Imbono YeBhayibhile

Ngaba UThixo Uyazixolela Izono Ezinzulu?

INCEBA lolunye lweempawu zikaThixo eziphambili. (INdumiso 86:15) Kodwa unenceba kangakanani? Umdumisi wabhala esithi: “Ukuba ubulinda iziphoso, Ya, Owu Yehova, ngubani na obenokuma? Kuba ukuxolela kokwenyaniso kukuwe, ukuze woyikwe.” (INdumiso 130:3, 4) Enye indinyana ithi: “Njengokuba kude kwempumalanga entshonalanga, kunjalo ukukukhwelelisa kwakhe kude nathi ukunxaxha kwethu. Njengoyise obenzela inceba oonyana bakhe, uYehova ubenzele inceba abo bamoyikayo. Kuba yena uyakwazi ukuyilwa kwethu, ekhumbula ukuba siluthuli.”—INdumiso 103:12-14.

Licacile elokuba inceba kaYehova igqibelele kwaye umlinganiselo wayo awunakulinganiswa, ngaphezu koko uyazi ukuba siyasilela nokuba asifezekanga—“siluthuli.” Khawucinge ngezinye iindinyana zeBhayibhile ezibonisa inceba kaThixo.

Umpostile uPetros wakhanyela uYesu izihlandlo ezithathu. (Marko 14:66-72) Ngaphambi kokuba abe likholwa, uPawulos watshutshisa abalandeli bakaKristu. Xa abanye babalandeli bakaKristu babegwetyelwa ukufa, uPawulos wasiqhwabel’ izandla eso sigwebo. Eneneni, wade wagunyazisa ukubulawa kwabanye babo. (IZenzo 8:1, 3; 9:1, 2, 11; 26:10, 11; Galati 1:13) Ngaphambi kokuba babe ngamaKristu, amalungu athile ebandla laseKorinte ayengamanxila, abaphangi namasela. (1 Korinte 6:9-11) Ekugqibeleni bonke aba bakholisa uThixo. Kwakutheni ukuze uThixo abaxolele?

Amanyathelo Amathathu Okufumana Inceba KaThixo

UPawulos wabhala wenjenje: “Ndenzelwa inceba, ngenxa yokuba ndandisenza ngokungazi, ndiswele ukholo.” (1 Timoti 1:13) La mazwi akhe angqalileyo asinika inyathelo lokuqala elifunekayo ukuze sixolelwe nguThixo—ukufumana ulwazi oluchanileyo ngoYehova nangemilinganiselo yakhe eseBhayibhileni. (2 Timoti 3:16, 17) Kucacile ukuba asinakuze simkholise uMdali wethu ukuba asimazi kakuhle. Xa wayethandaza kuYise uYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.”—Yohane 17:3.

Xa abantliziyo zinyanisekileyo befumana ulwazi, bazisola kunene ngehambo yabo yangaphambili yaye bayaguquka ngokusuka entliziyweni. Elo ke linyathelo lesibini ukuze sixolelwe nguThixo. IZenzo 3:19 ithi: “Guqukani, ke ngoko, nijike khon’ ukuze zicinywe izono zenu.”

Le ndinyana ikwasithela thsuphe nangenyathelo lesithathu—ukujika. Ukujika kuthetha ukufulathela iindlela nesimo sengqondo umntu awayenaso ngaphambili aze amkele imilinganiselo kaThixo neembono zakhe. (IZenzo 26:20) Ngamany’ amazwi, umntu ubonisa ngendlela abuphila ngayo ubomi bakhe ukuba wayenyanisekile xa wayesithi kuThixo, “Ndicela uxolo.”

UThixo Akaxoleli Yonk’ Into Le

Zikho izono zabantu uThixo angazixoleliyo. UPawulos wabhala wathi: “Ukuba siqhelisela isono ngabom emva kokufumana ulwazi oluchanileyo lwenyaniso, akusekho mbingelelo wezono useleyo, kodwa siya kulindelwa ngumgwebo owoyikekayo.” (Hebhere 10:26, 27) Amabinzana athi “ukuqhelisela isono ngabom” abhekisa kububi obendeleyo okanye intliziyo engendawo.

UYuda Skariyoti wayenentliziyo enjalo. UYesu wathi: “Ngekumlungele loo mntu ukuba wayengazange azalwe.” (Mateyu 26:24, 25) Ngokuphathelele iinkokeli zonqulo zomhla wakhe, uYesu wathi: “Nina niphuma kuyihlo uMtyholi, . . . Xa ethetha ubuxoki, uthetha ngokotyekelo lwakhe, kuba ulixoki noyise wabo ubuxoki.” (Yohane 8:44) Ngokufana nqwa noSathana iintliziyo zaloo madoda zazingendawo. Awazange azisole ngezenzo zawo ezibi kodwa asuka aqina enyaleni.a Enyanisweni, ngenxa yokuba engafezekanga amaKristu okwenyaniso enza izono ezinzulu ngamanye amaxesha. Kodwa ke ukuphambuka kwawo akuthethi ukuba ngoku sele enomkhwa wobungendawo.—Galati 6:1.

Wayenenceba De Kwaba Sekugqibeleni

UYehova akaphawuli nje isono kuphela kodwa nesimo sengqondo somoni. (Isaya 1:16-19) Khawucinge nje ngokufutshane ngabenzi bubi ababebethelelwe ecaleni koYesu. Bobabini bavuma ukuba izono zabo zazinzulu, kaloku omnye wabo wade wathi: “Thina sigwetywe ngokusesikweni, kuba samkela ngokupheleleyo oko kusifaneleyo ngezinto esizenzileyo; kodwa lo mntu [uYesu] akenzanga nto iphume endleleni.” Lo menzi bubi wayebonisa ukuba ikho into awayeyazi ngoYesu yaye ulwazi lwakhe lwenza ukuba atshintshe isimo sengqondo sakhe. Oko kuboniswa ngamazwi awawathetha kamva kuYesu embongoza esithi: “Uze undikhumbule xa uthe wangena ebukumkanini bakho.” UKristu wavakalelwa njani seso sibongozo sisuka entliziyweni? Wathi: “Inene ndithi kuwe namhlanje, Uya kuba nam eParadesi.”—Luka 23:41-43.

Khawucingisise kakuhle ngala mazwi: Amazwi okugqibela kaYesu ayequka amazwi enceba kwindoda eyavuma ngokwayo ukuba ifanelwe sisigwebo sokufa. Kulukhuthazo ngokwenene oko! Sinokuqiniseka ukuba uYesu Kristu noYise uYehova baya kubonisa imfesane kubo bonke ababonisa inguquko kungakhathaliseki izenzo zabo zangaphambili.—Roma 4:7.

[Umbhalo osemazantsi]

NGABA WAKHA WAZIBUZA?

◼ Unokuyichaza njani inceba kaThixo?—IiNdumiso 103:12-14; 130:3, 4.

◼ Ngawaphi amanyathelo umntu amele awathabathe ukuze akholise uThixo?—Yohane 17:3; IZenzo 3:19.

◼ Wamthembisa ntoni uYesu umenzi-bubi awayebethelelwe naye?—Luka 23:43.

[Umfanekiso okwiphepha 10]

UYesu wabonisa ukuba izono ezinzulu zinokuxolelwa