Ukutya KwaseThailand
NGUMBHALI KAVUKANI! EMALAYSIA
XA UKWIZITRATO ezinyakazelayo zaseBangkok, eThailand, uva ivumba elitsho kamnandi lokutya libe selikukhwebela kwelo cala livela kulo. Uya kufumanisa ukuba livela kwalapho ecaleni kwendlela kubapheki bokutya okuthandwa gqitha eThailand. Xa ufika apho uze ubone ezo zibiliboco zimibalabala, usenokuziva ungakwazi kuzibamba ufuna ukungcamla kolo ncuthu.
Olu ncuthu lokutya kwaseThailand kwenziwa ngezithako ezikhethwe kakuhle, iingcambu, amagqabi neembewu. Ezi ziqholo zenza okunye koku kutya, kube switi, kube muncwana, okunye kube butyuwarha, kubekho nokunendawo ekrakrana ngoxa okunye kukhakhazela, nto leyo eyenza ukuba ungadluli nje ungakhange ungcamle. Kwenzeka njani ukuba iThailand ibe nezityo ezingaqhelekanga ngolu hlobo? Asinto yangoku le, kudala yabakho.
Ingxubevange Yezityo Zamazwe Ngamazwe
IThailand imi kwindawo esekudibaneni kweendlela zaseAsia. Kangangeenkulungwane, abaninzi kubantu abaye badlula eThailand, njengamaTshayina, abemi baseLaos, abaseKhambodiya, abaseIndonesia, abeLungu nabanye, bagqiba ekubeni bazinze kwelo. Aba bantu baye beza nokutya kwamazwe abo, yaye incasa nevumba lezo zityo zahlukahlukeneyo liye laqhubeka likho eThailand.
Mandulo phayaa, abakhenkethi baseIndiya bafundisa abantu baseThailand ukupheka ngekheri. Ngenkulungwane ye-16, kwafika amaPhuthukezi netshilisi mhlawumbi neetumato. Namhlanje ukutya kwaseThailand kuziindidi ezahlukahlukeneyo, kodwa uninzi lwako luquka itshilisi etyheli, eluhlaza nebomvu kunye nekheri yaloo mibala. Oku kuxutywa kwekheri netshilisi kwenza ukutya kwalapho kube nencasa eshoqololo yokutya kwaseMpuma.
Iindidi Ezininzi Zokutya, Neencasa Ezahlukahlukeneyo
Ukutya kwaseThailand kwahlukahlukene, isenokuba yisuphu, isaladi, ukutya okugcadiweyo, ikheri neesosi. Irayisi emhlophe yinto yemihla ngemihla apho. Emva koko kulandela izimuncumuncu, ezinye zazo ezenziwe ngeswekile namaqanda. Inyama nencindi yekhokhonathi zibalwa phakathi kwezimuncumuncu zaseThailand.
Naphi na, undoqo ekutyeni kukusebenzisa izithako ezisandul’ ukukhiwa, ibe zifumaneka nje lula eThailand. Kwizixeko nakwiidolophu zelo, iimarike zithengisa iziqhamo ezisandul’ ukukhiwa, imifuno, intlanzi nezinongo ezifana nelemon grass, icoriander, ikonofile, ijinja, igalangal, icardamom, itamarind, nekumin. Kwezi marike uya kufika kuzele iitshilisi ezikhakhazelayo, neelamuni, zinto ezo ezithandwa kakhulu kwelo.
Enoba utyelele apho okanye ufuna ukuva ukutya kwaseThailand ngoxa usekhaya, khawuzame itom yam goong, isuphu ekhakhazelayo ngoxa inayo nendawo emuncwana yaye ihamba phambili kwelo laseThailand. Ezinye izinto onokuzizama yisaladi enezinongo yepapaya, iinoodles ezidityaniswe nenkuku okanye idada eliqhotsiweyo, imicu yenyama yehagu okanye intlanzi efakwe izinongo eziphambili. IMa ho, gama elo elithetha “amahashe aphalayo,” yenziwa ngenyama yehagu edityaniswe neeprawn namandongomane, zize zonke ezo zinto zigalelwe kwipayina, kunqunqelwe kuzo itshilisi ebomvu namagqabi ecoriander. Ukugqibezela ezi mbiza zakho, yenza izimuncumuncu ezenziwe ngerayisi encangathi enencindi yekhokhonathi neemango.
Yiyiphi eyona ndlela ibhetele yokunandipha ukutya kwaseThailand? Kwezinye iindawo zelo lizwe, kusisithethe ukutya ngezandla, bebumba le rayisi baze bayincinde kwisosi ngaphambi kokuyifaka emlonyeni. Xa usitya iinoodles, usenokukhetha ukusebenzisa iichopstick. Kodwa zona ziyasokolisa, kukwabhetele ukusebenzisa ifolokhwe necephe.
Ngaba akuvuzi zinkcwe xa usiva ngoku kutya kwaseThailand? Uncuthu lokutya kweli lizwe lihle laseAsia kusenokukwenza ufune ukufunda ngakumbi ngezibiliboco zaseMpuma.
[Imifanekiso ekwiphepha 23]
1 Isuphu eyiTom yam goong
2 Isaladi yeenoodles edityaniswe nenyama yehagu esiliweyo kunye neeshrimp
3 Isaladi yepapaya enezinongo
4 IMa ho
5 Irayisi encangathi egalelwe incindi yekhokhonathi neemango