NdandiyiNkumanda Yomkhosi Kodwa Ngoku “Ndilijoni LikaKristu”

Kubalisa uMark Lewis

“Ingqanga neentsiba zayo.” “Bhota Mhlekazi.” Ezi zezinye zezikhahlelo endandizisebenzisa xa ndandingumbhexeshi wenqwelo-moya nenkumanda yeRoyal Australian Air Force VIP squadron. Ndandihambisa ooMongameli neendwalutho zoorhulumente bamazwe ngamazwe kulo lonke elaseOstreliya nakwamanye amazwe. Kodwa ngoku ndenza owona msebenzi uyolisayo. Makhe ndikubalisele.

NDAZALELWA ePerth, kwiNtshona yeOstreliya ngowe-1951 yaye utata wayelijoni. Xa ndandineminyaka eli-15 ubudala, ndabhalisa kwisikolo sokufunda ukuqhuba iinqwelo-moya. Yaqala njalo ke inkonzo yam yokubhexesha iinqwelo-moya.

Emva koko, abazali bam bohlukana yaza intsapho yakowethu yaba zintlaba zahlukane. Umphathi weli qela lo mkhosi nentsapho yakhe bandifaka phantsi kwephiko labo ngoxa ndandisagqibezela esikolweni. Lo mphathi-mkhosi wandikhuthaza ukuba ndingenele inkonzo yasemkhosini.

Ekugqibeleni Ndade “Ndaphumelela”

Emva kweminyaka emithandathu, ndaphumelela kwizifundo zam njengegosa loMkhosi woMoya ndaza ndafumana isidanga senzululwazi. Umsebenzi wam wokuqala yayikukubhexesha iinqwelo-moya ezazisetyenziselwa ukuhambisa abantu nezinto ezazisetyenziswa ngumkhosi kulo lonke elaseOstreliya, eMzantsi Pacific naseMzantsi-mpuma weAsia. Sasidla ngokubhabha kwiintaba eziphakamileyo nemiwonyo enzulu size sihlale kumabala angalungiswanga. Yayingumsebenzi oyingozi. Ngaloo minyaka umkhosi wethu waphulukana neenqwelo-moya eziliqela nababhexeshi abaphum’ izandla. Inkonzo yethu yayinceda abantu abahlala emagqagaleni. Sasihambisa izinto zokwakha iibhulorho, oomatshini abancinane bokusebenza, ukutya ngamaxesha kaxakeka neqela loogqirha nabongikazi. Sasikwahambisa nabantu abenzakeleyo ezingozini.

Ngowe-1978 ndaphumelela izifundo zokuba kumhlohli ndaza ngaloo ndlela ndabuyela kwisikolo somkhosi njengomhlohli. Ekubuyeleni kwam kwesi sigqubu somkhosi ndavuselela ubuhlobo noDiane umhlolokazi oselula owayenentwazana eneminyaka emithathu ubudala. Umyeni kaDiane ndandifunda naye kwisikolo somkhosi kodwa wasutywa kukufa esenkomeni. Ndathi ndisakucela ukuba anditshate, wacela ukuba ndikhe ndimphe ixesha lokuba acinge. Wayengaqinisekanga enoba wayemele atshate nomnye umbhexeshi wenqwelo-moya.

Ngeloo xesha, ndenyuselwa emsebenzini ukuba ndibe yintonga yasekhosi yenjengele okanye iRhuluneli Jikelele yaseOstreliya. Ukusebenza apha kwandikrobisa kwindlela ezinxibelelene ngayo ezopolitiko, abahlali, umkhosi nonqulo. Yathi isakuphela inkonzo yam, ndabuyela kumsebenzi wam wokufundisa indlela yokuqhuba iinqwelo-moya. Emva, koko satshata noDiane ngowe-1980.

Ngowe-1982 ndamkela isabelo sokuya kusebenza noMkhosi-womoya waseUnited States njengegosa elijongene nokhuselo lwenqwelo-moya nomphandi xa kuvele intlekele. Lo msebenzi wawundihambisa kulo lonke elaseUnited States maxa wambi ndandide ndiye naseNorthern Ireland. Lo msebenzi wawubandakanya ukuphanda iingozi zeenqwelo-moya, indlela eyakhiwe ngayo inqwelo-moya nendlela ebhabha ngayo ukuze kubonwe ukuba ingenziwa njani inqabiseke ngakumbi.

Ukubuyela EOstreliya

Emva kokuba ndibuyele eOstreliya, intsapho yethu yanda yanamalungu amane emva kokuzalwa kwentombi yethu uKerry. Ngenxa yomsebenzi wam, uDiane kwakufuneka akhulise abantwana yedwa, lo nto yayiqhwalelisa kanobom intsapho yam. Emva kweminyaka emithathu, ndenyuselwa ndaba ngumphathi webutho loMkhosi woMoya elibizwa ngokuba yiVIP squadron elikhankanywe ngaphambilana. Kwathi kusakuqhambuka iMfazwe yasePersian Gulf ngowe-1991, ibutho lam lancedisa umkhosi weZizwe Ezimanyeneyo nakwezinye iimfazwe njengasePakistan, eAfghanistan, eAfrika, nakwaSirayeli.

Ngowe-1992 ndenyuselwa ndaba liSekele leNkumanda yoMkhosi. Ukuba yintonga yasekhosi yeyona nkumanda iphezulu yaseOstreliya kwandibonisa unxibelelwano olukhoyo phakathi komkhosi, ezopolitiko neZizwe Ezimanyeneyo. Kulapho ndabona khona ukuba iZizwe Ezimanyeneyo kwakungekho yazo. Sekunjalo, kwakubonakala ukuba zikuphela kwethemba lehlabathi. Izinto ezazisenzeka ekhaya zandenza ndazikisa ukucinga.

Umbuzo KaDiane Uyaphendulwa

Emva kokufa komyeni wakhe wokuqala, uDiane owayengumRoma Katolika, wayefuna impendulo kumbuzo wakhe kodwa wayebuya nemband’ esikhova. Izinto zaya zisiba mandundu xa umafungwashe wethu uRenee, waba nomdla kwihlelo elithile. Ngoxa wayetyelele umhlobo wakhe, uDiane wabona iphephancwadi uVukani! elalichaza ngenqaku elilandelayo elaliza kuxubusha ngobuSathana.a Wayengazange akhe alibone eli phephancwadi ngaphambili. Njengoko wayegoduka wayecinga ngendlela anokulifumana ngayo eli phephancwadi?’

Emva kweentsuku ezintathu amaNgqina kaYehova eza ekhayeni lethu waza ngaloo ndlela uDiane wafumana iphephancwadi lakhe. Kamva wavuma ukuqhutyelwa isifundo seBhayibhile waza emva koko waya kwiintlanganiso zamaKristu. Kwakundivuyisa ukufunda kwakhe iBhayibhile ndandide ndimkhaphe xa esiya kwezinye iintlanganiso kodwa ndandingasiboni isizathu sokuba ndifunde iBhayibhile. Ndandicinga ukuba andingomntu wenkonzo. Ndandikholelwa kubukho bukaThixo kodwa ngenxa yokuhanahanisa konqulo ndandingalunanzanga. Ngokomzekelo ndandingasiqondi isizathu sokuba abefundisi bomkhosi bashumayele ngothando noxolo kodwa baxhase iimfazwe.

UDiane wayedla ngokushiya amaphephancwadi iMboniselo noVukani! ukuze ndiwafunde. Ndandidla ngokuwafunda amanye awo ndize ndiwabuyisele kwakula ndawo ebekuyo. Ndandingafuni ukuba acinge ukuba ndinomdla. Njengokuba ndandisiya ndisiba nolwazi olungakumbi lweBhayibhile, kukho izibhalo ezibini endandingaziqondi kakuhle. Esinye sezo Zibhalo yayincwadi yeSityhilelo 19:17, 18, ethetha ngeentaka ezitya inyama “yabaphathi-mikhosi.” Esinye yayisiSityhilelo 17:3, esithetha “ngerhamncwa elimbala ungqombela.” AmaNgqina ayesithi eli rhamncwa lifuzisela iZizwe Ezimanyeneyo, nto leyo eyayingqubana nendlela endandizijonga ngayo.b Kodwa ndazama ukungazidubi ngale mibuzo.

Ngowe-1993, uDiane wandimema ukuba ndibekho xa wayebhaptizwa. Esi sicelo sakhe sandifikela ndingasilindelanga. Ndambuza ukuba, “ukuba bekuza kufuneka ukhethe ubuza kukhetha bani phakathi kwam noYehova?” Waphendula wathi: “UYehova. Kodwa akunyanzelekanga ukuba kube njalo. Ndiyanifuna nobabini.” Ndaqonda ukuba kufuneka ndifunde ngoYehova. Umzalwana owayengumdala kwibandla lasekuhlaleni wacela ukundifundela iBhayibhile yaye ndavuma.

Ndaba nomdla kakhulu kwisiprofeto seBhayibhile, kuba sithetha ngomkhosi nembali yezopolitiko. Ngokomzekelo, xa ndandiqeqeshelwa ukuba ngumbhexeshi weeNqwelo-moya, ndafunda ngoloyiso lomkhosi wamandulo wamaGrike. Ndafunda ukuba inxalenye enkulu yaloo mbali yabhalwa kwiinkulungwane ezingaphambili kwincwadi kaDaniyeli isahluko 8. Esi siprofeto nezinye zandeyisela ngokuthe ngcembe ukuba iBhayibhile iphefumlelwe nguThixo.

Kwakhona ndazijonga ngenye indlela iZizwe Ezimanyeneyo. Ndandisazi ukuba umkhosi awunakuzicombulula iingxaki zabantu, uxolo lokwenene alunakuze lubekho kuba abantu besoyika iimfazwe. IZizwe Ezimanyeneyo azinakuze zikwazi ukucombulula iingxaki zezopolitiko, ezonqulo nezobuhlanga ezibangela yimfazwe. Ndabona ukuba nguThixo kuphela onokucombulula iingxaki zabantu. Ndabona ukuba wayesele eqalile ukuzicombulula phakathi kobuzalwana behlabathi lonke bamaNgqina kaYehova. (INdumiso 133:1; Isaya 2:2-4) Ndema nematha ‘ndingazi enokuba ndiyishiye na inkonzo yam yasemkhosini ukuze ndikhonze uThixo?’

Isigqibo Sokumela Inyaniso YeBhayibhile

Lafika ixesha lokuba ndenze isigqibo ngowe-1994 xa ndandiye kwindibano yesithili yamaNgqina kaYehova eSydney. Ucwangciso lwalunomdlalo weBhayibhile owawubonisa ukhetho ekwakufuneka lwenziwe luhlanga lwakwaSirayeli lwamandulo phakathi kokukhonza uYehova okanye uBhahali, isithixo samaKanana. Umprofeti kaYehova uEliya wawacel’ umngeni amaSirayeli esithi: “Koda kube nini na nimbaxa? Ukuba uYehova nguThixo oyinyaniso, landelani yena; kodwa ukuba nguBhahali, landelani yena.” (1 Kumkani 18:21) Lo mazwi andingxwelerha. NjengamaSirayeli ndandimbaxa. Ngaba ndandiza kukhonza uYehova okanye ndandiza kuqhubeka nenkonzo yam yasemkhosini?

Xa sasigoduka ngolo rhatya, ndaxelela uDiane ukuba ndiza kuyeka eMkhosini ukuze ndibe liNgqina likaYehova. Samothusa isigqibo sam kodwa wandixhasa. Nasemva kweentsuku eziliqela andizange nditshintshe, ndafaka ileta yam yokuyeka emsebenzini.

Ngelo xesha, ndandinguMphathi weCorps of Officer Cadets kwiSikolo saseOstreliya Sokuqeqesha Umkhosi eCanberra kwisixeko esilikomkhulu. Ndandisongamela umkhosi namagosa omkhosi asaqeqeshwayo aquka uMkhosi womhlaba, owaseLwandle nowaseMoyeni. Kunyaka wam wokugqibela kwesi sikolo ndaxelela amagosa aphezulu angaphezu kwama-400 nabanye abasebenzi ukuba ndiyayishiya inkonzo yasemkhosini ukuze ndiye kushumayela kwindlu ngendlu ndifundisa abantu ngeBhayibhile. Eso saziso sakhokelela kwingxubusho eshushu yeBhayibhile.

Ukungenela Inkonzo Yexesha Elizeleyo

Ndaqalisa ukushumayela ngosuku olulandelayo emva kokuba ndiyekile emkhosini. Emva kweenyanga ezintathu, ngoAprili 1995 ndabhaptizwa. Akuzange kube kudala emva koko, ndaba nguvulindlela othe ngxi, nto leyo ethetha ukuba ndandiza kuchitha ixesha lam elininzi ndishumayela nyanga nganye.

Ukuyeka kwam ukuba ngumphathi-mkhosi ukuze ndibe “lijoni likaKristu” kwakuthetha ukuba kwakuza kufuneka ndenze utshintsho olukhulu ebomini bam. (2 Timoti 2:3) Esinye sezabelo zam yayikukuhambisa imibhobho yesandisi-lizwi xa kuqhutywa iintlanganiso zamaKristu. Kunokuba ndikhuphe imiyalelo, kwakuza kufuneka ndifunde ukucela ukuba izinto zenziwe. Uvelwano nokuba nothando yaba zezona zibalulekileyo kunokuba izinto zenziwe ngexesha, nangona ndingekakwazi kakuhle ukuzilungelelanisa ezi mpawu. Ekubeni umvuzo wam umncinane ngoku, intsapho yethu kuye kwafuneka iphile ngendlela elula.

Ndisakuthanda ukushumayela nangoku. Ngenye imini xa sasishumayela nentwazana yethu uKerry eyayineminyaka elithoba ubudala, ndayicela ukuba iqwalasele indlela ababesabela ngayo abantu. Sabona ukuba abantu abaninzi ‘babengenamdla kodwa abanye babenobubele benomdla.’ Yayingamava akhuthazayo la kuthi sobabini. Enye intombi yethu yayifunda iBhayibhile okwexeshana kodwa ikhethe ukungabi nguye umkhonzi kaYehova okwangoku.

Mna noDiane siye sakhuthaza uKerry ukuba angenele ubulungiseleli bexesha elizeleyo. Kutshanje ndiye ndavuyiswa kukuya kwiSikolo Senkonzo Yobuvulindlela naye. Yayisisihlandlo sokuqala esiya kwesi sikolo kodwa mna ndandisiya okwesibini. Kuvuyisa ngokwenene ukumbona esenza inkqubela nolunye ulutsha!—INdumiso 110:3.

Intabalala Yeentsikelelo

Xa ndikhangela ngasemva, kukho izinto ezifanayo nezahlukileyo emkhosini nokuba lijoni likaKristu. Zombini ezi nkonzo zifuna ukunyaniseka, ukuthobeka, ingqibelelo ukukwazi ukuzilawula nomoya wokuzincama. Ngoxa abantu abaninzi emkhosini bekulungele ukufela ilizwe labo nezihlobo, amaKristu okwenyaniso kufuneka athande kwaneentshaba zawo. (Mateyu 5:43-48) Ngoxa amaqhawe asemkhosini enokuwongwa ngenxa yesenzo esinye sobugorha, amaKristu okwenyaniso afumana inkoliseko kaThixo ngokunyamezela kwinkonzo yokuthembeka—nto leyo enokuthetha ukunyamezela inkcaso, ukugculelwa nezinye iimvavanyo iminyaka ngeminyaka. (Hebhere 10:36-39) AmaKristu okwenyaniso ngabona bantu bathandekayo.

Ngokwahlukileyo kwindlela yokubulisa ebendiyikhankanye ekuqaleni kweli bali, ngoku xa ndibulisa ndithi “molo mzalwana,” okanye “molo dade.” Kumnandi ngokwenene ukukhonza nabantu abamthanda ngokwenene uThixo. Elona wonga lizukileyo kukukhonza, uYehova oYena Thixo uPhakamileyo. Ayikho enye indlela evuyisayo ebendinokubuphila ngayo ubomi bam.

[Imibhalo esemazantsi]

[Amagama acatshulweyo akwiphepha 14]

Ngoxa abantu abaninzi emkhosini bekulungele ukufela ilizwe labo nezihlobo, amaKristu okwenyaniso kufuneka athande kwaneentshaba zawo.

[Umfanekiso okwiphepha 12, 13]

Ndibhexesha inqwelo-moya phezu kwePalamente yaseCanberra

[Umfanekiso okwiphepha 15]

Umdlalo weBhayibhile, ngowe-1994 wendibano yesithili eSydney, eOstreliya

[Umfanekiso okwiphepha 15]

Ndikunye noKerry kwiSikolo Senkonzo Yobuvulindlela

[Umfanekiso okwiphepha 15]

Ndikunye noDiane noKerry namhlanje