Ngaba Yayilwa?
Intambo Yesigcawu Eyisilika
◼ Ikhaphukhaphu kunomqhaphu kodwa yomelele kunentsimbi. Kangangamashumi eminyaka, izazinzulu ziye zahlolisisa intambo yesigcawu eyisilika. Intambo yesigcawu eyisilika ebizwa ngokuba yidragline—yeyona yomeleleyo kwiintlobo ezisixhenxe zeentambo zesigcawu—yeyona iye yabangel’ umdla kakhulu ebantwini. Yomelele kunesilika ekudla ngokwenziwa ngayo impahla.
Khawucinge ngoku: Imisonto efana neKevlar kufuneka yenzelwe kwindawo etshisa kakhulu nenezinyibilikisi ezithile. Ngokwahlukileyo, xa kusenziwa intambo yesigcawu akufuneki bushushu bongozelelekileyo yaye inyityilikiswa ngamanzi. Ngaphezu koko, isilika yedragline yomelele kuneKevlar. Xa inokwenziwa nkulu ilingane nebala lokudlala ibhola ekhatywayo, indlu yesigcawu eyenziwe ngedragline, inokubamba ubhazabhaza wenqwelo-moya ebhabhayo ame ngxi!
Akumangalisi ke ngoko ukuba abaphandi babe nomdla kangaka kwindlela eyomelele ngayo le ntambo yesigcawu. UAimee Cunningham ubhala enjenje kwiphephancwadi iScience News: “Izazinzulu zingathanda ukuvelisa into eyomelele njengale ntambo, ezinokukwazi ukuyisebenzisa ekwenzeni ivesti ekungaphumeli mbumbulu kuyo, neentsimbi zokwenza ibhulorho.”
Kodwa akukho lula ukwenza into efana nesilika yedragline, kuba le ntambo iphuma ngaphakathi kumzimba wesigcawu yaye indlela eyenzeka ngayo ayikaqondwa kakuhle. UCheryl Y. Hayashi, oyingcali yebhayoloji, ocatshulwe kwiphephancwadi iChemical & Engineering News uthi: “Ibangel’ iintloni noko into yokuphawula ukuba, abantu abaninzi abakrelekrele boyiswa kukulinganisa into eyenziwa nje ngokulula zizigcawu ezikumagumbi angaphantsi ezindlwini zethu.”
Ucinga ntoni? Ngaba isigcawu esinentambo eyomelele okwentsimbi sazivelela okanye ngaba sadalwa nguMdali okrelekrele?
[Umfanekiso okwiphepha 24]
Umfanekiso wesigcawu esikhupha intambo yaso eyisilika
[Inkcazelo]
Copyright Dennis Kunkel Microscopy, Inc.