Abantu Abaselula Bayabuza

Ndinokuxhathisa Njani Kwisilingo?

◼ Kungaphelanga nemizuzu elishumi uKaren efikile ethekweni, kufika amakhwenkwe amabini ephethe iibhegi ezininzi. Uyayazi into ekwezo bhegi. Uye weva la makhwenkwe esithi kwelo theko ziza kube “zikroboka.” UKaren akazange ayithethe leyo kubazali bakhe. Wasuka wacinga ukuba la makhwenkwe ayaqhula. Kaloku, kwakuthiwe abantu abadala baza kube bekho.

Kusenjalo, uKaren uva ilizwi lomntu amaziyo. “Kutheni na wena wasuka wazikhetha, ungakhe ulinge uzobandisa itheko lethu!” Xa eguquka, ubona uJessica ethe qhiwu iibhotile ezimbini zebhiya ezigqitywa kuvulwa. Ununusa uKaren ngenye, atsho esithi, “Ungandixeleli ukuba akufiki kwezibandayo!”

UKaren uyabawela ukungabuthathi obu tywala. Kwangaxeshanye ukufumanisa kunzima ukwala. Akabaweli kusela. Ntonje uJessica ngumhlobo wakhe yaye akafuni kubonakala ngathi uzokubandisa itheko, njengoko uJessica eye watsho. Ngapha koko, uJessica ngumntu ozilungeleyo. Ngoko ukuba uJessica uyasela, oko kuthetha ukuba akukho nto ibitheni ngotywala. UKaren uthi kuye ngaphakathi, ‘Akukho nto iphosakeleyo ngokusela ibhiya. Akufani nokusebenzisa iziyobisi okanye ukuba neentlobano zesini.’

XA USEMTSHA ujamelana nezilingo ezininzi. Amaxesh’ amaninzi zidla ngokuvela kubantu besini esahlukileyo. URamona oneminyaka eli-17 ubudala uthi: “Amantombazana asesikolweni akalawuleki. Ayathanda ukuphathaphatha aze abone ukuba uza kuthini. Noba sele uwanqanda, aye angavumi ukukuyeka!” UDeanna, naye oneminyaka eli-17 ubudala, wajamelana nengxaki efanayo. Uthi: “Enye inkwenkwe yandigona. Ndayibetha kakhulu ngenqindi engalweni ndaza ndathi, ‘Undibambela ntoni? Andikwazi nokukwazi!’”

Nawe usenokusoloko ujamelene nezilingo. Omnye umKristu wathi, “uthotho lwezilingo lufana nje nomntu oqhubeka enkqonkqoza emnyangweni wakho nokuba akumhoyi.” Ngaba nawe usoloko ujamelene nezilingo? Ngokomzekelo, ngaba wakha walingwa ngezi zinto zilandelayo?

□ Ukutshaya

□ Ukusela utywala

□ Ukusebenzisa iziyobisi

□ Ukubukela imifanekiso engamanyala

□ Ukuziphatha kakubi ngokwesini

□ Nezinye izilingo ․․․․․

Ukuba kukho indawo ofake kuyo uphawu kwezi zinto zingasentla, musa ukucinga ukuba akunakuba ngumKristu. Unako ukuyilawula iminqweno ephosakeleyo uze uxhathise izilingo. Njani? Kuyanceda ukwazi ukuba yintoni ebangela isilingo. Cinga ngezi zinto zintathu.

1. Ukungafezeki. Abantu abangafezekanga banotyekelo lokwenza okuphosakeleyo. Kwanompostile uPawulos owayengumKristu oqolileyo wathi: “Xa ndinqwenela ukwenza okulungileyo, kusuke kubekho okubi kum.” (Roma 7:21) Nomntu onyanisekileyo maxa wambi uyaphazamiseka ngenxa ‘yenkanuko yenyama nenkanuko yamehlo.’ (1 Yohane 2:16) Kodwa ukusoloko ucinga ngento engafanelekanga kunokuba yingozi, kuba iBhayibhile ithi: ‘Xa umnqweno, uthe wakhawula, uzala isono.’—Yakobi 1:15.

2. Impembelelo yabanye. Sisoloko sijamelene nezilingo ngalo lonke ixesha. UTrudy uthi: “Esikolweni nasemsebenzini abantu basoloko bethetha ngesini. Kumabonwakude nakwiimovie, isini senziwa sibonakale njengento ebangela umdla. Kodwa akufane kuthethwe ngemiphumo emibi yokuziphatha okubi!” UTrudy uyayazi indlela ezinempembelelo ngayo ezo zinto. Uthi: “Ndathandana ndineminyaka eli-16 ubudala. Umama wathi, ukuba ndiqhubeka ndithandana ngolu hlobo, ndiza kumitha. Yandothusa indlela umama awayecinga ngayo! Kwiinyanga ezimbini emva koko, ndamitha.”

3. “Iinkanuko zobutsha.” (2 Timoti 2:22) Eli binzana linokuthetha nawuphi na umnqweno ababa nawo abasebatsha, njengokufuna ukwamkeleka okanye ukugqalwa njengomntu omdala. Nangona kungekho nto iphosakeleyo ngokuba neminqweno enjalo, ukuba akukwazi ukuyilawula, kunokuba nzima ukuxhathisa isilingo. Ngokomzekelo, xa ufuna ukujongwa njengomntu omdala unokungayikhathaleli indlela okhuliswe ngayo ekhaya. Kwenzeka kanye oko kuSteve owayeneminyaka eli-17 ubudala. Uthi, “Kungekudala emva kokuba ndibhaptiziwe, ndaqalisa ukwenza zonke izinto endandingazifundiswanga ekhaya.”

Liyinyaniso elokuba, ezi nkanuko zobutsha zichazwe ngasentla zinamandla. Sekunjalo, unako ukuxhathisa isilingo. Njani?

◼ Okokuqala, zazi izilingo ekunzima ukuzixhathisa. (Kusenokwenzeka ukuba sele uziphawulile ngasentla.)

◼ Emva koko, zibuze oku, ‘Ndilingeka xa kutheni?’ Beka uphawu kwezi zinto zikwiphepha elilandelayo:

□ Esikolweni

□ Emsebenzini

□ Xa ndihleli ndodwa

□ Kwezinye iindawo ․․․․․

Xa usazi ukuba ulingeka xa kutheni, unokukwazi ukusiphepha isilingo. Ngokomzekelo, cinga ngoku kuthethwe ngako ekuqaleni kweli nqaku. Yintoni eyenza uKaren waqonda ukuba kuza kubakho ingxaki kwitheko awayekulo? Wayenokusiphepha njani esi silingo kwasekuqaleni?

◼ Ekubeni ngoku (1) usazi isilingo yaye (2) usazi ukuba siza kwenzeka xa kutheni, ufanele wenze okuthile. Okukuqala, khangela indlela oza kusiphepha ngayo esi silingo. Bhala ngezantsi into oza kuyenza.

․․․․․

․․․․․

(Ngokomzekelo: Ukuba xa uphuma esikolweni usoloko udibana nabantwana ofunda nabo abakucengela ukuba utshaye, mhlawumbi usenokubaphepha ngokutshintsha indlela ogoduka ngayo. Ukuba usoloko ufumana imifanekiso engamanyala kwi-Internet, usenokufaka iinkqubo zekhompyutha eziza kukuthintela kwezo “websites.” Kwakhona, bhala igama elingqalileyo laloo nto uyifunayo.)

Kakade ke, akunakukwazi ukuziphepha zonke izilingo. Kungekudala, usenokujamelana nesilingo ekunzima ukusixhathisa ungalindelanga. Yintoni onokuyenza?

Hlala uzilungiselele. Xa uYesu ‘wayehendwa nguSathana,’ zange alibazise ukusiphepha eso sihendo. (Marko 1:13) Kwakutheni? Kuba wayelazi icala ami kulo. Khawucinge ngoku. UYesu wayengeyorobhothi. Ngewayeyele esilingweni. Kodwa, wayesele ezimisele ukuthobela uYise. (Yohane 8:28, 29) Wayeqinisekile xa wayethetha oku: “Ndihlele ukuza kwenza, kungekhona ukuthanda kwam, kodwa ukuthanda kwalowo wandithumayo.”—Yohane 6:38.

Ngezantsi bhala izizathu ezibini zokuba kutheni ufanele uxhathise isilingo osoloko ujamelana naso, uchaze neendlela ezimbini ozimisele ukusiphepha ngazo.

1. ․․․․․

2. ․․․․․

Khumbula ukuba, xa uyekelela esilingweni, uba likhoboka leminqweno yakho. (Tito 3:3) Kutheni uzivumela ulawulwe yiminqweno onayo? Kunokuvumela iminqweno yakho ikulawule, yilawule.—Kolose 3:5.

Amanqaku angakumbi kungcelele oluthi “Abantu Abaselula Bayabuza” anokufunyanwa kwiWeb site ethi www.watchtower.org/ype

[Umbhalo osemazantsi]

OKO UMELE UCINGE NGAKO

◼ Ngaba abantu abafezekileyo banokulingwa?—Genesis 6:1-3; Yohane 8:44.

◼ Ukuba uyasixhathisa isilingo, ukuthembeka kwakho kubachaphazela njani abanye?—IMizekeliso 27:11; 1 Timoti 4:12.

[Ibhokisi ekwiphepha 27]

ZAMA OKU

Thatha ikhampasi, uze usiba lwayo ulujongise emntla. Beka imagnethi ecaleni kwayo. Kwenzeka ntoni? Olu siba luyajika lujonge kwimagnethi.

Isazela sakho sifana naloo khampasi. Ukuba siqeqeshwe kakuhle, siya kukwalathisa kwindlela efanelekileyo, size sikuncede wenze izigqibo ngobulumko. Kodwa unxulumano olubi, olufana nemagnethi, lunamandla yaye lunokuyitshintsha imilinganiselo yakho emihle yokuziphatha. Sifunda ntoni koku? Baphephe abantu okanye iindawo eziya kukuphambukisa kwindlela efanelekileyo yokuziphatha!—IMizekeliso 13:20.

[Ibhokisi ekwiphepha 27]

ICEBISO

Cinga ngendlela onokusabela ngayo xa ulingelwa ukwenza okubi. Ungakhathazeki. Akukho mfuneko yokuba uthethe into eninzi. Thetha nje into elula. Ngokomzekelo, ukuba umntwana ofunda naye ukunika icuba, unokuthi: “Ungazikhathazi. Anditshayi!”

[Umfanekiso okwiphepha 28]

Xa uyekelela esilingweni, uba likhoboka leminqweno yakho