xa umntu othile esenzela into entle okanye ububele. UPawulos uyasiluleka ukuba ngamaxesha onke ‘sizibonakalise sinombulelo,’ yaye sifanele simbulele ngokukhethekileyo uYehova. (Kol. 3:15, 16) Kodwa singawubonakalisa njani umbulelo esinawo kuMdali wethu Ozukileyo? Yaye ziziphi izizathu ezikhethekileyo esinazo zokumbulela?
2 Umpostile uPawulos wabhala wathi: “Makubulelwe kuThixo, kuba usinika uloyiso ngayo iNkosi yethu uYesu Kristu!” (1 Kor. 15:57) Nyaka ngamnye kwixesha leSikhumbuzo, sikhunjuzwa ngothando olungenambaliso olwabonakaliswa nguThixo noKristu ekulungiseleleni intlawulelo esenza sibe nethemba lobomi obungunaphakade. (Yoh. 3:16) Ekubeni phantse sonke sikhe safelwa ngabantu esibathandayo, hayi indlela esinombulelo ngayo ngedinga likaYesu lovuko! Iintliziyo zethu zisuka ziphuphume ngumbulelo sakucinga ngethemba lokusinda kwisiphelo sale nkqubo singakhange sife nje konke konke. (Yoh. 11:25, 26) Siswel’ imilomo yokubulela zonke iintsikelelo ezimangalisayo esisaya kuzifumana kwisandla sikaYehova kumhlaba oyiParadesi ozayo. (ISityhi. 21:4) Ngaba zikho ezinye izizathu ezibhetele kunezi anokuthi ubani ‘azibonakalise enombulelo’ kuThixo?
3 Indlela Esinokumbulela Ngayo UThixo: Kusoloko kuyinto efanelekileyo ukuvakalisa imibulelo yethu kuYehova ngomthandazo ngenxa yokulunga kwakhe. (INdu. 136:1-3) Kwakhona, sishukunyiselwa ukubonakalisa imibulelo yethu kuye nangezinye iindlela ezifanelekileyo. Ngokomzekelo, siza kube sikho ngokuqinisekileyo ngeCawa, ngoMatshi 23, kwiSikhumbuzo sokufa kukaKristu. Ukuze sifak’ isandla ekuhlangabezaneni neentswelo zokuphathekayo zebandla lasekuhlaleni nezomsebenzi owenziwa ehlabathini lonke, ngovuyo ‘simzukisa ngobuncwane bethu uYehova.’ (IMize. 3:9) Sibaxhasa ngokupheleleyo abadala yaye siyasebenzisana nabo, ngaloo ndlela sibonakalisa umbulelo esinawo kuYehova ngoncedo alunikela ngabo. (1 Tes. 5:12, 13) Yonke imihla, sizabalazela ukuhlala sinehambo entle ezukisa igama likaThixo. (1 Pet. 2:12) UYehova uyakholiswa zizo zonke ezi ndlela zokubonakalisa umbulelo esinawo.—1 Tes. 5:18.
4 Eyona Ndlela Ibalaseleyo Yokubulela: Ukuba nesabelo ngomphefumlo uphela kumsebenzi wokushumayela ngoBukumkani, ekuzukiseni igama likaYehova, ekuvakaliseni umbulelo ngomthandazo nasekulweleni inyaniso ngokuthembeka kuphakathi kwezona ndlela zibalaseleyo esinokuvakalisa ngazo umbulelo osuk’ emazantsi eentliziyo zethu kuMdali wethu ngenxa yazo zonke izinto asenzele zona. UYehova uyavuya xa esibona sinikela kuye inkonzo engcwele ekuhambiseleni phambili ukuthanda kwakhe kokuba ‘kusindiswe zonke iintlobo zabantu.’ (1 Tim. 2:3, 4) Kungeso sizathu le nto abavakalisi abaninzi kangaka abanako besabela kwikhwelo elihlatywe kuBulungiseleli Bethu BoBukumkani bukaFebruwari ukuze babhalise njengoovulindlela abangabancedani kangangenyanga enye okanye ezingakumbi ngoMatshi, ngoAprili nangoMeyi. Ukuzibhokoxa kubulungiseleli yindlela ebalaseleyo ‘esinokuzibonakalisa ngayo sinombulelo’ kuThixo. Ngaba uya kuba nako ukuba nguvulindlela ngoAprili? ngoMeyi?
5 Sinikwe ithemba eliqinisekileyo lokuphila ngonaphakade. Xa silibona lizaliseka, yonke imihla siya kuba nentaphane yezizathu ezingakumbi zokuqhubeka simbulela sinovuyo uYehova.—INdu. 79:13.